Read Pashto (Nangahari) — د پښتو مقدس کتاب تاريخ اول 20 Bible Online

تاريخ اول 20 - Pashto (Nangahari) — د پښتو مقدس کتاب bible

تاريخ اول 20

¹په ورپسې سپرلى کښې، د کال په هغه وخت کښې چې بادشاهان عموماً د جنګ دپاره ځى، يوآب لښکر روان کړو او د عمون مُلک يې تباه کړو، اګر چې داؤد بادشاه په يروشلم کښې ايسار وو. هغوئ د ربه ښار محاصره کړو او په دې يې حمله وکړه او تباه يې کړو.

²د عمونيانو د بُت مولک يو د سرو زرو تاج وو چې تقريباً څلور دېرش کيلو وزن يې وو. په دې کښې يو قيمتى کاڼے وو، کوم چې داؤد يوړو او په خپل تاج کښې يې کېښودو. هغۀ د هغه ښار نه ډېر زيات مالِ غنيمت هم يوړو.

³هغۀ د ښار خلق بوتلل او په زور يې ترې نه د آرو، د اوسپنې کودلو او د تبرونو کار اخستلو. هغۀ د عمون د نورو ټولو ښارونو په خلقو هم دغه شان وکړل. بيا هغه او د هغۀ سړى يروشلم ته واپس شول.

⁴ورستو په جزر کښې د فلستيانو سره جنګ بيا شروع شو. د جنګ په دوران کښې د حُوسه سِبکى يو دېو ووژلو چې د هغه دېو نوم سفى وو. او فلستيانو شکست وخوړو.

⁵د فلستيانو سره يو بل جنګ وشو او د يائير زوئ اِلحنان لحمى ووژلو، لحمى د جات د جوليت ورور وو، او د هغۀ د نېزې لاسکے د کوټې د تير هومره مضبوط وو.

⁶په جات کښې يو بل جنګ وشو، چې په دې جنګ کښې يو دېو وو چې د هر لاس يې شپږ ګوتې او د هرې پښې يې هم شپږ ګوتې وې. هغه د پخوانو دېوانو اولاد وو.

⁷کله چې هغۀ په بنى اِسرائيلو پورې ټوقې وکړې، نو يُونتن هغه ووژلو، يُونتن د داؤد د ورور د سمه زوئ وو.

⁸دا درې کوم چې داؤد او د هغۀ سړو ووژلى وُو، هغوئ د جات د دېوانو اولاد وو.