Read Pashto (Nangahari) — د پښتو مقدس کتاب تاريخ اول 28 Bible Online

تاريخ اول 28 - Pashto (Nangahari) — د پښتو مقدس کتاب bible

تاريخ اول 28

¹داؤد بادشاه د بنى اِسرائيلو ټولو آفسرانو له حُکم ورکړو چې په يروشلم کښې راغونډ شئ. نو د قبيلو ټول آفسران، هغه آفسران چا چې د بادشاهۍ اِنتظام کولو، د فوجى ډلو مشران، د بادشاه او د هغۀ د زامنو د جائيداد او د څاروو ذِمه وار کسان، د محل ټول آفسران، تکړه فوجيان او نور بهادر سړى په يروشلم کښې راغونډ شول.

²داؤد د هغوئ په وړاندې ودرېدلو او تقرير يې ورته وکړو: ”زما خلقو او زما وړُونو! ما ته غوږ ونيسئ. ما دا اراده کړې وه چې د مالِک خُدائ د لوظ صندوق دپاره د آرام ځائ يعنې د مالِک خُدائ زمونږ د خُدائ پاک د پښو چوکۍ جوړه کړم. ما د هغۀ دپاره د يو کور د جوړولو تيارے کړے دے.

³خو خُدائ پاک ما ته ووئيل چې تۀ به زما د نوم دپاره يو کور نۀ جوړوې، ځکه چې تۀ يو جنګيالے يې او وينه دې توئ کړې ده.

⁴مالِک خُدائ د بنى اِسرائيلو خُدائ پاک زما د پلار د ټولې کورنۍ نه زۀ خوښ کړې يم چې د همېشه دپاره په بنى اِسرائيلو حکومت وکړم. هغۀ د مشرۍ کولو دپاره د يهوداه قبيله خوښه کړه او د يهوداه نه يې زما د پلار کورنۍ خوښه کړه. دا د هغۀ خوښه وه چې د خپلو وړُونو نه يې زۀ خوښ کړم او په ټولو بنى اِسرائيلو يې بادشاه جوړ کړم.

⁵هغۀ ما له ډېر زامن راکړل او د هغه ټولو نه يې سليمان خوښ کړو چې د مالِک خُدائ په بادشاهۍ يعنې په ټولو بنى اِسرائيلو باندې حکومت وکړى.

⁶مالِک خُدائ ما ته ووئيل چې ستا زوئ سليمان هغه څوک دے چې هغه به زما کور جوړ کړى. هغه ما د دې دپاره خوښ کړے دے چې زما زوئ وى او زۀ به د هغۀ پلار يم.

⁷که هغه زما ټول قانون او حُکمونه هم هغه شان منى لکه څنګه يې چې نن منى نو زۀ به د هغۀ بادشاهى د همېشه دپاره قائمه وساتم.

⁸نو اوس زما خلقو! زمونږ د خُدائ پاک او د مالِک خُدائ د خلقو بنى اِسرائيلو د غونډې په مخکښې زۀ تاسو ته وايم چې هغه هر څۀ هم هغه شان پوره پوره منئ چې مالِک خُدائ زمونږ خُدائ پاک د هغې حُکم راکړے دے، نو چې دا ښۀ مُلک ستاسو ميراث وى او چې د همېشه دپاره يې خپلو راتلونکو نسلونو ته منتقل کړئ.“

⁹او هغۀ سليمان ته ووئيل، ”زما زويه! زۀ تا ته وايم چې د پلار خُدائ پاک وپېژنه او د زړۀ د اخلاصه او د خپلې مرضۍ سره د هغۀ خِدمت کوه. هغه زمونږ ټول فکرونه او خواهِشونه معلوموى. که تۀ د هغۀ طلب کوې نو پېدا به يې کړې، خو که تۀ د هغۀ نه راګرځې، نو هغه به تا د همېشه دپاره پرېږدى.

¹⁰تۀ په دې پوهه شه چې مالِک خُدائ تۀ د هغۀ د مقدس کور جوړولو دپاره خوښ کړے يې. نو تکړه شه او دا کار وکړه.“

¹¹داؤد سليمان ته د مالِک خُدائ د کور د ټولو عمارتُونو، د برنډو، د ګودام د کوټو او نورو ټولو کوټو او د زيات مقدس ځائ نقشه وښودله، چرته چې د ګناه دپاره کفاره ادا کېږى.

¹²د هغۀ په ذهن کښې چې د دربارونو او د دې نه ګېرچاپېره کوټو او د مالِک خُدائ د کور د سامان دپاره د ګودامونو او مالِک خُدائ ته د وقف شوو تُحفو کومه نقشه وه نو هغه يې هم ورته وښودله.

¹³داؤد هغۀ ته د اِمامانو او ليويانو د ذِمه وارو ادا کولو اِنتظام، د مالِک خُدائ د کور د کار کولو او د کور د ټولو لوښو خيال ساتلو طريقه هم وښودله.

¹⁴هغۀ ورته دا طريقه هم وښودله چې د لوښو د جوړولو دپاره به څومره سپين زر او سرۀ زر اِستعمالېږى،

¹⁵يعنې هرې يوې ډيوې او ډيوټ د جوړولو دپاره،

¹⁶د سپينو زرو د مېزونو د جوړولو او د سرو زرو د هر يو مېز دپاره چې په دې باندې خُدائ پاک ته پېش کړے شوې روټۍ پراته وه.

¹⁷هغۀ ورته دا هم وښودل چې د درې غاښو، جامونو او منګو په جوړولو کښې څومره سوچه سرۀ زر او د لوښو په جوړولو کښې به څومره سپين زر او سرۀ زر اِستعمالېږى،

¹⁸او د هغه قربان‌ګاه د جوړولو دپاره څومره سوچه سرۀ زر چې په هغې باندې خوشبوئى سوزولے شوه او د وزرو والا هغه مخلوق د جوړولو دپاره چې د هغې وزر د مالِک خُدائ د لوظ صندوق دپاسه خوارۀ وُو.

¹⁹داؤد بادشاه ووئيل، ”دا ټول تفصيل په هغه نقشه کښې ليکلے شوے وو چې مالِک خُدائ په خپله ما له راکړې وه.“

²⁰داؤد بادشاه خپل زوئ سليمان ته ووئيل، ”تکړه شه او اراده مضبوطه کړه. کار شروع کړه او چې ونۀ يرېږې او نۀ بې‌حوصلې شې. مالِک خُدائ زما خُدائ پاک به ستا مل وى. هغه به تا نۀ پرېږدى، خو هغه به تر هغې پورې ستا سره وى چې د هغۀ يعنې د مالِک خُدائ د کور کار ختم شوے نۀ وى.

²¹اِمامانو او ليويانو ته ذِمه وارۍ حواله شوې دى چې د مالِک خُدائ په هغه کور کښې يې وکړى. د هر قِسم مهارت کاريګران د زړۀ نه غواړى چې ستا مدد وکړى او ټول خلق او د هغوئ مشران ستا د حُکم لاندې دى.“