Read Pashto (Nangahari) — د پښتو مقدس کتاب تاريخ دويم 11 Bible Online

تاريخ دويم 11 - Pashto (Nangahari) — د پښتو مقدس کتاب bible

تاريخ دويم 11

¹کله چې رحُبعام بادشاه يروشلم ته ورسېدو، نو هغۀ د يهوداه او بنيامين د قبيلو نه يو لاکھ او اتيا زره تکړه فوجيان راغونډ کړل. د هغۀ اراده دا وه چې جنګ له لاړ شى او د بنى اِسرائيلو په شمالى قبيلو باندې خپل اِختيار بيا بحال کړى.

²خو مالِک خُدائ سمعياه پېغمبر ته ووئيل

³چې رحُبعام بادشاه او د يهوداه او بنيامين قبيلو ټولو خلقو له دا پېغام ورکړى،

⁴”په خپلو بنى اِسرائيلو باندې حمله مۀ کوئ. ټول کورونو ته لاړ شئ. چې څۀ شوى دى هغه زما مرضى وه.“ نو هغوئ د مالِک خُدائ حُکم ومنلو او د يربعام خِلاف جنګ له لا نۀ ړل.

⁵رحُبعام په يروشلم کښې پاتې شو او د يهوداه او بنيامين دې ښارونو نه يې پاخۀ دېوالونه تاو کړل:

⁶بيت‌لحم، ايتام، تقوع،

⁷بيت صور، شوکو، عدولام،

⁸جات، مريسه، زيف،

⁹اُوريم، لکيس، عزيقه،

¹⁰صُرعا، ايالون او حبرون.

¹¹هغۀ د دې ښارونو نه ښۀ پاخۀ دېوالونه تاو کړل او په هر يو باندې يې يو فوجى مشر مقرر کړو او د هر يو دپاره يې د خوراک، زيتُونو تېلو او د انګورو شرابو بندوبست وکړو،

¹²او ډالونه او نېزې يې پرې کېښودې. نو داسې هغۀ يهوداه او بنيامين د خپل قابو لاندې وساتل.

¹³د بنى اِسرائيلو د ټولو علاقو اِمامان او ليويان د يهوداه جنوبى طرف ته راتلل.

¹⁴ليويانو د څران زمکې او خپل جائيدادونه پرېښودل او يهوداه او يروشلم ته لاړل، ځکه چې د بنى اِسرائيلو بادشاه يربعام او د هغۀ زامنو هغوئ دې ته نۀ پرېښودل چې د مالِک خُدائ د اِمامانو په توګه خِدمت وکړى.

¹⁵يربعام خپل اِمامان مقرر کړل چې هغوئ د غېرو قومونو د عِبادت په ځايُونو کښې خِدمت کوى چې هلته د هغه چېلو او څخو په شکل د بُتانو عِبادت کوى چې کوم هغۀ جوړ کړى وُو.

¹⁶د بنى اِسرائيلو د ټولو قبيلو نه کومو خلقو چې د زړۀ د اِخلاصه د مالِک خُدائ د بنى اِسرائيلو د خُدائ پاک عِبادت کول غوښتل نو هغوئ په ليويانو پسې يروشلم ته لاړل، د دې دپاره چې هغوئ د مالِک خُدائ د هغوئ د پلار نيکۀ خُدائ پاک ته نذرانې پېش کړې.

¹⁷نو په دې باندې د يهوداه بادشاهى مضبوطه شوه او درې کاله يې د سليمان د زوئ رحُبعام ملګرتيا کوله او هغوئ هم هغه شان ژوند تېرولو لکه څنګه چې د داؤد بادشاه او سليمان بادشاه د حکومت لاندې وُو.

¹⁸رحُبعام مهلات وادۀ کړه، چې د هغې پلار د داؤد زوئ يريموت وو او د هغۀ مور ابى‌خېل وه، چې د اِلياب لور او د يَسى نمسۍ وه.

¹⁹د هغوئ درې زامن وُو: يعوس، سمرياه او زهم.

²⁰وروستو هغۀ معکه وادۀ کړه چې د ابى‌سلوم لور وه او د هغوئ څلور زامن وُو: ابياه، عتى، زيزا او سلوميت.

²¹د رحُبعام ټولې اتلس ښځې او شپېتۀ نورې ښځې وې او هغه د اتۀ‌ويشتو زامنو او شپېتو لوڼو پلار وو. هغۀ د خپلو ټولو ښځو او د نورو ښځو نه د معکه سره زياته مينه کوله،

²²او په هغۀ باندې د هغې زوئ ابياه د نورو ټولو بچو نه زيات ګران وو، نو په دې وجه هغه يې د دې دپاره خوښ کړو چې د هغۀ نه پس بادشاه جوړ شى.

²³رحُبعام د هوښيارتيا نه دومره کار واخستو چې خپل زامن يې د يهوداه او بنيامين د پَخو دېوالونو په ټولو ښارونو کښې مقرر کړل. هغوئ له يې ښۀ ډير خوراک ورکړو او هغوئ هر يو ته يې ښى ډېرې ښځې وادۀ کړې.