Read Pashto (Nangahari) — د پښتو مقدس کتاب تاريخ دويم 16 Bible Online

تاريخ دويم 16 - Pashto (Nangahari) — د پښتو مقدس کتاب bible

تاريخ دويم 16

¹د آسا د بادشاهۍ په شپږ دېرشم کال، د بنى اِسرائيل بادشاه بعشا په يهوداه حمله وکړه او د راما نه يې د پَخو دېوالونو تاوول شروع کړل دا دې دپاره چې د يهوداه بادشاه آسا د علاقې نه د ټولو خلقو تګ راتګ بند کړى.

²نو آسا د محل او د مالِک خُدائ د کور د خزانې نه سرۀ زر او سپين زر واخستل او د دې پېغام سره يې د شام بادشاه بِن‌حدد له دمشق ته ولېږل:

³”راځئ چې زمونږ د پلار نيکۀ په شان په خپلو کښې ملګرى شو. ګوره! زۀ تا له سرۀ زر او سپين زر درلېږم. اوس د بنى اِسرائيل بادشاه بعشا سره خپل اِتحاد مات کړه نو داسې به هغه زما د علاقې نه خپل فوجيان وباسى.“

⁴بِن‌حدد د آسا دا مشوره ومنله او خپل فوجى آفسران او خپل فوجيان يې ولېږل چې د بنى اِسرائيلو په ښارونو حمله وکړى. هغوئ عيون، دان، هابيل بيت معکه او د نفتالى هغه ټول ښارونه قبضه کړل چرته چې سامانونه جمع کولے شول.

⁵کله چې بعشا بادشاه خبر شو چې څۀ شوى وُو، نو هغۀ د راما نه پاخۀ دېوالونه جوړول بند کړل او کار يې پرېښودو.

⁶بيا آسا بادشاه د ټول يهوداه نه سړى راغونډ کړل او هغوئ له يې حُکم ورکړو چې هغه کاڼى او لرګى راوړئ چې کوم بعشا په راما کښې اِستعمالول او هغوئ دا د جبعه او د مصفاه ښارونو نه د پَخو دېوالونو تاوؤلو دپاره اِستعمال کړل.

⁷په هغه وخت کښې حنانى پېغمبر آسا بادشاه له لاړو او ورته يې ووئيل، ”د مالِک خُدائ ستا د خُدائ پاک په ځائ تا د شام په بادشاه بهروسه وکړه، نو په دې وجه د شام د بادشاه لښکر ستا نه خلاص شوے دے.

⁸د ايتهوپيا او د ليبيا د خلقو سره ډېر فوجيان او ډېرې جنګى ګاډۍ او په اسونو سوارۀ کسان نۀ وُو څۀ؟ خو تا په مالِک خُدائ بهروسه وکړه نو ځکه هغۀ تا له په هغوئ باندې فتح درکړه.

⁹مالِک خُدائ په ټوله دنيا د دې دپاره نظر اچوى چې هغه کسانو له طاقت ورکړى چې د چا زړۀ د اخلاصه د هغۀ وفادار وى. تۀ څومره کم عقل يې! د اوس نه به تۀ په جنګ کښې راګېر وې.“

¹⁰په دې باندې آسا هغه پېغمبر ته دومره غصه شو چې هغه يې په زنځيرونو وتړلو او قېد يې کړو. هم د هغه وخت نه آسا د خلقو سره ظلم زياتے شروع کړو.

¹¹د اول نه واخله تر آخره پورې د آسا د بادشاهۍ ټولې واقعې د بنى اِسرائيل او يهوداه بادشاهانو په تاريخ کښې ليکلے شوى دى.

¹²د خپلې بادشاهۍ په يو کم څلوېښتم کال آسا د پښو د يو سخت مرض په وجه شل شو، خو بيا هم هغه مالِک خُدائ ته د مدد دپاره ورونۀ ګرځېدو او صرف طبيبانو له لاړو.

¹³دوه کاله وروستو هغه مړ شو

¹⁴او هغه په هغه قبر کښې ښخ شو کوم چې هغۀ د داؤد په ښار کښې په يو غټ ګټ کښې خپل ځان دپاره جوړ کړے وو. هغوئ د هغۀ ښخولو دپاره مصالحې اوخوشبويۍ والا تېل اِستعمال کړل او هغوئ د هغۀ په مرګ باندې د غم دپاره يو لوئ اور بل کړو.