Read Pashto (Nangahari) — د پښتو مقدس کتاب تاريخ دويم 21 Bible Online

تاريخ دويم 21 - Pashto (Nangahari) — د پښتو مقدس کتاب bible

تاريخ دويم 21

¹يهوسفط مړ شو او د داؤد ښار په شاهى اديره کښې ښخ شو او د هغۀ زوئ يهورام د هغۀ نه پس بادشاه جوړ شو.

²د يهوسفط بادشاه د زوئ يهورام شپږ وروڼه وُو: عزرياه، يحى ايل زکرياه، عزرياه، ميکائيل او سفطياه.

³خپل پلار هغوئ له ډېر سرۀ زر، سپين زر او قيمتى څيزُونه ورکړل او هر يو يې د يهوداه د پَخو دېوالونو ښارونو مشر مقرر کړو. يهورام د ټولو مشر وو نو په دې وجه يې هغه د دې دپاره مقرر کړو چې د هغۀ نه پس بادشاه شى.

⁴کله چې بادشاهى په پوره توګه د يهورام په لاس کښې وه، نو هغۀ خپل ټول وروڼه او څۀ بنى اِسرائيلى مشران هم ووژل.

⁵يهورام د دوو دېرشو کالو په عُمر کښې بادشاه شو او اتۀ کاله يې په يروشلم حکومت وکړو.

⁶هغۀ د اخى‌اب بادشاه او د بنى اِسرائيلو نورو بادشاهانو په بدو مِثالونو باندې عمل وکړو، ځکه چې هغۀ د اخى‌اب يوه لور وادۀ کړې وه. هغۀ د مالِک خُدائ خِلاف ګناه وکړه،

⁷خو د مالِک خُدائ دا مرضى نۀ وه چې د داؤد شاهى کورنۍ تباه کړى، ځکه چې هغۀ د داؤد سره تړون کړے وو او دا وعده يې ورسره کړې وه چې د هغۀ اولاد به د همېشه دپاره بادشاهى کوى.

⁸د يهورام د بادشاهۍ په وخت کښې ادوم د يهوداه خِلاف بغاوت وکړو او يو خپل بادشاه يې مقرر کړو.

⁹نو يهورام او د هغۀ آفسرانو خپلې ټولې جنګى ګاډۍ روانې کړې او په ادوم يې حمله وکړه. هلته ادومى لښکر هغوئ نه ګېرچاپېره تاو شول، خو د شپې په وخت کښې هغوئ ووتل او وتښتېدل.

¹⁰نو ادوم تر نن پورې د يهوداه نه آزاد وو. هم په هغه وخت کښې د لِبناه ښار هم بغاوت وکړو، دا هر څۀ ځکه وشول چې يهورام مالِک خُدائ د خپل پلار نيکۀ خُدائ پاک پرېښے وو.

¹¹هغۀ د يهوداه په غرايزه علاقه کښې د معبودانو د عِبادت ځايُونه هم جوړ کړى وُو او د يهوداه او د يروشلم خلق يې بې لارې کړى وُو.

¹²الياس پېغمبر يهورام له يو خط ولېږلو، چې په هغې کښې ليکلى شوى وُو: ”مالِک خُدائ، ستا د پلار نيکۀ داؤد خُدائ پاک تا رد کوى، ځکه چې تا د خپل پلار يهوسفط بادشاه او د خپل نيکۀ آسا په نقش قدم باندې مزل نۀ دے کړے.

¹³تا د بنى اِسرائيلو د بادشاهانو په نقش قدم باندې مزل کړے دے او د يهوداه او يروشلم په خلقو دې د بُتانو عِبادت کړے دے، لکه څنګه چې اخى‌اب او د بنى اِسرائيلو نورو بادشاهانو کړى وُو. تا خو خپل وروڼه هم ووژل، چې هغوئ ستا نه ښۀ سړى وُو.

¹⁴او په آخر کښې به مالِک خُدائ ستا خلقو له، ستا بچو او ستا ښځو له سخته سزا ورکړى او ستا هر څۀ به تباه کړى.

¹⁵تۀ به د کولمو په سخت مرض باندې آخته شې چې هغه به ورځ په ورځ زياتېږى تر دې پورې چې کولمې به درنه بهر راووځى.“

¹⁶څۀ فلستيان او عرب د هغه ځائ سره نزدې اوسېدل چرته چې څۀ د ايتهوپيا خلق د سيند په غاړه دېره وُو. مالِک خُدائ هغوئ ولمسول چې د يهورام خِلاف جنګ له لاړ شى.

¹⁷هغوئ په يهوداه حمله وکړه، شاهى محل يې لوټ کړو او د بادشاه د کشرى زوئ، اخزياه نه بغېر يې د بادشاه ټولې ښځې او زامن قېديان بوتلل.

¹⁸بيا د دې هر څۀ نه پس، مالِک خُدائ په بادشاه باندې د کولمو سخت مرض راوستلو.

¹⁹تقريباً دوه کاله دا مرض په مزه مزه زياتېدو تر دې پورې چې د هغۀ کولمې بهر راووتې او هغه په لوئ تکليف کښې مړ شو. د هغۀ خلقو د هغۀ د عزت دپاره اور بل نۀ کړو لکه چې د هغۀ د پلار نيکۀ دپاره بل شوے وو.

²⁰يهورام د دوو دېرشو کالو په عُمر کښې بادشاه جوړ شوے وو او اتۀ کاله يې په يروشلم بادشاهى کړې وه. کله چې هغه مړ شو نو هيڅ څوک هم خفه نۀ وُو. هغوئ هغه د داؤد په ښار کښې ښخ کړو، خو په شاهى اديره کښې يې ښخ نۀ کړو.