Read Pashto (Nangahari) — د پښتو مقدس کتاب تاريخ دويم 33 Bible Online

تاريخ دويم 33 - Pashto (Nangahari) — د پښتو مقدس کتاب bible

تاريخ دويم 33

¹منسى د دولسو کالو وو چې هغه د يهوداه بادشاه جوړ شو او په يروشلم يې پينځۀ پنځوس کاله بادشاهى وکړه.

²منسى د هغه قومونو هغه رسمونه کول کوم چې د مالِک خُدائ په نظر کښې بد وو. دا هم هغه خلق وو کوم چې مالِک خُدائ په هغه وخت کښې د هغه مُلک نه ويستلى وُو چې کله د هغۀ خلق مخ په وړاندې تلل.

³هغۀ د غېرو قومونو د عِبادت هغه ځايُونه بيا جوړ کړل چې کوم د هغۀ پلار حزقياه تباه کړى وُو. هغۀ د بعل د عِبادت دپاره قربان‌ګاه جوړې کړې، د اشيرې بُت نښې يې جوړې کړې او د ستورو عِبادت يې وکړو.

⁴هغۀ د مالِک خُدائ په کور کښې د غېرو قومونو قربان‌ګاه جوړې کړې، د کوم ځائ په باره کښې چې مالِک خُدائ وئيلى وُو چې، ”زما نوم به په يروشلم کښې همېشه پاتې شى.“

⁵د مالِک خُدائ د کور په دوو دربارونو کښې هغۀ د ستورو د عِبادت دپاره قربان‌ګاه جوړې کړې.

⁶هغۀ د هنوم په مېدان کښې خپل زامن د سوزېدونکې نذرانو په توګه قربانى کړل. هغۀ د غېبو کارونو او جادو نه کار اخستلو او قسمت ښودونکو او د فالګرو سره يې مشورې وکړې. هغۀ د مالِک خُدائ خِلاف لويه ګناه وکړه او د هغۀ غصه يې راوپاروله.

⁷هغۀ چې کوم بُت جوړ کړے وو هغه يې واخستلو او د خُدائ پاک په کور کښې يې کېښودلو چې د کوم په باره کښې خُدائ پاک داؤد او د هغۀ زوئ سليمان ته وئيلى وُو، ”په دې کور کښې او په يروشلم کښې به زۀ خپل نوم د همېشه دپاره وساتم کوم ښار چې ما د بنى اِسرائيلو د ټولو قبيلو نه خوښ کړے دے.

⁸که بنى اِسرائيليان زما ټول حُکمونه منى او هغه ټول قانون پوره کوى چې زما خِدمت کوُونکى موسىٰ هغوئ له ورکړے دے، نو زۀ به هغوئ نۀ پرېږدم چې د هغه مُلک نه وويستلے شى چې کوم ما د هغوئ پلار نيکۀ له ورکړے دے.“

⁹خو منسى د يهوداه او يروشلم خلق بې لارې کړل او هغوى د هغه قومونو نه هم لوئې ګناهُونه وکړل کوم چې مالِک خُدائ تباه کړى وُو کله چې بنى اِسرائيليان مخ په وړاندې تلل.

¹⁰اګر چې مالِک خُدائ منسى او د هغۀ خلقو له خبردارے ورکړو، خو هغوئ به ورته غوږ نۀ نيولو.

¹¹نو مالِک خُدائ د اسور فوجى مشران ولېږل چې په يهوداه باندې حمله وکړى. او هغوئ منسى ونيولو، کونډې يې ورته واچولې او په زنځيرونو باندې يې وتړلو او بابل ته يې بوتلو.

¹²هغه د خپلو مصيبتونو په وجه عاجز شو او مالِک خُدائ، خُدائ پاک ته راوګرځېدو او هغۀ ته يې د مدد دپاره سوال وکړو.

¹³خُدائ پاک د منسى سوال واورېدو او قبول يې کړو او هغه يې ولېږلو چې يروشلم ته واپس لاړ شى او بيا حکومت وکړى. نو منسى ته پته ولګېده چې مالِک خُدائ په رښتيا خُدائ پاک دے.

¹⁴د دې نه پس، منسى د داؤد ښار د بهرنى دېوال اُوچتوالے زيات کړو، د نمر پرېواتۀ په طرف په واد‌ۍ کښې د جيحون د چشمىې نه د کبانو دروازې پورې او هم دغه ديوال د عوفل د غر نه هم راتاو وو. هغۀ د يهوداه د پَخو دېوالونو په هر يو ښار کښې يو يو فوجى آفسر مقرر کړو.

¹⁵هغۀ د مالِک خُدائ د کور نه هغه پردى بُتان او نښې لرې کړې کومې چې هغۀ هلته ايښې وې او هغۀ د غېرو قومونو هغه قربان‌ګاه لرې کړې کومې چې د مالِک خُدائ د کور په غرۀ او په يروشلم کښې په نورو ځايُونو کښې وې، هغۀ دا ټول څيزُونه د ښار نه بهر يوړل او وې غورزول.

¹⁶هغۀ هغه قربان‌ګاه هم مرمت کړه چرته چې د مالِک خُدائ عِبادت کېدو او چې هغۀ ورباندې د سلامتۍ نذرانې او شکرانې نذرانې پېش کولې. هغۀ د يهوداه ټولو خلقو له حُکم ورکړو چې د مالِک خُدائ د بنى اِسرائيلو د خُدائ پاک عِبادت وکړى.

¹⁷اګر چې خلقو د عِبادت په نورو ځايُونو هم قربانۍ پېش کولې، خو هغوئ دا صِرف مالِک خُدائ ته پېش کولې.

¹⁸نور هر څۀ چې منسى کړى وُو، هغۀ چې خُدائ پاک ته کوم سوال کړے وو او د پېغمبرانو هغه پېغامونه چې هغوئ د مالِک خُدائ د بنى اِسرائيلو د خُدائ پاک په نوم د هغۀ سره خبرې وکړې، دا هر څۀ د بنى اِسرائيلو د بادشاهانو په تاريخ کښې ليکلے شوى دى.

¹⁹د بادشاه دعا او د خُدائ پاک د دعا قبلول او د هغۀ د توبې نه مخکښې د هغه ګناهونو حِساب کِتاب چې هغۀ کړى وُو، هغه بد عملونه چې هغۀ کړى وُو، د غېرو قومونو د عِبادت ځايُونه او د اشيرې بُت نښې چې هغۀ جوړې کړې وې او هغه بُتان چې هغۀ يې عِبادت کولو، دا هر څۀ د پېغمبرانو په تاريخ کښې ليکلے شوى دى.

²⁰منسى مړ شو او په محل کښې ښخ شو او د هغۀ زوئ امون د هغۀ نه پس بادشاه جوړ شو.

²¹امون د دوويشتو کالو وو چې هغه د يهوداه بادشاه جوړ شو او هغۀ په يروشلم باندې دوه کاله حکومت وکړو.

²²د خپل پلار منسى په شان هغۀ هم د مالِک خُدائ خِلاف ګناه وکړه او چې د هغۀ پلار د کومو بُتانو عِبادت کړے وو نو هغۀ يې هم عِبادت وکړو.

²³خو هغه د خپل پلار په شان عاجز نۀ شو او نۀ مالِک خُدائ ته راوګرځېدو، هغه د خپل پلار نه هم زيات ګناهګار شو.

²⁴د امون آفسرانو د هغۀ خِلاف منصُوبه جوړه کړه او په محل کښې يې ووژلو.

²⁵د يهوداه خلقو د امون قاتِلان ووژل او د هغۀ زوئ يوسياه يې بادشاه جوړ کړو.