Read Pashto (Nangahari) — د پښتو مقدس کتاب تاريخ دويم 8 Bible Online

تاريخ دويم 8 - Pashto (Nangahari) — د پښتو مقدس کتاب bible

تاريخ دويم 8

¹سليمان په خپل محل او د مالِک خُدائ په کور جوړولو کښې شل کاله ولګول.

²هغۀ هغه ښارونه هم بيا جوړ کړل چې حيرام بادشاه ورکړى وُو او بنى اِسرائيليان يې ورولېږل چې په هغې کښې اوسېږى.

³سليمان بيا حمات ضوباه ته لاړو او دا علاقه يې قبضه کړه

⁴او په صحرا کښې د پَخو دېوالونو ښار تدمور يې هم قبضه کړو. هغۀ په حمات کښې هغه ټول ښارونه هم بيا جوړ کړل چې کوم ښارونه د ګودامونو دپاره اِستعمالېدل.

⁵سليمان دا ښارونه هم بيا جوړ کړل: پاسنے بيت‌حورون او لاندينے بيت‌حورون چې دا د پَخو دېوالونو ښارونه وُو چې مضبوطې دروازې يې لرلې،

⁶د بعلات ښار، هغه ټول ښارونه چې د سامان ګودامونه وُو او هغه ښارونه چرته چې د هغۀ اسونه او جنګى ګاډۍ ودرېدلې. هغۀ د يروشلم، لبنان او د هغه ټولې علاقې کوم آبادے کول غوښتل هغه يې سر ته ورسول او بادشاهى يې کوله.

⁷۷‏-۸ سليمان د کنعان د خلقو ټول اولاد داسې نوکران کړل چې په زور ترې نه کار اخستلے شو. دا هغه کسان وو کوم چې بنى اِسرائيلو نه ژوندى پاتى شوى وو کله چې بنى اِسرائيلو هغه مُلک ونيولو. په دې کښې حِتيان، اموريان، فارصيان، حِويان او يبوسيان وُو، چې د هغوئ اولاد تر نن وخته پورې غلامان دى.

⁹د بنى اِسرائيلو نه په زور کار نۀ شو اخستلے، خو د فوجيانو، آفسرانو، د جنګى ګاډو مشرانو او په اسونو سوارو کسانو په توګه يې خِدمت کولو.

¹⁰سليمان د بنى اِسرائيلو نه دوه نيم سوه آفسران مقرر کړل چې په دغه خلقو مشرى وکړى.

¹¹سليمان خپله ښځه يعنې د مِصر د فِرعون لور د داؤد د ښار نه هغه کور ته بوتله چې کوم يې د هغې دپاره جوړ کړے وو. هغۀ ووئيل، ”هغه دې د بنى اِسرائيلو بادشاه داؤد په محل کښې نۀ اوسېږى، ځکه چې چرته د لوظ صندوق پاتې شوے وو نو هغه ځائ مقدس دے.“

¹²سليمان په هغه قربان‌ګاه باندې مالِک خُدائ ته سوزېدونکې نذرانې پېش کړې کومه چې هغۀ د خُدائ پاک د کور په مخکښې جوړه کړې وه.

¹³هغۀ د هرې مقدسې ورځې دپاره د موسىٰ د شريعت د حُکم په مطابق سوزېدونکې نذرانې پېش کړې: د سبت د ورځو، د نوې مياشتې اخترونو او د کال درې کالنى اخترونو، د پتيرې روټۍ اختر، د ريبلو اختر او د جونګړو اختر.

¹⁴اِمامانو ته د ذِمه وارو حوالو کولو دپاره سليمان د خپل پلار داؤد په اصُولو باندې عمل وکړو. هغۀ ليويان هم مقرر کړل چې په ثناء صِفت وئيلو کښې او د اِمامانو سره د هغوئ په کارونو کښې مدد کوى. او هغۀ د ډلو په مطابق په دروازو باندې څوکيداران هم ودرول، ځکه چې د خُدائ پاک خِدمت کوُونکى داؤد هم دغه شان حُکم کړے وو.

¹⁵داؤد چې د خزانو او نورو معامِلو دپاره اِمامانو او ليويانو ته کوم اصُول ښودلى وُو هغه پوره پوره سر ته رسېدلى وُو.

¹⁶په هغه وخت کښې د سليمان ټول کارونه پوره شول. د مالِک خُدائ د کور د بُنياد نه واخله تر سر ته رسولو پورې د هغۀ ټول کارونه په صحيح طريقې سره سر ته ورسېدل.

¹⁷سليمان عصيون جابر او ايلوت ته لاړو، دا د ادوم په علاقه کښې د بحرِقُلزم په غاړه د سمندرى جهازونو ځايُونه دى.

¹⁸حيرام بادشاه د خپلو آفسرانو او د تجربه‌کاره کشتو چلاونکو د مشرۍ لاندې هغۀ له سمندرى جهازُونه ولېږل. هغوئ د سليمان د آفسرانو سره د اوفير مُلک ته جهازُونه بوتلل او سليمان له يې د پينځلسو زرو کيلو نه زيات سرۀ زر راوړل.