Read Pashto (Nangahari) — د پښتو مقدس کتاب عزرا 10 Bible Online

عزرا 10 - Pashto (Nangahari) — د پښتو مقدس کتاب bible

عزرا 10

¹کله چې عزرا د خُدائ پاک د کور په مخکښې پړمخې پريوتو، نو هغۀ ژړل او د ګناهونو اِقرار يې کولو، د بنى اِسرائيلو يوه لويه ډله د هغۀ نه راتاو وه چې په کښې سړى، ښځې او ماشومان شامِل وُو او بد بد يې ژړل.

²د عيلام ډلې د يحى ايل زوئ سکانياه عزرا ته ووئيل، ”د غېرو قومونو د ښځو سره ودونه کولو په وجه مونږ د خُدائ پاک سره بې وفائى کړې ده، خو بيا هم د بنى اِسرائيلو دپاره اُميد شته،

³نو چې اوس مونږ د خپل خُدائ پاک سره دا تړون وکړُو چې مونږ به دا ښځې طلاقې کړُو او سره د ماشومانو به يې وشړُو. مونږ به هغسې وکړُو چې څنګه تۀ او هغه نور کسان مشوره راکړى چې کوم د خُدائ پاک د حُکمونو درناوے کوى. چې د خُدائ پاک قانون څۀ مطالبه کوى نو مونږ به هغسې کوُو.

⁴اوس پاڅه، دا خبره ستا په لاس کښې ده. مونږ به ستا ملګرتياکوُو، نو تکړه شه او دا کار وکړه.“

⁵عزرا پاڅېدو او د اِمامانو د مشرانو، ليويانو او د ټولو بنى اِسرائيلو نه يې دا قسم واخستلو چې هغوئ به د سکانياه په مشوره باندې عمل کوى. نو داسې هغوئ قسم وکړو.

⁶بيا هغه د خُدائ پاک د کور د مخې نه لاړو او د الِياسب زوئ يهوحنان کوټې ته ورننوتلو، هلته يې شپه تېره کړه او د جلاوطنۍ خلقو په بې وفائۍ يې خفګان کولو. او په دې وجه يې خوراک څښاک نۀ کولو.

⁷ټول يروشلم او يهوداه ته يو پېغام ولېږلے شو چې هغه ټول خلق دې په يروشلم کښې راغونډ شى چې کوم د جلاوطنۍ نه راواپس شوى دى

⁸دا د خلقو د مشرانو حُکم وو. که څوک په دريو ورځو کښې رانۀ غلو، نو د هغۀ ټول جائيداد به ضبط کړے شى او نور به دا حق نۀ لرى چې هغه د جلاوطنو د ډلې نه وګڼلے شى.

⁹په دريو ورځو کښې، د نهمې مياشتې په شلمه ورځ، هغه ټول سړى يروشلم ته راغلل کوم چې د يهوداه او بنيامين په علاقه کښې اوسېدل او د خُدائ پاک د کور د جرګې په ځائ کښې راغونډ شول. او په هغه وخت کښې دروند باران ورېدلو، د باران او د دې مسئلې په وجه هر يو کس رپېدو.

¹⁰عزرا اِمام ودرېدو او هغوئ ته يې ووئيل، ”تاسو بې وفا وئ او د غېرو قومونو د ښځو سره د ودونو په وجه مو بنى اِسرائيليان ګناهګار کړى دى.

¹¹نو اوس مالِک خُدائ د خپل پلار نيکۀ خُدائ پاک ته د خپلو ګناهونو اِقرار وکړئ او هغه کار کوئ چې هغه پرې رضا کېږى. د پردى مُلک د هغه خلقو نه خپل ځانونه جدا کړئ چې کوم زمونږ په مُلک کښې اوسېږى او د غېرو قومونو د ښځو نه ځان خلاص کړئ.“

¹²نو ټولې ګڼې په جواب کښې چغه کړه، ”تۀ صحيح خبره کوې او چې څۀ وايې نو مونږ به هغه هر څۀ وکړُو.“

¹³خو هغوئ دا هم ووئيل، ”ګڼه ډېره لويه ده او دا د باران موسم دے. مونږ دلته په داسې کولاو ځائ کښې نۀ شو ودرېدلے. دا داسې کار نۀ دے چې په يو دوو ورځو کښې وشى، ځکه چې په دې ګناه کښې زمونږ ډېر کسان شامِل دى.

¹⁴زمونږ آفسران دې زمونږ ټولو په ځائ کار وکړى. بيا هغه هر يو دې چې د غېر قوم ښځه لرى هغه دې په يو مقرر وخت باندې د مشرانو او د خپل ښار د قاضيانو سره راشى. نو د دې معاملې په باره کښې به د خُدائ پاک قهر سوړ شى.“

¹⁵صرف د عساهيل زوئ يُونتن، د تِقوه زوئ يحزياه د دې منصُوبې مخالفت وکړو، مسلام او يو ليوى سبتى ورسره په دې کښې ملګرى وو.

¹⁶د جلاوطنۍ نه راواپس شوو کسانو دا منصُوبه منظُوره کړه، نو عزرا اِمام د ډلو د مشرانو نه سړى مقرر کړل او د هغوئ نومونه يې وليکل. د لسمې مياشتې په وړومبۍ ورځ هغوئ تفتيش شروع کړو،

¹⁷او په ورپسې دريو مياشتو کښې هغوئ د هغه ټولو معامِلو معلومات وکړو چې کومو سړو د غېرو قومونو د ښځو سره ودونه کړى وُو.

¹⁸دا د هغه سړو نومونه دى چا چې د غېرو قومونو ښځې کړې وې: د هغه اِمامانو نومونه د ډلې په حِساب سره ليکلے شوى دى: د يشوَع ډله او د هغۀ د وروڼو چې د يوصدق زامن وُو: معسياه، اِلعازر، يريب او جدلياه.

¹⁹هغوئ دا قسم وکړو چې خپلو ښځو له به طلاق ورکړى او د خپلو ګناهونو دپاره يې د يو ګډ نذرانه پېش کړه.

²⁰د اِمير ډله: حنانى او زبدياه،

²¹د حارِم ډله: معسياه، الياس، سمعياه، يحى ايل او عُزياه،

²²د پشحور ډله: اليوعينى، معسياه، اِسمٰعيل، نتانى ايل، يوزباد او العسه،

²³ليويان: يوزباد، سِمعى، قلاياه (چې قليتاه هم بللے شو)، فتحياه، يهوداه او اِلعازر

²⁴موسيقار: الِياسب، د خُدائ پاک د کور څوکيداران: سلوم، طلم او اورى،

²⁵نور کسان: د پرعوس ډله: رمياه، يزياه، مُلکياه، ميامين، اِلعازار، مُلکياه او بناياه.

²⁶د عيلام ډله: متنياه، زکرياه، يحى ايل، عبدى، يريموت او الياس،

²⁷د زتُو ډله: اليوعينى، الِياسب، متنياه، يريموت، زاباد او عزيزا،

²⁸د ببى ډله: يهوحنان، حنانياه، زبى، عتلياه،

²⁹د بانى ډله: مسلام، ملوک، عداياه، يسوب، سيال او يريموت،

³⁰د پخت موآب ډله: عدنا، کُلال، بناياه، معسياه، متنياه، بضلى‌اېل، بِنوئى او منسى،

³¹۳۱‏-۳۲ د حارِم ډله: اِلعازر، ايشياه، مُلکياه، سمعياه، شمعون، بنيامين، ملوک او سمرياه،

³³د حاشوم ډله: متنياه، متتاه، زاباد، اليفلط، يريمى، منسى او سِمعى.

³⁴۳۴‏-۳۷ د بانى ډله: معدى، عُمرام، اُواېل، بناياه، بدياه، کلوه، ونياه، مريموت، الِياسب، متنياه، متنى، يعسو،

³⁸۳۸‏-۴۲ د بِنوئى ډله: سِمعى، سلمياه، ناتن، عداياه، مکندبى، ساسى، شارۍ، عزراېل، سلمياه، سمرياه، سلوم، امرياه او يوسف،

⁴³د نبو ډله: يعى ايل، متتياه، زاباد، زبينا، يدو، يوئيل او بناياه،

⁴⁴دې هر يو سړى د غېرو قومونو ښځې لرلې او د څۀ سړو د دې ښځو نه بچى هم پېدا شوى وُو.