Read Pashto (Nangahari) — د پښتو مقدس کتاب عزرا 8 Bible Online

عزرا 8 - Pashto (Nangahari) — د پښتو مقدس کتاب bible

عزرا 8

¹دا د هغه ډلو د مشرانو تفصيل دے کوم چې په بابل کښې جلاوطن وُو او چې هغوئ د عزرا سره په هغه وخت کښې يروشلم ته راواپس شول چې په کوم وخت کښې ارتخششتا بادشاه وُو:

²۲‏-۱۴ د فينحاس د ډلې جيرسوم، د اِتمر د ډلې دانيال، د داؤد د ډلې د سکانياه زوئ حطوش، د پرعوس د ډلې زکرياه، چې د خپلې ډلې يو نيم سل سړى ورسره وُو. د هغوئ د پلار نيکۀ نسب‌نامه موجود وه، د پخت موآب د ډلې د زراحياه زوئ اليهوعينى، چې دوه سوه سړى ورسره وُو، د زتُو د ډلې، د يحزى ايل زوئ سکانياه چې درې سوه سړى ورسره وُو، د عدين د ډلې د يُونتن زوئ عبيد، چې پنځوس سړى ورسره وُو، د عيلام د ډلې د عتلياه زوئ يشعياه، چې اويا سړى ورسره وُو، د سفطياه د ډلې د ميکائيل زوئ زبدياه، چې اتيا سړى ورسره وُو، د يوآب د ډلې د يحى ايل زوئ عبدياه، چې دوه سوه او اتلس سړى ورسره وُو، د بانى د ډلې د يوسفياه زوئ سلوميت، چې يو سل او شپېته سړى ورسره وُو، د ببى د ډلې د ببى زوئ زکرياه، چې اتۀ‌ويشت سړى ورسره وُو، د عزجاد د ډلې د حقاطان زوئ يوحانان، چې يو سل او لس سړى ورسره وُو، د ادونِقام د ډلې اليفلط، يعواېل او سمعياه، چې شپېتۀ سړى ورسره وُو هغوئ په وروستو وخت کښې راواپس شول، د بِګوئ د ډلې عوتى او زکور، چې اويا سړى ورسره وُو، د عزرا د خُدائ پاک کور دپاره د ليويانو لېږل،

¹⁵ما د هغه نِهر سره ټوله ډله راغونډه کړه کوم چې د اهاوا ښار ته بهېږى او مونږ هلته درې ورځې خېمې لګولې وې. ما وليدل چې هلته په ډله کښې اِمامان وُو، خو ليويان نۀ وُو.

¹⁶نو ما دا نهۀ مشران راوغوښتل: اِلعازر، ارى ايل، سمعياه، الناتن، يريب، الناتن، ناتن، زکرياه او مسلام او دوه عالمان يويريب او الناتن مې هم راوغوښتل.

¹⁷ما هغوئ په کسيفيا کښې د ډلې مشر عدو ته ولېږل، چې هغۀ او د هغۀ د ډلې نه د خُدائ پاک د کور دپاره کاريګر وغواړى او مونږ له داسې خلق راولېږى چې د خُدائ پاک په کور کښې خِدمت وکړى.

¹⁸د خُدائ پاک په فضل سره هغوئ مونږ له يو تکړه سړے سربيا راولېږلو، چې دې د محلى د ډلې ليوے وو او اتلس زامن او وروڼه د هغۀ سره راغلل.

¹⁹هغوئ د مرارى ډلې حسبياه او يشعياه هم د هغوئ د شلو خپلوانو سره راولېږل.

²⁰د دې نه علاوه د خُدائ پاک د کور دوه سوه او شل داسې خِدمتګاران هم وُو چې داؤد بادشاه او د هغۀ آفسرانو د هغوئ پلار نيکۀ د دې دپاره مقرر کړى وُو چې د ليويانو مدد کوى. او د هغوئ ټولو نومونه ليکلے شوى وُو.

²¹هلته د اهاوا نِهر سره ما ټولو له دا حُکم ورکړو چې روژه ونيسئ او د خپل خُدائ پاک په وړاندې خپل ځانونه عاجزان کړئ او هغۀ ته سوال وکړئ چې په سفر کښې زمونږ مدد وکړى او زمونږ، زمونږ د بچو او زمونږ د مال دولت حِفاظت وکړى.

²²زۀ په دې باندې شرمېدلم چې د بادشاه نه مې يو لښکر او په اسونو سوارۀ فوجيان غوښتى وے چې زمونږ د سفر په دوران کښې د دشمنانو نه زمونږ حِفاظت وکړى، ځکه چې ما هغۀ ته وئيلى وُو چې زمونږ خُدائ هغه هر چا له برکت ورکوى چې څوک ورباندې ايمان لرى، خو هر څوک چې د هغۀ نه واوړى نو د هغوئ نه خفه کېږى او سزا ورکوى.

²³نو مونږ روژه ونيوله او خُدائ پاک ته مو سوال وکړو چې زمونږ حِفاظت وکړى او هغۀ زمونږ سوال قبول کړو.

²⁴د مشرانو اِمامانو نه ما سربيا، حسبياه او لس نور کسان خوښ کړل.

²⁵بيا ما هغه سپين زر، سرۀ زر او لوښى وتلل کوم چې بادشاه، د هغۀ مشيرانو او د هغۀ آفسرانو او بنى اِسرائيلو د دې دپاره راکړى وُو چې د خُدائ پاک په کور کښې اِستعمال شى او ما دا اِمامانو له ورکړل.

²⁶۲۶‏-۲۷ ما دا څيزُونه هغوئ له ورکړل: دوويشت ټنه سپين زر، سل د سپينو زرو لوښى چې د دې ټول وزن اويا کيلو وو، درې زره او څلور سوه کيلو سرۀ زر، شل د سرو زرو جامونه چې تقريباً اتۀ نيم کيلو وُو، دوه د زېړو ښائسته جامونه، چې په قيمت کښې د سرو زرو د جامونو برابر وُو،

²⁸ما اِمامانو ته ووئيل، ”تاسو مالِک خُدائ ستاسو د پلار نيکۀ خُدائ پاک ته وقف او مقدس شوى يئ او داسې هغه ټول سپين زر، سرۀ زر او لوښى هم ستاسو په شان مقدس دى کوم چې هغۀ ته د رضاکارانه نذرانو په توګه راوړے شوى دى.

²⁹د خُدائ پاک کور ته تر رسېدو پورې د دې ښۀ حِفاظت وکړئ. هلته د اِمامانو په کوټه کښې دا وتلئ او د اِمامانو او ليويانو او په يروشلم کښې د بنى اِسرائيلو مشرانو ته يې حواله کړئ.“

³⁰نو اِمامانو او ليويانو د هغه سپينو زرو، سرو زرو او د لوښو ذِمه وارى واخستله او په يروشلم کښې يې د مالِک خُدائ کور ته يوړل.

³¹دا د اولې مياشتې دولسمه ورځ وه چې مونږ يروشلم ته د تلو دپاره د اهاوا نِهر نه روان شوُو. زمونږ خُدائ پاک مل وو او چې مونږ سفر کولو نو مونږ يې د دشمن د حملو نه او د ډاکوانو نه بچ کولو.

³²کله چې مونږ يروشلم ته ورسېدو، نو مونږ درې ورځې آرام وکړو.

³³او بيا په څلورمه ورځ مونږ د خُدائ پاک کور ته لاړُو او هغه سپين زر، سرۀ زر او لوښى مو وتلل او د اورِياه زوئ مريموت اِمام ته مو حواله کړل. د هغوئ سره اِلعازر، د فينحاس زوئ او دوه ليويان، د يوشع زوئ يوزباد او د بِنوئى زوئ نوعيدياه هم وو.

³⁴هر يو څيز وشمېرلے شو او تللے شو او په هغه وخت پوره حِساب کِتاب وشو.

³⁵بيا هغه ټولو خلقو نذرانې راوړې کوم چې د جلاوطنۍ نه راغلى وُو چې د بنى اِسرائيلو خُدائ پاک ته د قربانۍ په توګه وسوزولے شى. هغوئ د ټولو بنى اِسرائيلو دپاره دولس غوَيى، څلور کم سل ګډان، اووۀ اويا ګډُورى پېش کړل، هغوئ دولس چيلى هم پېش کړل چې خپل ځانونه د ګناه نه پاک کړى. دا ټول ځناور مالِک خُدائ ته د قربانۍ په توګه وسوزولے شول.

³⁶هغوئ هغه ليکلے شوے فرمان هم راوخستلو کوم چې بادشاه ورکړے وو او هغه يې حُکمرانانو او د نمرپرېواتۀ طرف فرات ته د صُوبې آفسرانو له ورکړو، چې هغوئ بيا د هغه خلقو سره او د خُدائ پاک د کور سره مدد وکړو.