Read Pashto (Nangahari) — د پښتو مقدس کتاب نحمياه 1 Bible Online

نحمياه 1 - Pashto (Nangahari) — د پښتو مقدس کتاب bible

نحمياه 1

¹دا د حکلياه د زوئ د نحمياه کلام دے: کله چې ارتخششتا د فارس بادشاه وو نو د هغۀ د بادشاهۍ په شلم کال د کِسليو په مياشت کښې زۀ يعنىې نحمياه په مرکزى ښار سوسه کښې وم.

²زما ورور حنانى د يهوداه د يو څو سړو سره راورسېدو او ما د هغوئ نه د يروشلم او د هغه يهُوديانو په باره کښې تپوس وکړو کوم چې د بابل د جلاوطنۍ نه راوپس شوى وُو.

³هغوئ ما ته ووئيل چې کوم کسان د جلاوطنۍ نه بچ شوى وُو او د يهوداه صُوبې ته واپس راغلى وُو هغوئ د لوئ تکليف او بې‌عزتۍ سره مخ وُو. هغوئ ما ته دا هم ووئيل چې د يروشلم دېوالونه تر اوسه پورې مات پراتۀ دى او د دې دروازې د هغه وخت نه بيا نۀ دى جوړې شوې چې د کوم وخت نه هغه په اور سوزولے شوې وې.

⁴کله چې زۀ د دې هر څۀ نه خبر شوم، نو زۀ کښېناستم او ومې ژړل. څو ورځې زۀ غمژن وم او خوراک مې نۀ کولو. ما د آسمان خُدائ پاک ته سوال وکړو.

⁵بيا ما خُدائ پاک ته ووئيل، ”اے مالِکه خُدايه، د آسمان خُدايه پاکه! اے عظيمه او د رُعب خُدايه پاکه، تۀ د هغه چا سره خپل د رحم تړون پوره کوې چې څوک درسره مينه کوى او ستا حُکمونه منى،

⁶مالِکه خُدايه! ما ته وګوره او زما سوال واوره، لکه څنګه چې زۀ ستا د خِدمت‌ګارانو يعنې بنى اِسرائيلو دپاره شپه او ورځ دعا کوم. زۀ دا اِقرار کوم چې مونږ بنى اِسرائيلو ګناه کړې ده. ما او زما پلار نيکۀ ګناه کړې ده.

⁷مونږ ستا خِلاف بدعملې کړې ده او تا چې څۀ حُکم کړے وو په هغې مو عمل نۀ دے کړے. تا چې د خپل خِدمت‌ګار موسىٰ په ذريعه کوم قانون مونږ له راکړے وو په هغې مو عمل نۀ دے کړے.

⁸تۀ اوس هغه څۀ راياد کړه چې خپل خِدمت کوُونکى موسىٰ ته دې وئيلى وُو چې که تاسو بنى اِسرائيلو زما سره بې وفائى وکړه، نو زۀ به تاسو په نورو قومونو کښې خوارۀ وارۀ کړم.

⁹خو که بيا تاسو ما ته راوګرځېدئ او زما په حُکمونو عمل کوئ، نو زۀ به تاسو واپس هغه ځائ ته راولم کوم ځائ چې ما د خپل نوم د درناوى دپاره خوښ کړے دے، که تاسو د دنيا د يو سر نه تر بل سر پورې هم خوارۀ وارۀ يئ.

¹⁰مالِکه خُدايه! دا ستا خِدمت‌ګاران او ستا خپل خلق دى. تا هغوئ د خپل لوئ طاقت او قُوت سره په بيعه آزاد کړل.

¹¹مالِکه خُدايه! اوس زما سوال واوره او د خپلو نورو ټولو خِدمت‌ګارانو دعاګانې واوره چې چا ته ستا د نوم په درناوى کولو کښې خوشحالى ملاوېږى. او ماله کاميابى راکړه او داسې بادشاه نن په ما مِهربانه کړه. د هغۀ په زړۀ کښې دا خبره واچوه چې په ما رحم وکړى.“ په هغه وخت کښې زۀ د بادشاه ساقى وم.