Read Pashto (Nangahari) — د پښتو مقدس کتاب نحمياه 10 Bible Online

نحمياه 10 - Pashto (Nangahari) — د پښتو مقدس کتاب bible

نحمياه 10

¹کومو کسانو چې دستخطُونه وکړل هغوئ دا وُو: د حکلياه زوئ نحمياه حُکمران. صدقياه،

²۲‏-۸ شراياه، عزرياه، يرمياه، پشحور، امرياه، مُلکياه، حطوش، شبيناه، ملوک، حارِم، مريموت، عبدياه، دانيال، جِنتون، باروک، مسلام، ابياه، ميامين، معزياه، بِلجى او سمعياه.

⁹۹‏-۱۳ ليويان: د ازنياه زوئ يشوَع، د حنداد د ډلې بِنوئى، قدمى اېل، شبيناه، هودياه، قليتاه، فلاياه، حنان، ميکا، رِحوب، حسبياه، زکور، سربياه، شبنياه، هودياه، بانى او بنينو.

¹⁴۱۴‏-۲۷ د خلقو مشران: پرعوس، پخت موآب، عيلام، زتُو، بانى، بُنى، عزجاد، ببى، ادونياه، بِګوئ، عدين، اطير، حزقياه، عزُور، هودياه، حاشوم، بضى، خاريف، عنتوت، نوبى، مګفيعاس، مسلام، حزير، مشيزبيل، صدوق، يدوع، فلطياه، حنان، عناياه، هوسيع، حنانياه، حسوب، هلوحيس، فليحا، سوبيق، رحُوم، حسبناه، معسياه، اخياه، حنان، عنان، ملوک، حارِم او بعنه.

²⁸مونږ يعنې بنى اِسرائيلو، اِمامانو، ليويانو، څوکيدارانو، سندرغاړو، د خُدائ پاک د کور کاريګرانو او هغه نورو ټولو خلقو د خُدائ پاک د قانون د تابعدارۍ په بُنياد خپل ځانونه د پردى مُلک د هغه خلقو نه جدا کړى وُو کوم چې زمونږ په مُلک کښې اوسېدل. مونږ د خپلو ښځو او د هغه ټولو بچو سره د کومو عُمر چې پوهېدو ته رسېدلے وو،

²⁹مونږ د خپلو مشرانو سره په يو قسم کولو کښې شريک شوُو او ومو وئيل چې مونږ که قسم مات کړو نو په مونږ دې لعنت وى او دا چې مونږ به د خُدائ پاک د قانون په مطابق خپل ژوند تېروُو. هم هغه قانون کوم چې خُدائ پاک د خپل خِدمت کوُونکى موسىٰ په ذريعه راکړے وو، چې مونږ به هغه هر څۀ منو چې مالِک خُدائ زمونږ خُدائ پاک يې حُکم راکوى، او چې مونږ به د هغۀ ټول قانون او اصُول منو.

³⁰مونږ دا وعده وکړه چې د هغه مُلک د غېرو قومونو خلقو له به خپلې لوڼه نۀ ورکوُو او د هغوئ لوڼه به خپلو زامنو ته نۀ وادۀ کوُو.

³¹که د پردى مُلک خلق څۀ غله يا بل هر څيز هم د سبت يا په بله هره مقدسه ورځ په مونږ باندې د خرڅولو دپاره راوړى، نو مونږ به يې د هغوئ نه نۀ اخلو. په هر اوؤم کال به مونږ زمکه نۀ کرو او ټول قرضُونه به معاف کوُو.

³²زمونږ هر يو کس به هر کال پينځۀ ګرامه سپين زر د خُدائ پاک د کور د خرچې دپاره په چنده کښې ورکوى.

³³مونږ به د خُدائ پاک د کور د عِبادت دپاره د دې څيزُونو بندوبست کوُو: مقدسه روټۍ، د هرې ورځې د غلې نذرانه، هغه ځناور چې هره ورځ د قربانۍ په توګه سوزولے شى، د سبت د ورځو، د نوې مياشتې د اختر او د نورو اخترونو دپاره مقدسې نذرانې، د بنى اِسرائيلو د ګناه کفارې دپاره نذرانې او هغه بل هر يو څيز چې د خُدائ پاک په کور کښې يې ضرورت وى.

³⁴زمونږ خلق، اِمامان او ليويان به هر کال پچه اچوى چې دا معلومه کړى چې کومه يوه ډله د مالِک خُدائ زمونږ خُدائ پاک په قربان ګاه باندې د سوزولو دپاره لرګو بندوبست کوى او دا به د قانون په مطابق وى.

³⁵مونږ به هر کال د خپل وړومبى رېبلے شوى فصل او زمونږ په ونو کښې د وړومبى پېدا شوې مېوې يوه نذرانه د خُدائ پاک کور ته وړُو.

³⁶زمونږ د هر يو کس وړومبے پېدا شوے زوئ به اِمامانو له د خُدائ پاک کور ته بوځُو او هلته به يې د خُدائ پاک د ښودلى شوى قانون په مطابق خُدائ پاک ته وقف کېږى. زمونږ د هر يو کس د غواګانو وړومبے پېدا شوے سخے او زمونږ د هر يو کس وړومبے پېدا شوے ګډُورے يا د چېلۍ بچے به هم وقف کېږى.

³⁷مونږ به هر کال اِمامانو له د خُدائ پاک کور ته د وړومبى رېبلى شوى فصل نه جوړې شوې پېړى او د انګورو د شرابو خپلې نورې نذرانې، د زيتُونو تېل او هر قِسم مېوې هم وړُو. اؤ مونږ به هغه هر څۀ نه لسمه حصه ليويانو له راؤړو څۀ چې زمونږ په پټو کښې شوى دى، ځکه چې دا هغوئ زمونږ په کلو کښې اخلى.

³⁸کله چې لسمه حصه راټولولے شى نو د هارون د اولاد اِمامان به د ليويانو سره وى. او د هغه ټولى راټولى شوى لمسى حصې نه به ليويان لسمه حصه د خُدائ پاک د کور ګودامونو ته يوسى.

³⁹بنى اِسرائيل او ليويان به د فصل، انګورو شرابو او د زيتُونو تېلو برخې هغه ګودامونو ته يوسى چرته چې د خُدائ پاک د کور سامان کېښودلے شى او چرته چې اِمامان، د دروازو څوکيداران او سندرغاړى حاضر وى. مونږ به زمونږ د خُدائ پاک د کور نه مخ نۀ اړوُو.