Read Pashto (Nangahari) — د پښتو مقدس کتاب نحمياه 11 Bible Online

نحمياه 11 - Pashto (Nangahari) — د پښتو مقدس کتاب bible

نحمياه 11

¹مشران په يروشلم کښې دېره شول او باقى خلقو پچه واچوله چې د هرې لسمې کورنۍ نه يوه کورنۍ خوښه کړى چې لاړ شى او د يروشلم په مقدس ښار کښې اوسېږى، خو هغه نور په خپلو ښارونو کښې اوسېدل.

²خلقو د هغه ټولو خلقو دپاره برکت وغوښتو چې کوم په رضاکارانه توګه په يروشلم کښې اوسېدل.

³د يهوداه په ښارونو کښې بنى اِسرائيل، اِمامان، ليويان، د خُدائ پاک د کور کاريګران او د سليمان د نوکرانو اولاد په خپلو ښارونو کښې په خپلو جائيدادونو کښې اوسېدل. دا د يهوداه صُوبې د مشرانو ښاريانو تفصيل دے کوم چې په يروشلم کښې اوسېدل:

⁴د يهوداه قبيلې کسان دا دى: د زکرياه نمسے او د عُزياه زوئ عتاياه. د هغۀ په آباواجداد کښې امرياه، سفطياه او مهلل اېل شامِل وُو، چې د يهوداه زوئ د فارص اولاد وو.

⁵او هم د کولحوزه نمسے او د باروک زوئ معسياه. د هغۀ په آباواجداد کښې حزاياه، عداياه، يويريب او زکرياه شامِل وُو، چې د يهوداه د زوئ سِلح اولاد وو.

⁶د فارص د اولاد څلور سوه او اتۀ شپېته ښۀ تکړه سړى په يروشلم کښې اوسېدل.

⁷د بنيامين د قبيلې کسان دا دى: د يوئيد نمسے او د مسلام زوئ سلو وو. د هغۀ په نورو پلارانو نيکُونو کښې فداياه، قولاياه، معسياه، ايتى اېل او يشعياه شامِل وُو.

⁸د سلو نزدې خپلوان جبى او سلى وو. ټول نهۀ سوه او اتۀ‌ويشت بنيامينيان په يروشلم کښې اوسېدل.

⁹د زکرى زوئ يوئيل د هغوئ مشر وو، د هسينوآه زوئ يهوداه په ښار کښې دويم مشر آفسر وو.

¹⁰اِمامان: د يويريب زوئ يدعياه او يکين.

¹¹شراياه زوئ د خِلقياه زوئ د مسلام زوئ د صدوق زوئ د مريموت زوئ د اخيطوب. شراياه د خُدائ پاک د کور مشر اِمام وو.

¹²د دې ډلې ټولو اتۀ سوه او دوويشتو کسانو د خُدائ پاک په کور کښې خِدمت کولو. د فلاياه نمسے او د يروحام زوئ عداياه. د هغۀ په آباواجداد کښې امصى، زکرياه، فشحُور او مُلکياه شامِل وُو.

¹³د هغۀ د ډلې ټول دوه سوه او دوه څلوېښت کسان د کورَنو مشران وُو. د اخزائى نمسے او د عزراېل زوئ امشى. د هغۀ په آباواجداد کښې اِمير، مسلموت شامِل وُو.

¹⁴د هغۀ د ډلې يو سل او اتۀ‌ويشت کسان ښۀ تکړه فوجيان وُو. د هغوئ مشر زبدى اېل وو چې د هجدوليم زوئ وو.

¹⁵ليويان: د عزريقام نمسے او د حسوب زوئ سمعياه. د هغۀ په آباواجداد کښې حسبياه او بُنى شامِل وُو.

¹⁶سبتى او يوزباد، د خُدائ پاک د کور نه د بهر کار مشران وُو.

¹⁷د زبدى نمسے او د ميکا زوئ متنياه چې د آسف د اولاد نه وو. هغۀ د خُدائ پاک په کور کښې د عبادت په وخت کښې د حمد و ثناء رهنمائى کوله. او ببوق په متنياه پسې دويم سړ‌ے وو. د جلان نمسے او د سموع زوئ عبدا د يدتون د اولاد نه وو.

¹⁸د يروشلم په مقدس ښار کښې دوه سوه او څلور اتيا ليويان اوسېدل.

¹⁹د خُدائ پاک د کور څوکيداران: عقوب، طلمون او د هغوئ خپلوان، ټول يو سل او دوه اويا کسان وُو.

²⁰نور بنى اِسرائيليان او پاتې اِمامان او ليويان د يهوداه په ښارونو کښې په خپلو خپلو جائيدادونو کښې اوسېدل.

²¹د خُدائ پاک د کور کاريګران د يروشلم په هغه برخه کښې اوسېدل چې نوم يې عوفل وو او هغوئ د ضيحا او جِسفا د مشرۍ لاندې کار کولو.

²²د ليويانو هغه مشر چې په يروشلم کښې اوسېدو هغه د حسبياه نمسے او د بانى زوئ عُزى وو. د هغۀ په پلارانو نيکُونوکښې متنياه او ميکا شامِل وُو او هغه د آسف د ډلې نه وو. دا هغه ډله وه چې د دې کسان د خُدائ پاک په کور کښې د موسيقۍ ذِمه وار وُو.

²³د دې دپاره شاهى اصُول مقرر وُو چې ډلې به هره ورځ د خُدائ پاک د کور په موسيقۍ کښې مشرى څنګه کوى.

²⁴د يهوداه قبيلې د زارح د ډلې د مشيز بابل زوئ فتحياه د فارس په دربار کښې د بنى اِسرائيلو نمائندګى کوله.

²⁵ډېر خلق د خپلو پټو سره نزدې په کلو کښې اوسېدل. څۀ کسان چې د يهوداه د قبيلې وُو نو هغوئ په قريت اربع، ديبون، يقبضى‌اېل او د دې ښارونو سره نزدې کلو کښې اوسېدل.

²⁶هغوئ د يشوَع، مولاده او بيت فِلِط په ښارونو کښې هم اوسېدل،

²⁷او داسې په حصار سعول، بير سبع او د دې نه ګېرچاپېره کلو کښې هم اوسېدل.

²⁸هغوئ د صِقلاج په ښار کښې، مقوناه او د دې نه ګېرچاپېره کلو کښې،

²⁹په عين رِمون، صُرعا، يرموت،

³⁰په زنوح، عدولام او نزدې کلو کښې اوسېدل. هغوئ په لکيس او په نزدې پټو کښې او په عزيقه او د دې په کلو کښې اوسېدل. نو د يهوداه خلق د بېر سبع نه واخله د هنوم مېدان پورې اوسېدل.

³¹د بنيامين قبيلې خلق په دې ځايُونو کښې اوسېدل: جبعه، مِکماس، عى، بيت‌اېل او د دې نزدې کلو کښې،

³²په عنتوت، نوب، عننياه،

³³حصور، راما، جيتم،

³⁴حاديد، صبوئيم، نبلا‌ط،

³⁵لد، اُونو او په هغه وادۍ کښې چې چرته کاريګر اوسېدل.

³⁶د ليويانو څۀ ډلې کومې چې د يهوداه په علاقه کښې اوسېدلې وې هغوئ د بنيامين د خلقو سره دېره شول.