Read Pashto (Nangahari) — د پښتو مقدس کتاب نحمياه 3 Bible Online

نحمياه 3 - Pashto (Nangahari) — د پښتو مقدس کتاب bible

نحمياه 3

¹بيا مشر اِمام اِلياسب او د هغۀ ملګرو اِمامانو د ګډو دروازه بيا جوړه کړه، وقف يې کړه او دروازې يې په خپل ځائ ولګولې. هغوئ د سلو مينارو پورې دېوالونه او د حنن اېل ميناره وقف کړه.

²د يريحو خلقو ورپسې برخه جوړه کړه. د اِمرى زوئ زکور بله برخه جوړه کړه.

³د هسناه ډلې د کبانو دروازه جوړه کړه. هغوئ تيرونه او دروازې په خپل ځائ باندې ولګولې، د دروازې د تالا کولو دپاره يې سيخُونه او زنځيرونه ولګول.

⁴د اورِياه زوئ او د هقوض نمسى مريموت ورپسې برخه جوړه کړه. د برکياه زوئ او د مشيزبيل نمسى مسلام ورپسې برخه جوړه کړه. د بعنه زوئ صدوق بله برخه جوړه کړه.

⁵د تقوع سړو ورپسې برخه جوړه کړه، خو د هغوئ مشرانو د هغه کار کولو نه اِنکار وکړو کوم کار چې هغوئ ته خپلو ټهيکدارانو حواله کړے وو.

⁶د فاسح زوئ يويدع او دبسودياه زوئ مسلام د يسانه دروازه بيا جوړه کړه. هغوئ تيرونه او دروازې په خپلو ځايُونو کښې ولګول او د تالا کولو دپاره يې سيخُونه او زنځيرونه په دروازه کښې ولګول.

⁷د جبعون ملطياه، د مرونوت يدون او د جبعون او مصفاه سړو ورپسې برخه جوړه کړه او داسې د نمرپرېواتۀ طرف ته فرات د حُکمران کور پورې حِصه يې هم جوړه کړه.

⁸د حرهياه زوئ عُزئيل زرګر ورپسې برخه جوړه کړه. حنانياه عطر جوړوُونکى ورپسې برخه جوړه کړه، چې د پلن دېوال پورې حِصه وه.

⁹د يروشلم د نيمې ضِلعې حُکمران د حُور زوئ رفاياه ورپسې برخه جوړه کړه.

¹⁰د حرومف زوئ يدعياه ورپسې برخه جوړه کړه، کومه چې د هغۀ د خپل کور سره نزدې وه. د حسبنياه زوئ حطوش ورپسې برخه جوړه کړه.

¹¹د حارِم زوئ مُلکياه او د پخت موآب زوئ حسوب دوئ دواړو ورپسې برخه او د تنور ميناره يې جوړه کړه.

¹²د يروشلم د نورې نيمې ضِلعې حُکمران يعنې هلوحيس زوئ سلوم ورپسې برخه جوړه کړه. د هغۀ لوڼو په دې کار کښې د هغۀ مدد کولو.

¹³حنون او د زنوح ښار اوسېدونکو د وادۍ دروازه بيا جوړه کړه. هغوئ هغه دروازې په خپلو خپلو ځايُونو باندې ولګولې، هغوئ د دروازې تالا کولو دپاره په دې کښې سيخُونه او زنځيرونه ولګول او د ګند دروازې پورې هغوئ پينځۀ سوه ګزه دېوال بيا جوړ کړو.

¹⁴د بيت هکرم ضِلعې حُکمران د ريکاب زوئ مُلکياه د ګند دروازه بيا جوړه کړه. هغۀ دروازې په خپلو ځايُونو باندې ولګولې او د دروازې تالا کولو دپاره يې په کښې سيخُونه او زنځيرونه ولګول.

¹⁵د مصفاه ضِلعې حُکمران د کولحوزه زوئ سلوم د فوارې دروازه بيا جوړه کړه. هغۀ د دروازې دپاسه چت جوړ کړو، دروازې يې په خپل ځائ باندې ولګولې او سيخُونه او زنځيرونه يې په کښې ولګول. د سِلح تالاب سره د شاهى باغ سره نزدې هغۀ دېوال جوړ کړو، دا تر هغه ځائ پورې وو چرته چې د داؤد د ښار نه لاندې پوړۍ کُوزې شوې وې.

¹⁶د بيت صور د نيمې ضِلعې حُکمران د عُزيق زوئ نحمياه ورپسې برخه جوړه کړه، چې دا د داؤد د خاندان د قبرستان، تالاب او د فوجيانو کورونو پورې وه.

¹⁷دې ليويانو د هغه دېوال نورې ډېرې برخې بيا جوړې کړې: د بانى زوئ رحوم ورپسې برخه جوړه کړه، د قعيله د نيمې ضِلعې حُکمران، حسبياه د خپلې ضِلعې د طرفه ورپسې برخه جوړه کړه،

¹⁸د قعيله د نيمې ضِلعې د حُکمران حنداد زوئ باوى ورپسې برخه جوړه کړه،

¹⁹د مصفاه حُکمران د يشوَع زوئ ايصر د وسلحې د ګودام په مخکښې ورپسې حِصه جوړه کړه، دا تر هغه ځائ پورې وه چرته چې دېوال تاوېږى،

²⁰د زبى زوئ باروک ورپسې برخه جوړه کړه، دا تر هغه ځائ پورې وه چرته چې د مشر اِمام اِلياسب کور ته د ننوتلو دروازه وه،

²¹د اورِياه زوئ او د هقوض نمسى مريموت ورپسې برخه جوړه کړه، چې دا د اِلياسب د کور تر آخرى سر پورې رسېدلې وه.

²²دې اِمامانو د دېوال يو څو نورې برخې بيا جوړې کړې: د يروشلم د ګېرچاپېره علاقې نه اِمامانو ورپسې برخه بيا جوړه کړه،

²³بنيامين او د حسوب ورپسې برخه جوړه کړه، کومه چې د هغوئ کورونو ته مخامخ وه، د معسياه زوئ او د عننياه نمسى عزرياه ورپسې برخه جوړه کړه، کومه چې د هغۀ کور مخې ته وه،

²⁴د حنداد زوئ بِنوئى ورپسې برخه جوړه کړه، چې دا د عزرياه د کور نه واخله د دېوال د ګوټ پورې وه،

²⁵۲۵‏-۲۶ د اُوزى زوئ فالال ورپسې برخه جوړه کړه، د دېوال د ګوټ نه او د څوکيدارۍ دربار ته نزدې د محل برنى مينارې نه يې شروع وکړه، د پرعوس زوئ فداياه ورپسې برخه جوړه کړه، دا برخه د هغه ځائ پورې وه چې نَمرخاتۀ طرف ته يې د اوبو دروازه او د خُدائ پاک د کور د څوکيدارۍ اوچته ميناره وه. دا برخه د ښار د هغه حِصې سره نزدې وه چې نوم يې عوفل وو، چرته چې د خُدائ پاک د کور کاريګران اوسېدل.

²⁷د تقوع سړو ورپسې برخه جوړه کړه، د هغوئ دويمه برخه، د هغه ځائ نه واخله چې د خُدائ پاک د کور د څوکيدارۍ د لوئې مينارې مخامخ وه د هغې نه واخله تر عوفل سره نزدې دېوال پورې وه.

²⁸د اِمامانو يوې ډلې ورپسې برخه جوړه کړه، چې شمالى طرف ته د اسونو د دروازې نه تلې وه، هر يو د خپل کور په مخکښې حِصه جوړه کړه.

²⁹د اِمير زوئ صدوق ورپسې برخه جوړه کړه، کومه چې د هغۀ کور په مخکښې وه. د نَمرخاتۀ طرف دروازې څوکيدار د سکانياه زوئ سمعياه ورپسې برخه جوړه کړه.

³⁰د سلمياه زوئ حنانياه او د صلف شپږم زوئ حنون ورپسې دويمه برخه جوړه کړه. د برکياه زوئ مسلام ورپسې برخه جوړه کړه، کومه چې د هغۀ کور مخې ته وه.

³¹مُلکياه زرګر ورپسې برخه جوړه کړه، دا تر هغې پورې وه چې کوم کور د خُدائ پاک د کور کاريګرو او سوداګرو اِستعمالولو، کوم چې د حاضرۍ دروازې سره وو، دا د هغه کوټې سره نزدې وو چې د شمالى نَمرخاتۀ طرف ته د ګوټ دېوال دپاسه وو.

³²زرګرانو او سوداګرو آخرى برخه جوړه کړه، دا د ګوټ سره د کوټې نه واخله د ګډو د دروازې پورې وه.