Read Pashto (Nangahari) — د پښتو مقدس کتاب نحمياه 8 Bible Online

نحمياه 8 - Pashto (Nangahari) — د پښتو مقدس کتاب bible

نحمياه 8

¹تر اوومې مياشتى پورې ټول بنى اِسرائيل په خپلو ښارونو کښې دېره شول. د دې مياشتې په اوله ورځ هغوئ ټول په يروشلم کښې د اوبو دروازې سره دننه د جرګې په ځائ کښې راغونډ شول. هغوئ عزرا عالِم ته ووئيل چې د موسىٰ د شريعت هغه کِتاب راوړى کوم چې مالِک خُدائ بنى اِسرائيلو له ورکړے وو.

²نو عزراد شريعت کِتاب هغه ځائ ته راوړو چرته چې خلق راغونډ وُو. په هغوئ کښې سړى، ښځې او هغه ماشومان وُو چې د هغوئ عُمر دومره وو چې په دې باندې پوهېدل.

³هلته د دروازې سره د جرګې په ځائ کښې هغۀ ورته د سحر وختى نه واخله تر غرمې پورې شريعت لوستلو او هغوئ ټولو ورته په توجو سره غوږ ايښے وو.

⁴عزرا د لرګى د پايو په ممبر باندې ولاړ وو کوم چې د دې موقعې دپاره جوړ شوے وو. دا کسان د هغۀ په ښى طرف باندې ولاړ وُو: متتياه، سمع، عناياه، اورِياه، خلقياه، معسياه، او دا کسان يې په ګڅ طرف باندې ولاړ وُو: فداياه، ميسائيل، مُلکياه، حاشوم، حسبناه، زکرياه او مسلام.

⁵عزرا په داسې اُوچت ځائ باندې ولاړ وو چې ټولو خلقو ليدلے شو. چې څنګه هغۀ کِتاب کولاو کړو، نو هغوئ ټول ودرېدل.

⁶عزرا ووئيل، ”د مالِک خُدائ د لوئ خُدائ پاک ثناء صِفت دې وى!“ نو ټولو خلقو خپل لاسونه اُوچت کړل او وې وئيل، ”آمين! آمين!“ هغوئ په عِبادت کښې ټيټ شول او په زمکه يې مالِک خُدائ ته سجده ولګوله.

⁷بيا هغوئ په خپلو خپلو ځايُونو باندې ودرېدل، او دې ليويانو ورته د شريعت تشريح وکړه: يشوَع، بانى، سربياه، يمين، عقوب، بستى، هودياه، معسياه، قليتاه، عزرياه، يوزباد، حنان او فلاياه.

⁸هغوئ ورته د خُدائ پاک شريعت ولوستلو او د دې تشريح يې ورته وکړه، چې خلق يې په مطلب باندې پوهه شى.

⁹کله چې خلقو ته پته ولګېده چې د شريعت مطالبه څۀ ده، نو هغوئ په ژړا شروع وکړه. نو نحمياه چې حُکمران وو، عزرا چې د شريعت اِمام او عالِم وو او هغه ليويانو چې د شريعت تشريح يې کوله هغوئ ټولو هغه خلقو ته ووئيل چې، ”دا ورځ د مالِک خُدائ ستاسو د خُدائ پاک دپاره مقدسه ده، نو تاسو له نۀ دى په کار چې غم يا ژړا وکړئ.

¹⁰نو د خوراک څښاک دپاره خپلو کورونو ته لاړ شئ او په خپل خوراک او د انګورو شرابو کښې د هغه خلقو هم حِصه وکړئ چې د چا سره دا څيزُونه نۀ وى. نن زمونږ د مالِک خُدائ دپاره يوه مقدسه ورځ ده، نو مۀ خفه کېږئ. د مالِک خُدائ خوشحالى ستاسو د طاقت بُنياد دے.“

¹¹نو ليويانو خلق قلاره کول او ورته يې وئيل چې په داسې مقدسه ورځ باندې خفګان مۀ کوئ.

¹²نو ټول خلق خپلو کورونو ته لاړل او په خوشحالۍ سره يې خوراک څښاک وکړو او په دې خوراک څښاک کښې يې د نورو خلقو حِصه هم وکړه، ځکه چې هغوئ د خُدائ کلام اورېدلے وو او په هغې پوهه شوى وُو.

¹³په ورپسې ورځ د ډلو مشران چې د هغوئ اِمامان او ليويان هم ورسره وُو، هغوئ عزرا عالِم له لاړل چې د شريعت حُکمونه زده کړى.

¹⁴هغوئ ته دا پته ولګېده چې هغه شريعت دا حُکم کوى کوم چې مالِک خُدائ د موسىٰ په ذريعه ورکړے وو چې د جونګړو د اختر په دوران کښې دې بنى اِسرائيليان په جونګړو کښې اوسېږى.

¹⁵نو هغوئ ورته دا اصُول وښودل او ټول يې يروشلم او نورو وړو او غټو ښارونو ته ولېږل، ”غرونو ته لاړ شئ او د نختر، د زيتُونو، د کهجورو او د هغه نورو ونو لختى راؤړئ چې سورے جوړوى چې د هغه اصُولو په مطابق جونګړې جوړې کړُو چې د شريعت په کِتاب کښې ليکلے شوى دى.“

¹⁶نو خلقو څانګې راوړې او د خپلو کورونو په چتُونو، په خپلو صِحنونو کښې، د خُدائ پاک د کور په دربار کښې او د اِفرائيم دروازې او د اوبو دروازې سره د جرګې په عوامى ځايُونو کښې يې جونګړې جوړې کړې.

¹⁷هغه ټول خلق کوم چې د جلاوطنۍ نه واپس راغلى وُو هغوئ جونګړې جوړې کړې او په هغې کښې اوسېدل او هر يو کس جذباتى او خوشحاله وو. د نون زوئ يشوَع د وخت نه پس داسې نۀ وُو شوى.

¹⁸د اختر د وړومبۍ ورځې نه واخله تر آخرى ورځې پورې هغوئ هره ورځ د خُدائ پاک د شريعت يوه حِصه لوستله. هغوئ اووه ورځې دا اختر وکړو او په اتمه ورځ د اختر د ختمېدو اجتماع وشوه، هم هغه شان لکه څنګه چې په شريعت کښې لازمى شوى وُو.