Read Pashto (Nangahari) — د پښتو مقدس کتاب اِستَر 3 Bible Online

اِستَر 3 - Pashto (Nangahari) — د پښتو مقدس کتاب bible

اِستَر 3

¹څۀ موده وروستو اخسويرس بادشاه همان نومې سړى له ترقى ورکړه او د وزيرانو مشر يې جوړ کړو. همان د اجاج د قوم همداتا زوئ وو.

²بادشاه خپلو ټولو آفسرانو له حُکم ورکړو چې همان ته د عزت نه ټيټېږئ خو مردکى يې عزت نۀ کولو او نۀ ورته ټيټېدو.

³نورو شاهى آفسرانو د هغۀ نه تپوس وکړو چې ”تۀ د بادشاه د حُکم نافرمانى ولې کوى؟“

⁴هغوئ به هره ورځ ورته وئيل، خو هغۀ به ورته غوږ نۀ نيولو. هغۀ به وئيل، ”زۀ همان ته نۀ شم ټيټېدلے ځکه چې زۀ يهُودى يم.“ نو هغوئ همان د دې نه خبر کړو، هغوئ غوښتل چې وګورى چې هغه به د مردکى دا رويه برداشت کړى که نه.

⁵کله چې همان ته پته ولګېده چې مردکے هغۀ ته د عزت نه نۀ ټيټېږى نو همان سخت غصه شو،

⁶او کله چې خبر شو چې مردکے يهُودى دے، نو هغۀ دا فېصله وکړه چې هغه به نۀ صرف مردکى له سزا ورکوى بلکه هغۀ دا منصُوبه هم جوړه کړه چې د فارس په بادشاهۍ کښې هر يو يهُودى ووژنى.

⁷د اخسويرس بادشاه د حکومت په دولسم کال، په وړومبۍ مياشت يعنې د نسان په مياشت، همان حُکم وکړو چې پوريم يعنې پچه دې واچولے شى چې دا معلومه کړى چې د دې منصُوبې دپاره صحيح مياشت کومه يوه ده. نو د دولسمې مياشتې يعنې د ادر مياشتې ديارلسمه ورځ خوښه کړے شوه.

⁸نو همان د بادشاه په مخکښې حاضر شو او ورته يې ووئيل، ”ستا په ټوله بادشاهۍ کښې د خلقو يو قِسم نسل خور دے او دا په هره صُوبه کښې موندلے شى. هغوئ داسې رِواجونه کوى چې هغه د نورو خلقو په شان نۀ دى. د دې نه علاوه، هغوئ د بادشاهۍ قانون هم نۀ منى، نو دا ستا دپاره د فائدې خبره نۀ ده چې هغوئ برداشت کړې.

⁹بادشاه سلامت! که ستا رضا وى، نو يو فرمان جارى کړه چې هغوئ دې ووژلے شى. که تا داسې وکړل، نو زۀ به د بادشاهۍ د اِنتظام دپاره د درې لاکه او څلوېښتو زرو کېلو نه زيات سپين زر په شاهى خزانه کښې کېږدم.“

¹⁰بادشاه خپله هغه ګوتمه وويستله، چې هغه به په سرکارى فرمان باندې د مهر لګولو دپاره اِستعمالېدله او دا يې د يهُوديانو دشمن د همداتا زوئ همان له ورکړه چې دے د اجاج د اولاد نه وو.

¹¹بادشاه هغۀ ته ووئيل، ”سپين زر ځان سره کړه او د خلقو سره هم هغسې وکړه څنګه چې دې زړۀ غواړى.“

¹²نو د وړومبۍ مياشتې په ديارلسمه ورځ باندې همان د بادشاه منشيان راغوښتل او يو فرمان يې جارى کړو چې د هرې صُوبې په ژبه او رسم‌الخط کښې دې د دې ترجمه وشى او ټولو حُکمرانانو، حاکِمانو او آفسرانو ته دې ولېږلے شى. دا فرمان د اخسويرس بادشاه په نوم باندې جارى شو او د هغۀ د ګوتمې مهر ورباندې لګېدلے وو.

¹³پېغام رسونکو دا فرمان د بادشاهۍ هرې صُوبې ته يوړو. په دې کښې دا خبرې ليکلے شوې وې چې صِرف په هغه ورځ يعنې د ادر مياشتې په ديارلسمه ورځ باندې دې ټول يهُوديان، ځوانان، بوډاګان، ښځې او ماشومان ووژلے شى. هغوئ دې د بې رحمۍ سره حلال کړے شى او چې هغوئ څۀ لرى نو هغه ترې نه واخلئ.

¹⁴د دې فرمان د خبرو نه د هرې صُوبې خلق ځکه خبرول په کار وُو، چې کله هغه ورځ راشى نو چې هر يو کس ورته تيار وى.

¹⁵د بادشاه د حُکم په مطابق هغه فرمان د سوسه په مرکزى ښار کښې خلقو ته ورسولے شو او پېغام رسونکو دا خبر نورو صُوبو ته يوړو. په کوم وخت کښې چې د سوسه ښار په ګروټۍ کښې اچولے شو نو بادشاه او همان شرابو څښلو ته ناست وُو.