Read Pashto (Nangahari) — د پښتو مقدس کتاب اِستَر 4 Bible Online

اِستَر 4 - Pashto (Nangahari) — د پښتو مقدس کتاب bible

اِستَر 4

¹کله چې مردکے د هغه هر څۀ نه خبر شو چې څۀ شوى وُو، نو هغۀ د خفګان نه خپلې جامې وشلولې. بيا هغۀ د ټاټ جامې واغوستلې، سر يې په ايرو پټ کړو، په ښار کښې روان شو او تر هغې پورې يې په چغو چغو او بد بد ژړل،

²چې د محل دروازې ته ورسېدو. هغه دننه ځکه لانۀ ړو چې د ټاټ په جامو کښې دننه د تلو اِجازت نۀ وو.

³په ټولو صُوبو کښې، چرته هم چې د بادشاه د فرمان پته لګېدلې وه، نو هلته يهُوديانو په چغو چغو ژړل. هغوئ روژه ونيوله، ژړا او وير يې کولو او ډېرو کسانو د ټاټ جامې اغوستې وې او سر يې په ايرو پټ کړے وو.

⁴کله چې د اِستَر ښځو خِدمتګارانو او هيجړاګانو اِستَر ته ووئيل چې مردکى څۀ کول، نو هغه سخته پرېشانه شوه. نو هغې مردکى له څۀ جامې ولېږلې چې د ټاټ جامو په ځائ يې واغوندى، خو هغۀ به نۀ اخستلې.

⁵بيا هغې هتاک راوغوښتلو، هغه يو هيجړا وو چې بادشاه د هغې نوکر وو او هغې هغۀ ته ووئيل چې مردکى له لاړ شه او دا معلوم کړه چې څۀ مسئله ده چې هغه دومره غمژن دے.

⁶هتاک د محل د دروازې مخامخ د ښار چوک ته مردکى له لاړو.

⁷مردکى ورته ټوله قيصه بيان کړه او دا يې هم ورته ووئيل چې که ټول يهُوديان ووژلے شول نو همان په شاهى خزانه کښې د څومره پېسو د کېښودو وعده کړې ده.

⁸هغۀ هتاک له د هغه فرمان يو نقل ورکړو چې کوم په سوسه کښې جارى شوے وو، چې په هغې کښې د يهُوديانو د تباهۍ حُکم وو. مردکى هتاک ته ووئيل چې دا اِستَر له يوسه او اِستَر د حالاتو نه خبر کړه او هغې ته ووايه چې لاړه شى او بادشاه ته دا سوال زارى وکړى چې د هغې په خلقو باندې رحم وکړى.

⁹نو هتاک د مردکى د پېغام سره اِستَر له راواپس شو،

¹⁰او اِستَر هغۀ له دا پېغام ورکړو چې مردکى له يې يوسه،

¹¹”که هر څوک، سړے يا ښځه، د دعوت نه بغېر دننه د بادشاه دربار ته لاړ شى، نو هغه کس به وژلے شى، دا يو قانون دے، د بادشاه د مشيرانو نه واخله په صُوبو کښې د خلقو پورې هر يو کس د دې نه خبر دے. د دې قانون نه د بچ کېدو صِرف يوه لار ده: که بادشاه يو کس ته خپله د سرو زرو امسا اُوږده کړى، نو د هغه کس ژوند به بچ شى. خو د دې يوه مياشت وشوه چې بادشاه زۀ راغوښتے نۀ يم.“

¹²کله چې مردکى ته د اِستَر پېغام مِلاو شو،

¹³نو هغۀ اِستَر ته دا پېغام ولېږلو، ”داسې مۀ وايه چې په ټولو يهُوديانو کښې به صرف تۀ بچ شې ولې چې تۀ په شاهى محل کښې يې.

¹⁴که تۀ په داسې وخت کښې هم خاموشه پاتې شوې، نو د يو بل ځائ نه به د يهُوديانو دپاره مدد راشى او هغوئ به بچ شى، خو تۀ به مړه شې او ستا د پلار کورنۍ به ختمه شى. کېدے شى چې تۀ هم د دې وخت دپاره مَلِکه جوړه شوې يې، د دې نه څوک خبر وو!“

¹⁵اِستَر مردکى له دا جواب ولېږلو،

¹⁶”لاړ شه او په سوسه کښې ټول يهُوديان په يو ځائ راغونډ کړه، روژه ونيسئ او زما دپاره دعا وکړئ. درې ورځې او درې شپې هيڅ خوراک څښاک مۀ کوئ. زۀ او زما خِدمتګارې به هم ستاسو په شان روژه ونيسو. د هغې نه پس به بيا زۀ بادشاه له لاړه شم، اګر چې دا د قانون خِلاف دى. خو که د داسې کولو په وجه زۀ مرم، نو مړه دې شم.“

¹⁷نو بيا مردکى لاړو او هغه هر څۀ يې وکړل چې اِستَر ورته وئيلى وُو.