Read Pashto (Nangahari) — د پښتو مقدس کتاب اِستَر 6 Bible Online

اِستَر 6 - Pashto (Nangahari) — د پښتو مقدس کتاب bible

اِستَر 6

¹هم په هغه شپه بادشاه له خوب نۀ ورتلو، نو هغۀ حُکم وکړو چې د بادشاهۍ د تاريخ کِتاب دې راوړے شى او هغۀ ته دې ولوستلے شى.

²نو چې هغوئ کومه حِصه ولوستله په هغې کښې هغه واقعه شامله وه چې مردکى د بادشاه د وژلو منصُوبه څنګه څرګنده کړه او هغه منصُوبه کومه چې بګتانا او ترش، د محل دوو هغه هيجړاګانو جوړه کړې وه کومو چې د بادشاه د کوټو څوکيدارى کوله.

³بادشاه ترې نه تپوس وکړو، ”مونږ د دې په بدل کښې د مردکى څنګه درناوے کړے دے او څۀ مو اِنعام ورکړے دے؟“ نو د هغۀ نوکرانو جواب ورکړو، ”د هغۀ دپاره هيڅ نۀ دى شوى.“

⁴بادشاه تپوس وکړو، ”اوس په دربار کښې څوک دى؟“ نو همان ايله دربار ته ننوتو، هغه د دې دپاره راغلے وو چې د بادشاه نه تپوس وکړى چې مردکى په هغه دار باندې ځوړند کړى کوم چې هغۀ اوس تيار کړے وو.

⁵نو نوکرانو جواب ورکړو، ”همان په دربار کښې دے.“ بادشاه ورته ووئيل، ”هغه راپرېږدئ چې دننه راشى.“

⁶نو همان راغلو او بادشاه ورته ووئيل، ”د يو کس نه چې زۀ خوشحاله شم نو د هغۀ څنګه عزت وکړم، زۀ د دې سړى دپاره څۀ وکړم؟“ همان د خپل ځان سره وئيل، ”داسې څوک شته چې بادشاه يې زما نه زيات عزت کول وغواړى؟“

⁷۷‏-۸ نو هغۀ بادشاه له جواب ورکړو، ”حُکم وکړه چې د دې سړى دپاره شاهى چُوغې راوړلے شى، هغه چُوغې چې تۀ يې په خپله اغوندى. او هغه اس چې تا پرې پخپله سورلى کړى وى او په تندى يې شاهې نښه لږيدلى وى.

⁹بيا په خپل لوئ عزتمند مشر باندې دې سړى ته چُوغې ورواغونده او د ښار په کُوڅو کښې يې په اس باندې سور بوځه. کله چې هغوئ روان وى نو هغه مشر سړے دې دا اِعلان کوى چې وګورئ بادشاه چې د چا درناوے کول غواړى نو هغه يې داسې عزت کوى!“

¹⁰بيا بادشاه همان ته ووئيل، ”زر شه او چُوغې واخله او اس بوځه او د مردکى يهُودى داسې درناوے وکړه. لکه څنګه چې تا مشوره راکړې ده نو د هغې په مطابق د هغۀ دپاره هغه هر څۀ وکړه. هغه به د محل د دروازې په خولهٔ کښې ناست ووينې.“

¹¹نو همان چُوغې واخستلې او مردکى ته يې ورواغوستلې او د بادشاه په اس باندې يې سور کړو او همان هغه د ښار په کُوڅو کښې بوتلو او خلقو ته يې اِعلان کولو چې، ”وګورئ چې بادشاه د چا درناوے کول وغواړى نو هغه يې داسې عزت کوى!“

¹²نو مردکى بيا واپس د محل دروازې ته راواپس شو خو په دې دوران کښې همان خفه او شرمنده کور ته تېز لاړو.

¹³هغۀ خپلې ښځې او ټولو دوستانو ته هغه هر څۀ ووئيل چې څۀ شوى وُو. بيا هغې او د هغۀ هوښيارو ملګرو هغۀ ته ووئيل، ”په مردکى باندې ستا هيڅ زور نۀ رسى هغه يو يهُودى دے او ځکه تۀ په هغۀ باندې برے نۀ شې موندلے. هغه به خامخا تا له شکست درکړى.“

¹⁴کله چې هغوئ لا خبرې کولې، نو د محل هيجړاګان راورسېدل او همان يې د اِستَر مېلمستيا له بوتلو.