Read Pashto (Nangahari) — د پښتو مقدس کتاب اِستَر 8 Bible Online

اِستَر 8 - Pashto (Nangahari) — د پښتو مقدس کتاب bible

اِستَر 8

¹هم په هغه وخت اخسويرس بادشاه مَلِکه اِستَر له د همان ټول جائيداد ورکړو، دا هم هغه همان وو کوم چې د يهُوديانو دشمن وو. اِستَر بادشاه ته ووئيل چې مردکى د هغې خپلوان دے، نو د هغه وخت نه مردکى ته دا اِجازت وو چې د بادشاه حضُور ته دننه راشى.

²بادشاه خپله هغه ګوتمه وويستله چې مهر ورباندې وو او دا يې د همان نه واپس اخستې وه او مردکى له يې ورکړه. اِستَر مردکى د همان د جائيداد مشر جوړ کړو.

³نو اِستَر بادشاه له بيا لاړه او د هغۀ په پښو پرېوته، وې ژړل او مِنت زارى يې ورته وکړه چې د هغه خرابې منصُوبې خِلاف څۀ وکړى کومه چې د اجاج اولاد همان د يهُوديانو خِلاف جوړه کړې ده.

⁴بادشاه هغې له خپله د سرو زرو امسا بيا وراُږده کړه، نو هغه ودرېده او وې وئيل،

⁵”بادشاه سلامت! که ستا رضا وى او که ستا سره زما فکر وى او دا تا ته ښۀ ښکارى، نو مِهربانى وکړه چې دا فرمان جارى کړه چې د همان په حُکم باندې دې عمل نۀ کېږى، دا هغه حُکم وو چې د اجاج قبيلى د همداتا زوئ همان د ټولو يهُوديانو د وژلو دپاره ورکړے وو.

⁶که دا آفت زما په خلقو باندې راشى او چې زما خپلوان ووژلے شى نو زۀ دا څنګه برداشت کولے شم؟“

⁷بيا اخسويرس بادشاه مَلِکه اِستَر او مردکى يهُودى ته ووئيل، ”ګورئ! ما همان د يهُوديانو خِلاف د منصُوبې په وجه پهانسى کړے دے او ما اِستَر له د هغۀ جائيداد هم ورکړے دے.

⁸خو د بادشاه په نوم چې کوم فرمان جارى شوے وى او په هغې باندې شاهى مهر لګولے شوے وى نو هغه نۀ واپس کېږى. خو يهُوديانو ته هغه څۀ ليکلے شئ چې ستاسو زړۀ څۀ غواړى، او دا زما په نوم ليکلے شئ او شاهى مهر ورباندې ولګولے شئ.“

⁹نو د درېمې مياشتې يعنې د سيوان د مياشتې په درويشتمه ورځ داسې وشول. مردکى د بادشاه منشيان راوغوښتل او يهُوديانو، حُکمرانانو، وزيرانو او د هِندوستان نه واخله تر ايتهوپيا پورې د يو سل او اوويشتو صُوبو آفسرانو ته يې خطُونه وليکل. خطُونه هرې صُوبې ته په خپله ژبه او رسم‌الخط کښې او يهُوديانو ته په خپله ژبه او رسم‌الخط کښې ليکلے شوى وُو.

¹⁰مردکى خطُونه د اخسويرس بادشاه د طرف نه ليکلى وُو او په دې باندې يې شاهى مهر لګولے وو. دا په هغه تېزو اسونو باندې سوارو کسانو په ذريعه رسولے شوى وُو چې کوم اسونه د بادشاه دپاره ساتلى شوى وُو.

¹¹په دې خطُونو کښې دا تفصيل وو چې بادشاه به په هر ښار کښې يهُوديانو له دا اِجازت ورکړى چې د خپلو ځانونو د حِفاظت دپاره منظم شى. که د يو قوم فوجيان په هره يوه صُوبه کښې په يهُودى سړو باندې، د هغوئ بچو او ښځو باندې حمله وکړى، نو يهُوديان به هم ورباندې حمله کوى او حمله کوُونکى به تباه کړى، هغوئ دې تر آخرى کس پورې ووژنى او د هغوئ هر څۀ دې لوټ کړى.

¹²دا فرمان د فارس په ټول سلطنت کښې په هغه ورځ عملى کولے شو چې کومه د يهُوديانو د وژلو دپاره مقرره وه، دا د دولسمې يعنې د ادر مياشتې ديارلسمه ورځ وه.

¹³د دې قانونى اِعلان شوے وو او په هره صُوبه کښې هر څوک د دې نه خبر وُو، نو چې کله هغه ورځ راشى نو يهُوديان به د دشمن نه د بدل اخستلو دپاره تيار وى.

¹⁴د بادشاه په حُکم په شاهى اسونو سوارۀ پېغام وړُونکى تېز لاړل. هغه فرمان په مرکزى ښار سوسه کښې هم جارى شوے وو.

¹⁵مردکى د محل نه لاړو او د آسمانى او د سپين رنګ جامې، د بانجانى رنګ د مهينې لټې يوه چُوغه يې اغوستې وه او د سرو زرو يو زبردست تاج يې په سر وو. بيا د سوسه کُوڅې د لاسونو د پړقارى او د خوشحالۍ د چغو نه ډکې شوې.

¹⁶يهُوديانو خوشحالى، راحت، خندا او عزت محسوسولو.

¹⁷هر ښار او هرې صُوبې ته هم چې د بادشاه فرمان ورسېدو، نو يهُوديان خوشحاله وُو. هغوئ مېلمستيا او جشن وکړو. او په هغوى کښې نور ډېر خلق په دې وجه يهُوديان شول، چې د يهُوديانو نه ويرېدل.