Read Pashto (Nangahari) — د پښتو مقدس کتاب هجرت 1 Bible Online

هجرت 1 - Pashto (Nangahari) — د پښتو مقدس کتاب bible

هجرت 1

¹۱‏-۵ کله چې حضرت يعقوب مصر ته لاړ، د هغه زوی حضرت يوسف له پخوا نه هلته ؤ. نو حضرت يعقوب خپل نور زامن د هغوی د کورنيو سره بوتلل. د هغوی نومونه دا دي: روبين، شمعون، لاوي، يهودا، يساکار، زبولون، بنيامين، دان، نفتالي، جاد او اشير. د حضرت يعقوب د ټولو زامنو، لمسيو او کړوسيو شمېر اويا تنو ته رسېده او هغوی ټول د هغه سره لاړل.

⁶د وخت په تېرېدو سره حضرت يوسف، د هغه ورونه او د هغې زمانې ټول خلک مړه شول،

⁷خو د هغوی اولاده يعنې اسرائيليان د زياتو اولادونو خاوندان شول او هغوی دومره زيات شول چې مصر ورڅخه ډک شو.

⁸له ډېرو کلونو وروسته په مصر کې يو نوي پادشاه قدرت ترلاسه کړ چې هغه د حضرت يوسف په باره کې هيڅ معلومات نه درلود.

⁹هغه مصريانو ته وويل: ”د اسرائيلو شمېر زمونږ په خاوره کې ډېر شوی دی او هغوی زمونږ نه ډېر قوي دي.

¹⁰که چېرې جنګ وشي نو کېدای شي چې هغوی زمونږ د دښمنانو سره يوځای شي او زمونږ په مقابل کې وجنګيږي او د دې وطن څخه وتښتي. نو مونږ بايد کومه لاره چاره وسنجوو او پرېنږدو چې د هغوی شمېر له دې څخه هم زيات شي.“

¹¹نو مصريانو هغوی د کار مشرانو ته وروسپارل ترڅو هغوی اسرائيليان په سخت کار کمزوري کړي. هغوی د فيتوم او رعمسيس ښارونه چې فرعون په کې خپل ګودامونه ساتل جوړ کړل.

¹²که څه هم د اسرائيليانو سره بده رويه کېدله، خو د هغوی شمېر زياتېده او نوره ځمکه يې هم ونيوله. له دې کبله مصريانو له هغوی څخه وېره درلودله

¹³۱۳‏-۱۴ او سخت ظلم يې ورباندې کاوه چې ژوند يې تريخ شي. هغوی به يې مجبورول چې خښتې جوړې کړي، خټې وکړي او په پټيو کې کار وکړي او هيڅ رحم يې ورباندې نه کاوه.

¹⁵په آخر کې فرعون دوه دايې ګانې راوغوښتې چې شفره او فوعه نومېدلې او هغوی د عبرانۍ ښځو سره د اولاد د زېږولو په وخت کې مرسته کوله.

¹⁶هغوی ته يې وويل: ”که چېرې يوه عبرانۍ ښځه انجلۍ وزېږوي، هغه ژوندۍ پرېږدئ او که چېرې هلک وي نو ويې وژنئ!“

¹⁷که څه هم فرعون ورته ويلي ؤو، مګر دا ښځې د خدای پاک څخه وېرېدلې او هلکان يې نه وژل.

¹⁸فرعون يو ځل بيا دا دوه دايې ګانې راوغوښتې او پوښتنه يې ورڅخه وکړه: ”تاسو ولې هغه هلکان ژوندي پرېږدئ؟“

¹⁹هغوی په ځواب کې وويل: ”عبرانۍ ښځې د مصريو ښځو په پرتله ژر ماشوم زېږوي او زمونږ له رسېدلو څخه مخکې د هغوی ماشوم پيدا کيږي.“

²⁰۲۰‏-۲۱ خدای پاک له هغو دوو ښځو سره ښه وکړل ځکه چې هغوی په رښتيا سره له خدايه وېرېدلې او هغوی دواړو ته يې اولادونه ورکړل. عبرانيان به زياتېدل او قوي کېدل.

²²باالاخره فرعون ټول قوم ته امر وکړ: ”څنګه چې عبرانی هلک پيدا کيږي، تاسو به هغه د نيل په سيند کې غورزوئ. مګر ټولې انجونې ژوندۍ پرېږدئ.“