Read Pashto (Nangahari) — د پښتو مقدس کتاب هجرت 10 Bible Online

هجرت 10 - Pashto (Nangahari) — د پښتو مقدس کتاب bible

هجرت 10

¹بيا څښتن حضرت موسیٰ ته وفرمايل: ”فرعون ته ورشه، ځکه چې ما د هغه او د هغه درباريانو زړونه سخت کړي دي ترڅو هغوی ته خپلې معجزې وښايم

²او د دې دپاره چې تاسو وکولی شئ خپلو اولادونو او لمسيو ته ووايئ چې څنګه مې د معجزو په ښودلو سره د مصريانو څخه احمقان جوړ کړل. بيا به تاسو ټول پوه شئ چې زه څښتن يم.“

³نو حضرت موسیٰ او حضرت هارون فرعون ته ورغلل او ورته ويې فرمايل: ”د عبرانيانو څښتن خدای داسې فرمايي: ترڅو پورې به ماته نه تسليمېږې؟ زما قوم پرېږده چې لاړ شي او زما عبادت وکړي.

⁴که چېرې ته د هغوی د پرېښودلو څخه انکار وکړې، زه به سبا ستا په هېواد باندې ملخان نازل کړم.

⁵هغوی به د ځمکې مخ پټ کړي او ځمکه به نه ښکاري. او هرڅه چې د ږلۍ څخه پاتې شوي دي هغه به وخوري، حتیٰ هغه ونې چې پاتې شوې دي هغه به هم وخوري.

⁶ستا کورونه، ستا د ټولو درباريانو او ستا د ټول قوم کورونه به د ملخانو څخه ډک شي. دا به د هغو شيانو څخه بدتر وي کوم چې ستاسو نيکونو د دې وطن په تاريخ کې ليدلي دي.“ بيا حضرت موسیٰ د فرعون څخه لاړ.

⁷فرعون ته خپلو درباريانو وويل: ”ترڅه وخته پورې به دا سړی مونږ ته تکليف راکوي؟ د اسرائيلو خلک پرېږده چې لاړ شي ترڅو وکولی شي د څښتن خپل خدای عبادت وکړي. ته خبر نه يې چې مصر وران شوی دی؟“

⁸حضرت موسیٰ او حضرت هارون يې بېرته فرعون ته راوستل او فرعون هغوی ته وويل: ”تاسو لاړ شئ او د خپل څښتن خدای عبادت وکړئ. مګر څوک څوک به لاړ شي؟“

⁹حضرت موسیٰ په ځواب کې وفرمايل: ”مونږ ټول به د ځوانانو او سپين ږيرو سره لاړ شو. مونږ به خپل زامن، لورګانې، رمې او پادې هم د ځان سره بوزو، ځکه مونږ غواړو چې څښتن ته د احترام په خاطر جشن ونيسو.“

¹⁰فرعون وويل: ”زه په څښتن باندې قسم خورم چې تاسو به هيڅکله پرېنږدم چې خپلې ښځې او اولادونه له ځانه سره بوزئ! دا ښکاره خبره ده چې تاسو کوم بد نيت لرئ.

¹¹نه! يوازې سړي دې لاړ شي او د څښتن عبادت دې وکړي ځکه چې دا ستا غوښتنه ده.“ بيا حضرت موسیٰ او حضرت هارون د فرعون د حضور څخه وشړل شول.

¹²څښتن حضرت موسیٰ ته وفرمايل: ”خپل لاس دې د مصر په خاوره باندې پورته کړه چې د ملخانو بلا راشي او هرڅه چې د ږلۍ څخه شنه پاتې شوي دي هغه وخوري.“

¹³نو حضرت موسیٰ خپله امسا پورته کړه او څښتن له ختيځ له لوري په مصر باندې د يوې شپې او ورځې دپاره باد راوالوزاوه او د سهار په وخت کې يې ملخان له ځانه سره راوړي ؤو.

¹⁴دې ملخانو د مصر ټول وطن ونيوه او دومره زيات ؤو چې داسې بلا نه چا ليدلې وه او نه به يې کله وويني.

¹⁵ځمکه په ملخانو باندې داسې پټه شوه چې توره ښکارېدله. هرڅه چې د ږلۍ څخه پاتې شوي ؤو هغه يې وخوړل چې په هغو کې د ونو مېوې هم شاملې وې. يو شين بوټی او يا ونه هم د مصر په ځمکه کې پاتې نشوه.

¹⁶فرعون ژر حضرت موسیٰ او حضرت هارون راوغوښتل او ورته ويې ويل: ”ما ستاسو د څښتن خدای او ستاسو په مقابل کې ګناه کړې ده.

¹⁷اوس يو ځل بيا زما ګناه وبخښئ او خپل څښتن خدای ته دعا وکړئ چې زما څخه دا وژونکې بلا لېرې کړي.“

¹⁸حضرت موسیٰ له فرعون څخه لاړ او څښتن ته يې دعا وکړه.

¹⁹څښتن د ختيځ باد په يو سخت لويديځ باد باندې بدل کړ او دغه باد ملخان سرې بحيرې ته يوړل. او په ټول مصر کې يو ملخ هم پاتې نشو.

²⁰مګر څښتن د فرعون زړه سخت کړ او هغه اسرائيليان پرېنښودل چې لاړ شي.

²¹بيا څښتن حضرت موسیٰ ته وفرمايل: ”خپل لاس د آسمان خواته پورته کړه ترڅو د مصر په خاوره باندې توره تياره راشي.“

²²نو حضرت موسیٰ خپل لاس د آسمان خواته پورته کړ او په مصر باندې د دريو ورځو دپاره بيخي تياره راغله.

²³مصريانو نشو کولی چې يو بل وويني او هيڅوک هم په هغه وخت کې د خپل کور څخه ونه وت. مګر چېرته چې اسرائيليان اوسېدل هلته رڼا وه.

²⁴بيا فرعون حضرت موسیٰ راوغوښت او ورته ويې ويل: ”لاړ شئ او د څښتن عبادت وکړئ. حتیٰ ستاسو ښځې او ماشومان هم ستاسو سره تللی شي. مګر يوازې خپلې رمې او پادې پرېږدئ.“

²⁵حضرت موسیٰ وفرمايل: ”ته بايد مونږ ته د دې اجازه راکړې چې د ځان سره خپل حيوانات بوزو چې خپل څښتن خدای ته قربانۍ ګانې او سوزېدونکې نذرانې وړاندې کړو.

²⁶نه، مونږ د ځان سره به خپل حيوانات بوزو او يو حيوان به هم پاتې نشي. مونږ به په خپله هغه انتخابوو چې له هغو څخه د خدای پاک په عبادت کې کار واخلو. ترڅو پورې چې هلته نه يو رسېدلي مونږ نه پوهېږو چې کوم حيوانات هغه ته قرباني کړو.“

²⁷مګر څښتن د فرعون زړه سخت کړ او هغه راضي نه ؤ چې هغوی تګ ته پرېږدي.

²⁸فرعون حضرت موسیٰ ته وويل: ”زما له مخې څخه لېرې شه! بيا زما د ليدلو هڅه ونه کړې! که چېرې بيا زما سره مخامخ شوې نو په هماغه ورځ به ووژل شې!“

²⁹حضرت موسیٰ په ځواب کې وفرمايل: ”ته رښتيا وايې، زه به بيا هيڅکله تا ونه وينم.“