Read Pashto (Nangahari) — د پښتو مقدس کتاب هجرت 12 Bible Online

هجرت 12 - Pashto (Nangahari) — د پښتو مقدس کتاب bible

هجرت 12

¹څښتن په مصر کې حضرت موسیٰ او حضرت هارون ته وفرمايل:

²”له دې وروسته به دا مياشت ستاسو دپاره د کال اوله مياشت وي.

³د اسرائيلو ټول قوم ته دا لارښودنې ورکړه: د دې مياشتې په لسمه ورځ بايد هر سړی د خپلې کورنۍ دپاره يو يو وری يا سېرلی واخلي.

⁴که چېرې يوه کورنۍ دومره کوچنۍ وي چې ټول حيوان نشي خوړلی، نو د خپل نژدې ګاونډي سره دې هغه ووېشي او د خلکو شمېر دې په نظر کې ونيسي. د هر نفر دپاره دې دومره وټاکل شي څومره چې خوړلی شي.

⁵تاسو کولی شئ چې پسه او يا وز انتخاب کړئ. مګر هغه بايد يو کلن وي او نر وي او کوم عيب هم ونلري.

⁶تاسو بايد د دې مياشتې تر څوارلسمې ورځې پورې هغه وساتئ، بيا به ټول قوم هغه په ماښام کې حلال کړي.

⁷خلک دې لږه وينه واخلي او د دروازې په چوکاټ او د کورونو د دروازو په سرونو باندې دې چې د دې حيواناتو غوښه په کې خوړل کيږي وشيندي.

⁸په هماغه شپه دې هغوی غوښه په اور باندې کباب کړي او د ترخو بوټو او فطيرې ډوډۍ سره دې وخوري.

⁹تاسو هغه غوښه خامه او يا خوټول شوې مه خورئ. هغه د سر، پښو او د نس د دننيو برخو سره په اور باندې کباب کړئ.

¹⁰د هغې غوښې څخه تر سهار پورې لږه هم مه پرېږدئ. که چېرې لږه ورڅخه پاتې شي نو هغه وسوزوئ.

¹¹تاسو به هغه ژر ژر خورئ، ځکه چې د سفر دپاره به ملا تړئ. خپلې څپلۍ به په پښو کړئ او امساګانې به مو په لاسونو کې ونيسئ. دا د فسحې اختر دی چې زما يعنې څښتن د احترام په خاطر لمانځل کيږي.

¹²په هغه شپه به زه په مصر باندې تېرېږم او هر اولنی زېږېدلی انسان او حيوان به ووژنم او د مصر ټولو خدايانو ته به سزا ورکړم. زه څښتن يم.

¹³هغه وينه چې ستاسو د کورونو د دروازو په سرونو او دواړو چوکاټونو باندې وي، هغه به ستاسو د کورونو نښې وي او کله چې زه هغه ووينم نو ستاسو د کورونو څخه به تېرېږم او يوازې مصريان به وژنم او تاسو ته به هيڅ زيان نه رسوم.

¹⁴تاسو بايد دا ورځ د يو مذهبي اختر په توګه ولمانځئ ترڅو دا تاسو ته در په ياد کړي چې ما يعنې څښتن ستاسو دپاره کوم کارونه کړي دي. دا به د ټولو راتلونکو وختونو دپاره لمانځئ.“

¹⁵څښتن وفرمايل: ”تاسو بايد اوه ورځې فطيره ډوډۍ وخورئ. په اوله ورځ ټوله خميره له خپلو کورونو څخه لېرې کړئ، ځکه چې که چېرې څوک په هغو اوه ورځو کې خميره ډوډۍ وخوري هغه به زما له قوم څخه وشړل شي.

¹⁶په اوله او اوومه ورځ تاسو د عبادت دپاره سره راغونډ شئ. په هغو ورځو کې د ډوډۍ تيارولو څخه پرته بل کار مه کوئ.

¹⁷دا اختر ولمانځئ، ځکه چې دا هماغه ورځ ده چې ما ستاسو قبيلې له مصر څخه راوويستلې. تاسو بايد دا ورځ د يو اختر په توګه د همېش دپاره ولمانځئ.

¹⁸د اولې مياشتې د څوارلسم ماښام څخه نيولې د يوويشتمې ورځې تر ماښامه پورې بايد تاسو فطيره ډوډۍ وخورئ.

¹⁹اوه ورځې بايد ستاسو په کورونو کې خميره پيدا نشي. ځکه که چېرې څوک که هغه بېګانه وي او يا اسرائيلی وي خميره ډوډۍ وخوري، هغه به د اسرائيلو د قوم څخه وشړل شي.

²⁰هيڅ داسې شی مه خورئ چې له خميرې څخه تيار شوی وي. هرچېرته چې تاسو اوسېږئ بايد فطيره ډوډۍ وخورئ.“

²¹بيا حضرت موسیٰ د اسرائيلو ټول مشران راوغوښتل او ورته ويې فرمايل: ”لاړ شئ او د خپلو کورنيو دپاره د رمو څخه وري او وزې واخلئ او د فسحې د اختر دپاره يې حلال کړئ.

²²د ويلنو د بوټو يوه غنچه واخلئ او په هغې وينه کې يې غوټه کړئ چې په لوښي کې ده او د چوکاټ په دواړو څنګونو او د دروازې په پورتنۍ برخه يې ووهئ. هيڅوک به د خپل کور څخه تر سهار پورې نه وزي.

²³کله چې څښتن د مصريانو د وژلو دپاره د مصر څخه تېريږي، هغه به د دروازو په چوکاټونو او د دروازو په پورتنيو برخو وينه وويني او د مرګ فرښته به پرېنږدي چې ستاسو کورونو ته ستاسو د وژلو دپاره ورننوزي.

²⁴تاسو او ستاسو اولادونه بايد د تل دپاره په دې اصولو باندې عمل وکړي.

²⁵کله چې تاسو هغې ځمکې ته چې څښتن يې د ورکولو وعده ستاسو سره کړې ده ورداخل شئ، بايد دا مراسم هلته سرته ورسوئ.

²⁶کله چې ستاسو ماشومان له تاسو څخه پوښتنه وکړي چې د دې مراسمو معنیٰ څه ده؟

²⁷تاسو به په ځواب کې ووايئ: دا د فسحې د اختر قرباني ده چې د څښتن د احترام دپاره يې کوو، ځکه چې هغه شپه چې څښتن په مصر کې د اسرائيليانو د کورونو دپاسه تېر شو. هغه مصريان ووژل، مګر مونږ يې ژوندي پرېښودلو.“ بيا قوم په سجده شو او عبادت يې وکړ.

²⁸بيا هغوی لاړل او څنګه چې څښتن په حضرت موسیٰ او حضرت هارون باندې امر کړی ؤ، هماغسې يې وکړل.

²⁹په نيمه شپه کې څښتن په مصر کې ټول مشران زامن ووژل. د فرعون د زوی څخه چې د تخت وارث ؤ نيولې د بندي تر مشر زوی پورې چې په زندان کې ؤ او د ټولو حيواناتو اولني بچيان يې هم ووژل.

³⁰فرعون، د هغه ټول درباريان او مصريان د شپې راويښ شول او په مصر کې سخته ژړا او واويلا وه، ځکه چې هلته داسې کور نه ؤ چې مړی په کې نه ؤ شوی.

³¹په هماغه شپه فرعون حضرت موسیٰ او حضرت هارون راوغوښتل او ورته ويې ويل: ”د خپلو خلکو سره ووزئ! زما خاوره پرېږدئ. لاړ شئ او لکه څرنګه چې تاسو غوښتل د څښتن عبادت وکړئ.

³²خپلې رمې او پادې هم د ځان سره بوزئ او لاړ شئ. او ماته هم برکت راکړئ.“

³³مصريانو د اسرائيلو قوم وهڅاوه چې د هغه هېواد څخه ژر لاړ شي. هغوی وويل: ” که چېرې تاسو لاړ نشئ نو مونږ ټول به مړه شو.“

³⁴نو خلکو بې خميرې اوړه په لګنونو کې واچول، په ټوکرونو کې يې تاو کړل او په خپلو اوږو يې کېښودل.

³⁵اسرائيليانو د حضرت موسیٰ په لارښودنې عمل وکړ او د مصريانو څخه يې د سرو او سپينو زرو شيان او کالي وغوښتل.

³⁶څښتن اسرائيليان د مصريانو په نظر کې عزتمن کړل او هرڅه يې چې له مصريانو څخه غوښتل هغوی ته يې ورکول. په دې ډول اسرائيليانو د مصريانو شتمني له ځانه سره يوړه.

³⁷اسرائيليانو له رعمسيس څخه سوکوت ته په پښو سفر وکړ. له ښځو او ماشومانو څخه پرته د سړيو شمېر نژدې شپږو لکو تنو ته رسېده.

³⁸ډېر نور خلک هم د هغوی سره لاړل او هغوی سره خپلې رمې او پادې هم وې.

³⁹هغوی له هغو اوړو څخه فطيره ډوډۍ پخه کړه چې له مصر څخه يې راوړي ؤو او هغوی وخت نه درلود چې د ځان دپاره خميره ډوډۍ يا نور خواړه تيار کړي، ځکه چې يوناڅاپه له مصر څخه شړل شوي ؤو.

⁴⁰اسرائيليان څلورسوه دېرش کاله په مصر کې اوسېدلي ؤو.

⁴¹په هماغه ورځ چې څلورسوه دېرش کاله پوره شول، د څښتن د قوم ټولې قبيلې له مصر څخه ووتلې.

⁴²دا هغه شپه وه چې څښتن په هغوی باندې پام کاوه چې هغوی له مصر څخه راوباسي. همدا شپه د څښتن دپاره وقف شوه، په دې خاطر بايد د اسرائيلو راتلونکي نسلونه د تل دپاره دا شپه د څښتن دپاره د يادګار په توګه ولمانځي.

⁴³څښتن حضرت موسیٰ او حضرت هارون ته وفرمايل: ”دا د فسحې د اختر مقررات دي: هيڅ بېګانه سړی بايد د فسحې د اختر خواړه ونه خوري.

⁴⁴مګر کوم غلام چې تاسو په بيه اخيستی وي او سنت شوى وي هغه کولی شي چې دا خواړه وخوري.

⁴⁵هيڅ موقتي اوسېدونکی يا مزدور دې هغه ونه خوري.

⁴⁶ټول خواړه بايد په يو کور کې دننه وخوړل شي او غوښه د کور څخه دباندې مه راوباسئ. يو هډوکی هم مات نه کړئ.

⁴⁷د اسرائيلو ټول قوم بايد دا اختر ولمانځي.

⁴⁸کوم سړی چې سنت شوی نه وي هغه دې دا ونه خوري. که چېرې کوم بېګانه سړی په تاسو کې اوسيږي او غواړي چې د څښتن د احترام دپاره د فسحې اختر ولمانځي، تاسو بايد اول د هغه د کورنۍ ټول نران سنت کړئ. بيا به د هغه سره لکه د يو اصلي اسرائيلي په شان چلند کيږي او کولی شي چې په دې اختر کې برخه واخلي.

⁴⁹په اصلي اسرائيلي او هغو بېګانه خلکو باندې چې ستاسو په منځ کې اوسيږي بايد يوشان مقررات عملي شي.“

⁵⁰ټولو اسرائيليانو د څښتن په امر باندې چې په حضرت موسیٰ او حضرت هارون باندې يې کړی ؤ عمل وکړ.

⁵¹په هماغه ورځ څښتن د اسرائيلو قبيلې د مصر څخه راوويستلې.