Read Pashto (Nangahari) — د پښتو مقدس کتاب هجرت 13 Bible Online

هجرت 13 - Pashto (Nangahari) — د پښتو مقدس کتاب bible

هجرت 13

¹څښتن حضرت موسیٰ ته وفرمايل:

²”د اسرائيليانو ټول اولني زېږېدل شوي زامن او هر اولنی زېږېدلی نر حيوان ماته وقف کړه. هغه زما دي.“

³حضرت موسیٰ قوم ته وفرمايل: ”دا ورځ په ياد ساتئ، يعنې هغه ورځ چې تاسو له مصر څخه چې په کې غلامان وئ ووتلئ. دا هغه ورځ ده چې څښتن د خپل لوی قدرت په وسيله تاسو له مصر څخه راوويستلئ. تاسو خميره ډوډۍ مه خورئ.

⁴نن تاسو په اوله مياشت چې د ابيب مياشت ده د مصر څخه روان يئ.

⁵کله چې څښتن تاسو د کنعانيانو، حيتيانو، اموريانو، حويانو او يبوسيانو ښې او حاصلخېزې ځمکې ته چې د هغې وعده يې ستاسو نيکونو سره کړې ده راولي، تاسو بايد دا اختر د هر کال په اوله مياشت ولمانځئ.

⁶اوه ورځې فطيره ډوډۍ وخورئ او په اوومه ورځ د څښتن د احترام دپاره جشن ونيسئ.

⁷اوه ورځې بايد فطيره ډوډۍ وخورئ، ستاسو د هېواد په هيڅ ځای کې دې خميره نه وي او نه دې خميره ډوډۍ وي.

⁸د اختر په پيل کې خپلو زامنو ته داسې ووايئ چې مونږ دا هرڅه د هغه څه له کبله کوو چې څښتن زمونږ دپاره د مصر څخه د راوتلو په وخت کې وکړل.

⁹دا مراسم به لکه د يوې نښې په شان چې تاسو يې په خپل لاس يا تندي باندې تړئ، يو يادګار وي. دا به تاسو ته د څښتن د شريعت دوامداره تلاوت کول در په يادوي، ځکه چې څښتن په خپل لوی قدرت تاسو له مصر څخه راوويستلئ.

¹⁰تاسو بايد دا اختر د هر کال په ټاکل شوي وخت کې ولمانځئ.

¹¹څښتن به تاسو د هغې وعدې سره سم چې تاسو او ستاسو د نيکونو سره يې کړې ده د کنعانيانو وطن ته راولي. کله چې هغه وطن تاسو ته درکړي،

¹²بايد ټول اولني زېږېدل شوي نارينه څښتن ته وقف کړئ. هر اولنی زېږېدلی نر حيوان د څښتن دی.

¹³تاسو بايد هر نر خر بېرته په بيه واخلئ او د هغه په ځای يو وری قرباني کړئ. که چېرې تاسو نه غواړئ چې هغه خر بېرته په بيه واخلئ، نو د هغه اورمېږ مات کړئ. تاسو بايد خپل ټول مشران زامن بېرته په بيه واخلئ.

¹⁴کله چې په راتلونکي کې ستاسو څخه خپل زامن پوښتنه وکړي چې دا مراسم څه معنیٰ لري؟ تاسو به هغوی ته په ځواب کې ووايئ چې څښتن په خپل لوی قدرت سره له مصر څخه چې مونږ په کې غلامان ؤو راوويستلو.

¹⁵هغه وخت چې د فرعون زړه سخت ؤ او مونږ يې نه پرېښودلو چې له مصر څخه لاړ شو، نو څښتن په مصر کې هر اولنی زېږېدلی نر حيوان او انسان وواژه. ځکه مونږ څښتن ته هر اولنی زېږېدلی نر حيوان قرباني کوو او خپل ټول اولني زامن بېرته په بيه اخلو.

¹⁶دا مراسم به لکه د يوې نښې په شان چې مونږ يې په لاسونو يا په خپلو تنديو باندې وتړو، يو يادګار وي. دا به مونږ ته دا خبره را په يادوي چې څښتن په خپل قدرت مونږ له مصر څخه راوويستلو.“

¹⁷کله چې فرعون قوم پرېښود چې لاړ شي، خدای پاک هغوی پرېنښودل چې د فلسطين په لارې باندې لاړ شي، که څه هم هغه لاره لنډه وه. ځکه چې خدای پاک وفرمايل: ”که چېرې هغوی د جګړې سره مخامخ شي، کېدای شي چې خپله پرېکړه بدله کړي او بېرته مصر ته راستانه شي.“

¹⁸د هغې په ځای يې هغوی د دښتې په لاره چې کږه وږه لار وه، د سرې بحيرې خواته بوتلل. اسرائيليان د جګړې دپاره په وسلو سمبال ؤو.

¹⁹حضرت موسیٰ د حضرت يوسف هډوکي د ځان سره يوړل، ځکه چې حضرت يوسف اسرائيليانو ته قسم ورکړی ؤ. هغه فرمايلي ؤو: ”خدای پاک به په رښتيا سره ستاسو مرستې ته راشي، بيا تاسو زما هډوکي د دې ځای څخه يوسئ.“

²⁰اسرائيليان د سوکوت څخه لاړل او په ايتام کې يې د دښتې په يوه ګوښه کې خېمې ودرولې.

²¹د ورځې له خوا به څښتن په ورېځو کې د هغوی په مخ کې روان ؤ چې هغوی ته لاره وروښايي او د شپې له خوا به په اور کې روان ؤ ترڅو هغوی ته رڼا وکړي. نو هغوی کولی شول چې شپه او ورځ سفر وکړي.

²²ورېځ به په ورځ کې او اور به په شپه کې د هغوی د مخې څخه نه لېرې کېده.