Read Pashto (Nangahari) — د پښتو مقدس کتاب هجرت 14 Bible Online

هجرت 14 - Pashto (Nangahari) — د پښتو مقدس کتاب bible

هجرت 14

¹بيا څښتن حضرت موسیٰ ته وفرمايل:

²”اسرائيليانو ته ووايه چې بېرته راوګرځي او فم الحيروت ته مخامخ چې د مجدل او د سرې بحيرې ترمنځ او بعل صفون ته نژدې دی خېمې ودروي.

³فرعون به دا فکر وکړي چې اسرائيليان به په وطن کې سرګردانه ګرځي او د وارخطايۍ په حالت کې په دښته کې بند پاتې دي.

⁴زه به د فرعون زړه سخت کړم او هغه به دوى تعقيب کړي. مګر د فرعون او د هغه په لښکرو باندې به زما کاميابي زما د جلال سبب شي. بيا به مصريان پوه شي چې زه څښتن يم.“ لکه څنګه چې هغوی ته ويل شوي ؤو اسرائيليانو هماغسې وکړل.

⁵کله چې فرعون خبر شو چې د اسرائيلو قوم تښتېدلی دی، هغه او د هغه درباريانو د هغوی په هکله خپله پرېکړه بدله کړه او ويې ويل: ”مونږ څه وکړل؟ مونږ اسرائيليان پرېښودل چې وتښتي او هغوی چې زمونږ غلامان ؤو له لاسه مو ورکړل!“

⁶فرعون خپلې جنګي ګاډۍ ګانې او لښکرې تيارې کړې.

⁷هغه د ځان سره شپږسوه ښې ښې جنګي ګاډۍ ګانې د مصر د نورو ټولو جنګي ګاډيو سره چې د هر يو سره خپل خپل قوماندان ؤ يوړلې.

⁸څښتن د فرعون زړه سخت کړ، نو هغه د اسرائيليانو پسې چې په جرأت سره د مصر څخه ووتل، روان شو.

⁹د مصريانو، د فرعون ټول آسونه، جنګي ګاډۍ ګانې، آس سواران او لښکرې د اسرائيليانو پسې روان شول او له هغوی څخه مخکې شول، چېرته چې هغوی د درياب سره چې فم الحيروت او بعل صفون ته نژدې ؤ خېمې ودرولې وې.

¹⁰څنګه چې فرعون نژدې شو، اسرائيليانو سترګې پورته کړې او ويې ليدل چې مصريان هغوی پسې راروان دي. هغوی ډېر ووېرېدل او څښتن ته يې فرياد وکړ.

¹¹هغوی حضرت موسیٰ ته وويل: ”آيا په مصر کې قبرونه نه ؤو چې تا دلته دښتې ته راوستلو چې مړه شو؟ ګوره تا زمونږ سره څه وکړل چې له مصر څخه دې راوويستلو؟

¹²آيا تاته مونږ په مصر کې ونه ويل چې مونږ پرېږده چې د مصريانو غلامان اوسو؟ مونږ ته په دښتې کې د مړه کېدلو څخه د مصريانو غلامي ښه ده.“

¹³حضرت موسیٰ په ځواب کې وفرمايل: ”مه وېرېږئ! په خپل ځای کې ودرېږئ. تاسو به ووينئ چې څښتن نن تاسو ته څنګه خلاصون درکوي. کوم مصريان چې نن يې وينئ، هغه به بيا هيڅکله ونه وينئ.

¹⁴تاسو غلي اوسئ، څښتن به ستاسو دپاره جګړه وکړي.“

¹⁵څښتن حضرت موسیٰ ته وفرمايل: ”ته ولې ماته د مرستې په خاطر فرياد کوې؟ خلکو ته ووايه چې وړاندې لاړ شي.

¹⁶خپله امسا پورته کړه او د درياب خواته يې ونيسه. اوبه به بېلې شي او اسرائيليان به وکولی شي چې په درياب کې په وچه ځمکه باندې تېر شي.

¹⁷زه به د مصريانو زړونه سخت کړم چې هغوی تاسو پسې درشي او زه به په فرعون، د هغه په لښکرو او جنګي ګاډيو په چلوونکو باندې د برياليتوب په سبب جلال ومومم.

¹⁸کله چې زه د فرعون، د هغه جنګي ګاډيو او آس چلوونکو ته ماتې ورکړم او خپل جلال ښکاره کړم، مصريان به پوه شي چې زه څښتن يم.“

¹⁹د خدای پاک فرښته چې د اسرائيلو د لښکرو په مخ کې روانه وه شاته لاړه. ورېځې هم د هغوی شاته حرکت وکړ

²⁰او هغه د مصريانو او د اسرائيليانو په منځ کې شوه. د شپې په دوران کې ورېځو په مصريانو باندې تياره راوستله، مګر د اسرائيلو په قوم يې رڼا راوستله. نو لښکرې په ټوله شپه کې يو بل ته نژدې نشوې ورتلی.

²¹حضرت موسیٰ د درياب دپاسه خپل لاس ونيوه او څښتن په قوي ختيځ باد باندې د درياب اوبه شاته يوړلې. دا باد ټوله شپه ولګېده او درياب يې په وچه ځمکه بدل کړ. اوبه بېلې شوې

²²او اسرائيليان په درياب کې په وچه ځمکه تېر شول او دواړو خواو ته د اوبو دېوالونه ؤو.

²³مصريان د خپلو ټولو آسونو، جنګي ګاډيو او د آس سوارانو سره هغوی تعقيب کړل او په درياب کې ورپسې روان شول.

²⁴د سباوون څخه مخکې، څښتن د اور او ورېځو له منځ څخه د مصريانو لښکرو ته وکتل او هغوی يې وارخطا کړل.

²⁵څښتن د هغوی د ګاډيو عرابې له کاره وغورزولې نو هغه په سختۍ سره چلېدلې. او مصريانو وويل: ”راځئ چې له دې ځاى څخه وتښتو، ځکه چې څښتن زمونږ په ضد د اسرائيليانو دپاره جنګيږي!“

²⁶بيا څښتن حضرت موسیٰ ته وفرمايل: ”خپل لاس دې درياب ته اوږد کړه. نو اوبه به بېرته په مصريانو، د هغوی په جنګي ګاډيو او آس چلوونکو باندې راشي.“

²⁷نو حضرت موسیٰ خپل لاس د درياب خواته اوږد کړ او د سباوون په وخت کې اوبه خپل اولني حالت ته راوګرځېدلې. مصريانو هڅه وکړه چې وتښتي، مګر څښتن درياب ته وروغورزول.

²⁸اوبه راوګرځېدلې او جنګي ګاډۍ ګانې، آس سواران او ټولې مصري لښکرې يې چې په درياب کې د اسرائيليانو پسې وې غرق کړل او يو هم پاتې نشو.

²⁹مګر اسرائيليان په درياب کې په وچه ځمکه باندې چې اوبه د هغې دواړو خواو ته لکه د دېوالونو په شان ولاړې وې تېر شول.

³⁰په هغه ورځ څښتن اسرائيليان د مصريانو څخه وژغورل او اسرائيليانو هغوی وليدل چې د درياب په غاړه مړه پراته ؤو.

³¹کله چې اسرائيليانو د څښتن لوی قدرت چې هغه مصريانو ته وښوده وليد، قوم د څښتن څخه ووېرېده او په هغه او د هغه په خدمتګار حضرت موسیٰ باندې يې ايمان راوړ.