Read Pashto (Nangahari) — د پښتو مقدس کتاب هجرت 17 Bible Online

هجرت 17 - Pashto (Nangahari) — د پښتو مقدس کتاب bible

هجرت 17

¹د اسرائيلو ټول قوم د سين دښته پرېښودله او د څښتن په امر يې د يو ځای څخه بل ځای ته کډه کوله. هغوی په رفيديم کې خېمې ودرولې، مګر هلته د قوم دپاره د څښلو اوبه نه وې.

²نو هغوی حضرت موسیٰ ته شکايت وکړ او ورته يې وويل: ”مونږ ته د څښلو دپاره اوبه راکړه.“ حضرت موسیٰ په ځواب کې وفرمايل: ”تاسو ولې شکايت کوئ؟ تاسو ولې څښتن ازمايئ؟“

³مګر خلک ډېر تږي ؤو او په حضرت موسیٰ باندې غورېدل. هغوی وويل: ”تا مونږ ولې له مصر څخه راوويستو چې د خپلو ماشومانو او حيواناتو سره مو له تندې مړه کړې؟“

⁴حضرت موسیٰ څښتن ته زارۍ وکړې او ويې فرمايل: ”زه د دې خلکو سره څه وکړم؟ نژدې دى چې دوى مې سنګسار کړي.“

⁵څښتن حضرت موسیٰ ته وفرمايل: ”د اسرائيلو ځينې مشران د ځان سره بوزه او د خلکو په مخ کې ځه. د ځان سره هغه امسا يوسه په کومې چې تا د نيل سيند وهلی ؤ.

⁶زه به د سينا د غره سره په يو ګټ باندې ستا په مخکې ودرېږم. ته هغه ګټ ووهه او خلکو ته به د څښلو دپاره له هغه څخه اوبه جاري شي.“ نو حضرت موسیٰ د اسرائيلو د مشرانو په مخکې همداسې وکړل.

⁷او هغه د دې ځای نوم مسا او مريبه * کېښود، ځکه چې اسرائيليانو شکايت وکړ او څښتن يې وازمايه او ويې ويل: ”آيا څښتن زمونږ په منځ کې دی او که نه؟“

⁸عماليقيان رفيديم ته راغلل او په اسرائيليانو باندې يې حمله وکړه.

⁹حضرت موسیٰ يوشع ته وفرمايل: ”زمونږ له خلکو څخه يو څو تنه انتخاب کړه او لاړ شه د عماليقيانو سره جګړه وکړه. زه به سبا د غونډۍ په سر ودرېږم او د خدای پاک امسا به زما په لاسونو کې وي.“

¹⁰څنګه چې حضرت موسیٰ حکم کړی ؤ، يوشع د عماليقيانو سره جګړه وکړه او حضرت موسیٰ، حضرت هارون او حور د غونډۍ سرته لاړل.

¹¹ترڅو پورې چې د حضرت موسیٰ لاسونه پورته ؤو، اسرائيليان بريالي کېدل. مګر کله چې هغه خپل لاسونه ښکته کول نو عماليقيان به بريالي کېدل.

¹²کله چې د حضرت موسیٰ لاسونه ستړي شول، نو حضرت هارون او حور يوه تيږه راوړه او حضرت موسیٰ يې په هغې باندې کښېناوه. په دواړو خواو يې د حضرت موسیٰ لاسونه پورته ونيول، نو د هغه لاسونه د لمر تر پرېوتلو پورې ټينګ پاتې شول.

¹³په دې ډول يوشع عماليقيانو ته په بشپړه توګه ماتې ورکړه.

¹⁴بيا څښتن حضرت موسیٰ ته وفرمايل: ”د دې بري يو بيان وليکه ترڅو هغه يو يادګار پاتې شي. يوشع ته ووايه چې زه به عماليقيان په بپشړه توګه تباه کړم.“

¹⁵حضرت موسیٰ د قربانۍ ځای جوړ کړ او دا نوم يې ورباندې کېښود څښتن زما د برياليتوب بيرغ دی.

¹⁶هغه وفرمايل: ”د څښتن بيرغ جګ ونيسئ! څښتن به د تل دپاره د عماليقيانو په ضد جګړې ته دوام ورکړي!“