Read Pashto (Nangahari) — د پښتو مقدس کتاب هجرت 18 Bible Online

هجرت 18 - Pashto (Nangahari) — د پښتو مقدس کتاب bible

هجرت 18

¹يترون د مديان کاهن او د حضرت موسیٰ خسر واورېدل چې خدای پاک د حضرت موسیٰ او د اسرائيلو د خلکو دپاره کوم کارونه کړي ؤو او څنګه يې هغوی له مصر څخه راوويستل.

²څه موده مخکې حضرت موسیٰ خپله ښځه صفوره او خپل دوه زامن لېږلي ؤو چې د هغه د خسر يترون سره واوسيږي.

³د حضرت موسیٰ د اولني زوی نوم جرشون * ؤ، ځکه کله چې د هغه هلک پيدا شو نو حضرت موسیٰ فرمايلي ؤو: ” زه په پردۍ خاوره کې مسافر يم.“

⁴هغه وفرمايل: ”د خپل پلار خدای زما سره مرسته وکړه او زه يې له دې څخه وژغورلم چې فرعون مې ووژني“ نو په دې خاطر يې د بل زوی نوم العازار * کېښود.

⁵يترون د حضرت موسیٰ د ښځې او د هغې د دوو زامنو سره هغې دښتې ته راغی چېرته چې حضرت موسیٰ مقدس غره ته نژدې خېمه ودرولې وه.

⁶يترون هغه ته دا خبر ورولېږه: ”زه ستا خسر يترون ستا د ښځې او دوو زامنو سره تاته راځم.“

⁷نو حضرت موسیٰ د هغه مخې ته ورغی او هغه ته يې د احترام دپاره سر ټيټ کړ او هغه يې ښکل کړ. هغوی د يو بل د صحت پوښتنه وکړه او بيا د حضرت موسیٰ خېمې ته ورننوتل.

⁸حضرت موسیٰ خپل خسر ته د هغو کارونو په هکله چې څښتن د اسرائيلو د خلاصون په خاطر په فرعون او د مصر په خلکو باندې کړي ؤو بيان کړل. همدارنګه د هغو ټولو سختيو په هکله يې ورته وويل چې هغوی په لاره کې ورسره مخامخ شوي ؤو او څښتن هغوی څنګه وژغورل.

⁹يترون د هغه احسان په سبب چې څښتن په اسرائيلو باندې کړی ؤ چې هغوی يې له مصريانو څخه وژغورل خوشحاله شو.

¹⁰هغه وويل: ”د څښتن ثنا او صفت دې وي چې تاسو يې د فرعون او د مصريانو څخه وژغورلئ! د څښتن ثنا او صفت دې وي چې خپل قوم يې له غلامۍ څخه وژغوره!

¹¹اوس زه پوهېږم چې څښتن له ټولو نورو خدايانو څخه لوی دی، ځکه چې هغه اسرائيل د خپلو مغرورو دښمنانو څخه خلاص کړل.“

¹²بيا د حضرت موسیٰ خسر يترون سوزېدونکې نذرانه او نورې قربانۍ خدای پاک ته راوړلې او حضرت هارون د اسرائيلو د ټولو مشرانو سره راغی چې د عبادت په ځای کې د حضرت موسیٰ د خسر سره ډوډۍ وخوري.

¹³بله ورځ حضرت موسیٰ په يو ځاى کې کښېناست چې د خلکو دعوې فيصله کړي او هغه د سهار څخه تر ماښام پورې مصروف ؤ.

¹⁴کله چې يترون هغه ټول کارونه وليدل چې حضرت موسیٰ کول، هغه پوښتنه وکړه: ”دا څه دي چې ته يې د خلکو دپاره کوې؟ دا کار ولې په يوازې ځان کوې او خلک د سهار څخه نيولې تر ماښامه پورې درڅخه چاپير وي چې تا سره مشوره وکړي؟“

¹⁵حضرت موسیٰ په ځواب کې وفرمايل: ”ځکه چې خلک دلته راځي چې په دې پوه شي چې خدای پاک د هغوی څخه څه غواړي چې ويې کړي.

¹⁶کله چې دوه تنه په خپل منځ کې کومه شخړه ولري، هغوی ماته راځي او زه دا پرېکړه کوم چې څوک په حقه دی. بيا هغوی ته د خدای پاک فرمانونه او قوانين بيانوم.“

¹⁷بيا يترون وويل: ”ته دا کار په صحيح طريقې سره نه کوې.

¹⁸ته به خپل ځان او دا خلک سخت ستړي کړې. دا کار ستا دپاره ډېر سخت دی، ته يوازې دا کار نشې کولی.

¹⁹اوس ماته غوږ ونيسه چې تاته يوه ښه مشوره درکړم او خدای پاک به ستا سره مل وي. ستا دپاره دا ښه ده چې ته د خدای پاک په حضور کې د قوم نماينده ګي وکړې او د هغوی شخړې هغه ته راوړې.

²⁰هغوی ته د خدای پاک فرمانونه او قوانين ورزده کړه او د ژوند کولو طريقه وروښايه او ورته وښايه چې څه بايد وکړي.

²¹مګر له ټول قوم څخه لايق نفر وټاکه، داسې نفر چې د خدای پاک څخه وېريږي او د اعتبار وړ وي او د رشوت څخه کرکه کوي. هغوی په زر نفري، سل نفري، پنځوس نفري او لس نفري ډلو باندې مشران وټاکه.

²²هغوی پرېږده چې په دايمي توګه د قاضيانو په توګه د قوم خدمت وکړي. هغوی به سختې دعوې تاته راوړي او د کوچنيو شخړو پرېکړه به په خپله کوي. او په دې به ستا کار اسانه او بار به دې سپک شي.

²³که چېرې ته دا کار د خدای پاک د امر سره سم وکړې، هم به خپله ستړی نشې او هم به د خلکو شخړې ژر حل شي او په خاطر جمعۍ سره به وکولی شي چې خپلو کورونو ته لاړ شي.“

²⁴حضرت موسیٰ د خپل خسر مشوره ومنله

²⁵او د ټولو اسرائيليانو څخه يې قابله نفر وټاکل. هغوی يې په زر نفري، سل نفري، پنځوس نفري او لس نفري ډلو باندې مشران وټاکل.

²⁶هغوی به همېشه د قاضيانو په توګه د خلکو خدمت کاوه. هغوی به سختې دعوې حضرت موسیٰ ته راوړلې، مګر د ساده دعوو پرېکړه به يې په خپله کوله.

²⁷بيا حضرت موسیٰ خپل خسر يترون رخصت کړ او يترون خپل وطن ته ستون شو.