Read Pashto (Nangahari) — د پښتو مقدس کتاب هجرت 19 Bible Online

هجرت 19 - Pashto (Nangahari) — د پښتو مقدس کتاب bible

هجرت 19

¹۱‏-۲ د اسرائيلو قوم له رفيديم څخه لاړ او د مصر څخه له راوتلو وروسته د دريمې مياشتې په اوله ورځ د سينا دښتې ته راغلل. هلته يې د سينا د غره په لمنه کې خېمې ودرولې.

³حضرت موسیٰ د خدای پاک سره د ملاقات دپاره غره ته وخوت. څښتن هغه ته د غره څخه غږ وکړ او ورته ويې فرمايل: ”د يعقوب اولادې يعنې اسرائيليانو ته داسې ووايه:

⁴تاسو وليدل چې ما په مصريانو باندې څه وکړل او څنګه مې تاسو لکه د عقاب په شان چې خپل بچيان په خپلو وزرونو باندې وړي دلته خپل ځان ته راوستلئ.

⁵اوس که چېرې تاسو په وفادارۍ سره زما اطاعت وکړئ او زما په لوظ باندې ټينګ ودرېږئ، بيا به تاسو په ټولو قومونو کې زما خاص قوم شئ. که څه هم دا ټوله دنيا زما ده،

⁶خو تاسو به زما دپاره کاهنان او مقدس قوم اوسئ. دا هغه خبره ده چې ته يې بايد اسرائيليانو ته ورسوې.“

⁷نو حضرت موسیٰ د غره څخه راکوز شو او د قوم مشران يې سره راغونډ کړل او څه چې څښتن ورته فرمايلي ؤو، هغوی ته يې بيان کړل.

⁸ټول قوم په يو آواز په ځواب کې وويل: ”هرڅه چې څښتن فرمايلي دي مونږ به په هغه باندې عمل وکړو.“ نو حضرت موسیٰ د هغوی ځواب بېرته څښتن ته راوړ.

⁹څښتن حضرت موسیٰ ته وفرمايل: ”زه به تاته په ټينګې ورېځې کې راشم، نو کله چې زه ستا سره خبرې کوم قوم به يې واوري او په تا باندې به اعتبار وکړي.“ څه چې قوم ويلي ؤو حضرت موسیٰ هغه څښتن ته وويل.

¹⁰څښتن حضرت موسیٰ ته وفرمايل: ”خلکو ته ورشه او ورته ووايه چې نن او سبا خپل ځانونه د عبادت دپاره پاک کړي او بايد خپل کالي ومينځي

¹¹او په دريمه ورځ تيار اوسي. ځکه چې زه په هغه ورځ د ټولو خلکو په حضور کې د سينا غره ته راښکته کېږم.

¹²د غره ګردچاپېره حد وټاکه چې خلک ورڅخه تېر نشي او هغوی ته ووايه: پام کوئ چې غره ته راونه خېژئ او حتیٰ هغه ته نژدې هم ورنشئ. که څوک په هغه باندې پښه کېږدي نو وبه وژل شي.

¹³هغه بايد سنګسار شي او يا په غشو وويشتل شي او هيڅوک بايد هغه ته لاس ورنه وړي. دا به په انسان او حيوان دواړو باندې عملي کيږي. مګر کله چې سرنی ووهل شي، بيا خلک کولی شي چې د غره لمنې ته راشي.“

¹⁴بيا حضرت موسیٰ له غره څخه راښکته شو او خلکو ته يې وفرمايل چې د عبادت دپاره تيار شي. نو هغوی خپل کالي ومينځل

¹⁵او حضرت موسیٰ خلکو ته وفرمايل: ”د دريمې ورځې دپاره ځانونه تيار کړئ او په دې موده کې ښځو ته مه ورنژدې کېږئ.“

¹⁶د دريمې ورځې په سهار تندر او برېښنا شوه او د غره په سر باندې يوه ټينګه ورېځ ښکاره شوه او د سرني يو ډېر لوړ غږ واورېدل شو. ټول خلک چې په کمپ کې ؤو د وېرې له لاسه ولړزېدل.

¹⁷حضرت موسیٰ هغوی د کمپ څخه دباندې راوستل چې د خدای پاک سره ملاقات وکړي او هغوی د غره په لمنه کې ودرېدل.

¹⁸د سينا ټول غر په لوګي کې پټ ؤ، ځکه چې څښتن په هغه باندې په اور کې راښکته شوی ؤ. دا لوګی د داش د لوګي په شان پورته کېده او ټول غر سخت لړزېده.

¹⁹د سرني غږ نور هم لوړېده. حضرت موسیٰ خبرې کولې او خدای پاک هغه ته په تندر کې ځواب ورکاوه.

²⁰څښتن د سينا د غره په سر راښکته شو او حضرت موسیٰ يې د غره سرته راوغوښت. حضرت موسیٰ وروخوت

²¹او څښتن هغه ته وفرمايل: ”ښکته لاړ شه او خلکو ته خبرداری ورکړه چې له حد څخه راوانه وړي چې راشي او ما وويني. که چېرې داسې وکړي، له هغوی څخه به ډېر نفر مړه شي.

²²حتیٰ کاهنان هم چې ماته نژدې راځي بايد ځانونه پاک کړي او که نه زه به هغوی ته هم سزا ورکړم.“

²³حضرت موسیٰ څښتن ته وفرمايل: ”خلک د سينا غره ته نشي راختلی، ځکه چې تا په خپله مونږ ته خبرداری راکړ چې د غره ګردچاپېره حد وټاکو او هغه غر مقدس وګڼو.“

²⁴څښتن په ځواب کې وفرمايل: ”ښکته لاړ شه او هارون د ځان سره راوخېژوه. مګر کاهنان او خلک بايد د خپل حد څخه راتېر نشي چې ماته راشي. که نه، نو زه به ورته سزا ورکړم.“

²⁵بيا حضرت موسیٰ خلکو ته ورښکته شو او د څښتن خبرې يې ورته وکړې.