Read Pashto (Nangahari) — د پښتو مقدس کتاب هجرت 2 Bible Online

هجرت 2 - Pashto (Nangahari) — د پښتو مقدس کتاب bible

هجرت 2

¹په همدې وخت کې يو سړي چې د لاوي د قبيلې څخه ؤ د خپلې قبيلې د يوې ښځې سره واده وکړ.

²هغه ښځه اميدواره شوه او زوی يې پيدا شو. کله چې هغې وليدل چې ماشوم يې ښکلی دی نو هغه يې د دريو مياشتو دپاره پټ وساته.

³کله چې هغې نور نشو کولی چې هغه ماشوم پټ وساتي، نو د لوخو څخه يې يوه ټوکرۍ جوړه کړه او د قيرو پوښ يې ورته ورکړ. هغې ماشوم په ټوکرۍ کې واچاوه او د نيل د سيند په غاړه يې د لوخو په منځ کې لاهو کړ.

⁴د ماشوم خور لږه لېرې ودرېدله چې وګوري په ماشوم باندې څه کيږي.

⁵په دې وخت کې د فرعون لور د لمبلو دپاره سيند ته راغله او د هغې وينځې د سيند په غاړه ګرځېدلې. په دې وخت کې هغې د لوخو په منځ کې هغه ټوکرۍ وليدله او يوه ښځه يې ورولېږله چې هغه له اوبو څخه راوباسي.

⁶کله چې د فرعون لور ټوکرۍ پرانيستله هغې ماشوم وليد او ورباندې خفه شوه ځکه چې هغه ژړل. هغې وويل: ”دا يو عبرانی ماشوم دی.“

⁷يوناڅاپه د ماشوم خور راغله او پوښتنه يې وکړه: ”آيا ته غواړې چې زه لاړه شم او دغه ماشوم ته يوه عبرانۍ ښځه راولم چې تی ورکړي؟“

⁸د فرعون لور په ځواب کې وويل: ”هو، لاړه شه.“ نو انجلۍ لاړه او د ماشوم خپله مور يې راوستله.

⁹د فرعون لور هغې ښځې ته وويل: ”دا ماشوم واخله او زما دپاره شيدې ورکوه او پالنه يې کوه. زه به تاته پيسې درکوم.“ هغې ماشوم يووړ او د هغه پالنه يې کوله.

¹⁰کله چې دا ماشوم لوی شو، نو هغه يې د فرعون لور ته يووړ او هغې لکه د خپل زوی په شان وساته. هغې په دې ماشوم باندې د موسیٰ * نوم کېښود، ځکه چې هغې د ځان سره وويل: ”ما هغه له اوبو څخه راوويست.“

¹¹کله چې حضرت موسیٰ لوی شو، هغه د خپل قوم سره د ليدنې کتنې دپاره لاړ. هغه وليدل چې د هغه قوم څومره سخت کار کاوه. هغه يو مصری وليد چې يو عبرانی ورور يې واهه.

¹²حضرت موسیٰ يو خوا بل خوا وکتل کله چې پوه شو څوک يې نه ويني، نو هغه مصری يې وواژه او په شګه کې يې پټ کړ.

¹³کله چې حضرت موسیٰ بله ورځ ووت، هغه دوه عبرانيان وليدل چې يو د بل سره يې جګړه کوله. نو حضرت موسیٰ له هغه يو څخه چې ملامت ؤ پوښتنه وکړه: ”ته ولې خپل عبرانی وطندار وهې؟“

¹⁴هغه سړي په ځواب کې وويل: ”ته چا زمونږ قاضي او حاکم ټاکلی يې؟ ته غواړې چې ما هم ووژنې لکه څنګه چې دې هغه مصری وواژه؟“ حضرت موسیٰ د دې خبرې په اورېدلو ووېرېده او د ځان سره يې وويل: ”خلک پوه شوي دي چې ما څه کړي دي.“

¹⁵کله چې فرعون د حضرت موسیٰ د کار څخه خبر شو، هغه د حضرت موسیٰ د وژلو هڅه وکړه. مګر هغه د مديان خاورې ته وتښتېده. يوه ورځ حضرت موسیٰ د کوهي په غاړه ناست ؤ،

¹⁶چې د مديان کاهن يترون اوه لورګانې راغلې چې اوبه راوباسي او د خپلې رمې دپاره اخورونه ډک کړي.

¹⁷مګر څو شپنو د يترون لورګانې وشړلې. بيا حضرت موسیٰ د هغوی سره د مرستې کولو دپاره ورغی او رمې ته يې اوبه ورکړې.

¹⁸کله چې د يترون لورګانې خپل کور ته راستنې شوې، نو پلار يې پوښتنه ورڅخه وکړه: ”تاسو نن دومره وختي ولې راغلئ؟“

¹⁹هغوی په ځواب کې وويل: ”يو مصري د شپنو څخه وژغورلو او زمونږ دپاره يې اوبه راوويستلې او رمې ته يې ورکړې.“

²⁰يترون پوښتنه وکړه: ”هغه چېرته دی؟ تاسو ولې هغه هلته پرېښود؟ هغه ته بلنه ورکړئ چې زمونږ سره ډوډۍ وخوري.“

²¹نو حضرت موسیٰ موافقه وکړه چې د يترون سره پاتې شي او هغه خپله لور صفوره حضرت موسیٰ ته په نکاح ورکړه.

²²کله چې د هغې زوی پيدا شو، حضرت موسیٰ وفرمايل: ”زه به د هغه نوم جرشون * کېږدم ځکه چې زه په دې خاوره کې بېګانه يم.“

²³وروسته له ډېرو کلونو د مصر پادشاه مړ شو. اسرائيليانو لا د غلامۍ له کبله فريادونه کول او د خدای پاک څخه يې مرسته غوښتله.

²⁴خدای پاک د دوی فرياد واورېده او هغه لوظ يې را په ياد کړ چې د حضرت ابراهيم، حضرت اسحاق او حضرت يعقوب سره يې کړی ؤ،

²⁵ځکه چې خدای پاک وليدل چې د هغه په قوم باندې څه تېريږي. نو هغه ورباندې ډېر اندېښمن شو.