Read Pashto (Nangahari) — د پښتو مقدس کتاب هجرت 23 Bible Online

هجرت 23 - Pashto (Nangahari) — د پښتو مقدس کتاب bible

هجرت 23

¹د درواغو خبر مه خپروئ. د درواغو په شاهدۍ ورکولو سره د بدکاره سړي سره مرسته مه کوئ.

²په بد کار کې د اکثريت څخه پيروي مه کوئ. کله چې تاسو په يوه دعوه کې شاهدي ورکوئ، د اکثريت څخه په پلوي کولو سره عدالت تر پښو لاندې کوئ مه.

³د يو غريب سړي په محاکمه کې په دې خاطر چې هغه غريب دی د هغه طرفداري مه کوئ.

⁴که چېرې تاسو يوناڅاپه د خپل دښمن غويی يا خر ووينئ چې لار يې غلطه کړې ده، هغه بېرته ورولئ.

⁵که چېرې تاسو وليدل چې ستاسو د دښمن خر د بار لاندې پرېوتی دی، هغه هلته مه پرېږدئ، د هغه سره مرسته وکړئ چې خر يې بېرته پاڅيږي.

⁶په محکمه کې د غريب سره بې انصافي مه کوئ.

⁷په درواغو تهمت مه لګوئ او د يو بې ګناه يا صادق سړي د مړينې سبب کېږئ مه. ځکه چې زه به ګنهکار ونه بخښم.

⁸رشوت مه اخلئ، ځکه چې رشوت بينا خلک ړندوي او د بې ګناه خلکو حق ورباندې تر پښو لاندې کيږي.

⁹په يو مسافر سړي باندې تېری مه کوئ. ځکه چې تاسو خپله په مصر کې مسافران وئ او د مسافرانو د حال څخه خبر يئ.

¹⁰تاسو بايد شپږ کاله خپلې ځمکې وکرئ او حاصل يې ورېبئ.

¹¹مګر په اووم کال هغه ځمکه شاړه پرېږدئ او څه شی چې په کې شنه شوي وي هغه ورڅخه مه رېبئ. څه چې په کې پاتې وي هغه به غريبان خلک او وحشي حيوانات وخوري. خپل د انګورو باغونو او د زيتونو د ونو د باغونو سره همداسې کار وکړئ.

¹²په هفته کې شپږ ورځې خپل کار وکړئ، مګر په اوومه ورځ کار مه کوئ ترڅو ستاسو غلامان او بېګانه خلک چې ستاسو دپاره کار کوي او حتیٰ ستاسو حيوانات هم وکولی شي آرام وکړي.

¹³هرڅه چې ما څښتن درته ويلي دي په هغو باندې عمل کوئ. د نورو خدايانو په نوم دعا مه کوئ، حتیٰ د هغوی نومونه په ژبه هم مه اخلئ.

¹⁴زما د احترام په خاطر په کال کې درې ځله اخترونه کوئ،

¹⁵اول د فطيرې ډوډۍ اختر. لکه څنګه چې ما درباندې امر کړی دی اوه ورځې فطيره ډوډۍ وخورئ. دا کار د ابيب په مياشت کې وکړئ، ځکه چې په دې مياشت کې تاسو له مصر څخه راووتلئ. په دې اختر کې دې هيڅوک زما حضور ته خالي لاس نه راځي.

¹⁶تاسو د لو کولو اختر د خپلو اولنيو حاصلاتو سره چې په خپلو پټيو کې مو کرلي دي ولمانځئ. د کال په آخر کې د حاصل د راټولولو اختر ولمانځئ، يعنې کله چې تاسو د پټيو څخه حاصل راټولوئ.

¹⁷هر کال بايد په دغو دريو اخترونو کې ستاسو ټول نارينه زما يعنې ستاسو د څښتن خدای د عبادت دپاره راشي.

¹⁸کله چې تاسو ماته يو حيوان قرباني کوئ، د هغه سره خميره ډوډۍ مه وړاندې کوئ. هغه حيوانات چې په دغو اخترونو کې ماته قرباني کيږي، د هغې وازګه بايد تر سهاره پورې پاتې نشي.

¹⁹هر کال د خپل څښتن خدای کور ته د خپل اولني حاصل ډېرې ښې غلې دانې راوړئ. يو سېرلی د خپلې مور په شيدو کې مه پخوئ.

²⁰ګورئ، زه ستاسو مخې ته يوه فرښته درلېږم چې په لاره کې ستاسو ساتنه وکړي او هغه ځای ته مو راولي چې ستاسو دپاره مې تيار کړی دی.

²¹هرڅه چې هغه فرښته فرمايي په غور سره ورڅخه اطاعت وکړئ. د هغې په مقابل کې سرکشي مه کوئ، هغه به ستاسو سرکشي ونه بخښي، ځکه چې پوره اختيار مې ورته ورکړی دی.

²²که چېرې تاسو په غور سره د هغې خبرو ته غوږ ونيسئ او زما ټولې خبرې ومنئ، زه به ستاسو د دښمنانو دښمن شم او زه به د هغه چا په خلاف شم څوک چې ستاسو په خلاف وي.

²³زما فرښته به ستاسو په مخکې روانه وي او تاسو به د اموريانو، حيتيانو، فرزيانو، کنعانيانو، حويانو او يبوسيانو خاورې ته بوزي او زه به هغوی ټول له منځه يوسم.

²⁴د هغوی خدايانو ته سجده يا عبادت مه کوئ او د هغوی د رواجونو څخه پيروي مه کوئ. د هغوی بتان له منځه يوسئ او هغه لويې تيږې چې د هغوی د عبادت دپاره استعماليږي ټوټې ټوټې کړئ.

²⁵که چېرې تاسو زما يعنې د خپل څښتن خدای عبادت وکړئ نو زه به ستاسو په خوراک او اوبو کې برکت واچوم او ستاسو ټولې ناروغۍ به لېرې کړم.

²⁶ستاسو په خاوره کې به هيڅ يوه ښځه خپل اولاد نقصان نه کړي او نه به شنډه شي. زه به تاسو ته اوږده عمرونه درکړم.

²⁷زه به په هغو قومونو باندې سخته وېره راولم او ستاسو دښمنان به دومره وارخطا کړم چې درڅخه وتښتي.

²⁸زه به ستاسو په دښمنانو کې سخته وېره پيدا کړم او حويان، کنعانيان او حيتيان به ستاسو له مخې څخه لېرې کړم.

²⁹مګر زه به هغوی په يو کال کې ونه باسم، ځکه چې ځمکه به ويجاړه پاتې شي او وحشي حيوانات به ډېر زيات شي.

³⁰بلکه هغوی به لږ لږ شړم ترڅو تاسو دومره ډېر شئ چې هغه خاوره ونيسئ.

³¹زه به ستاسو د خاورې سرحدونه د سرې بحيرې څخه نيولې د مديترانې تر بحيرې پورې او د دښتې څخه نيولې د فرات تر سينده پورې وغزوم. زه به ستاسو سره مرسته وکړم چې هغو خلکو ته چې اوس په دې خاوره کې اوسيږي ماتې ورکړئ او هغوی به وشړئ.

³²د هغوی يا د هغوی د خدايانو سره هيڅ قسم تړون مه کوئ.

³³هغوی مه پرېږدئ چې ستاسو په هېواد کې واوسيږي. که چېرې تاسو هغوی پرېږدئ، هغوی به تاسو زما په مقابل کې په ګناه کولو باندې مجبور کړي. که چېرې تاسو د هغوی د خدايانو عبادت وکړئ، نو دا به ستاسو دپاره يو وژونکی دام وي.“