Read Pashto (Nangahari) — د پښتو مقدس کتاب هجرت 24 Bible Online

هجرت 24 - Pashto (Nangahari) — د پښتو مقدس کتاب bible

هجرت 24

¹څښتن حضرت موسیٰ ته وفرمايل: ”ته، هارون، ناداب، ابيهو او د اسرائيلو اويا مشران ماته غره ته راوخېژئ او له لېرې فاصلې څخه راته سجده وکړئ.

²يوازې ته ماته نژدې راشه او نور دې راته نژدې نه راځي. د اسرائيلو د قوم د نورو خلکو څخه دې هيڅوک هم غره ته نه راخېژي.“

³کله چې حضرت موسیٰ راغی او خلکو ته يې د څښتن ټولې خبرې او قوانين اعلان کړل، هغوی په يو آواز په ځواب کې وويل: ”مونږ به د څښتن په هره خبره باندې عمل کوو.“

⁴حضرت موسیٰ د څښتن ټول امرونه وليکل. هغه سهار وختي پاڅېد او د غره په لمنه کې يې د قربانۍ ځای جوړ کړ او هلته يې دولس تيږې چې د اسرائيلو د دولسو قبيلو نماينده ګي يې کوله ودرولې.

⁵بيا حضرت موسیٰ اسرائيلي ځينې ځوانان ولېږل او هغوی سوزېدونکې نذرانې او ځينې غوايان د سلامتۍ د نذرانې په توګه څښتن ته قرباني کړل.

⁶حضرت موسیٰ نيمه وينه راواخيستله او په لګنونو کې يې واچوله او نيمه يې په قربانګاه باندې وشيندله.

⁷بيا هغه د لوظ کتاب راواخيست او خلکو ته يې په لوړ آواز سره ولوست. هغوی وويل: ”مونږ به د څښتن اطاعت کوو او د هغه په ټولو امرونو باندې به عمل کوو.“

⁸بيا حضرت موسیٰ هغه وينه چې په لګنونو کې وه راواخيستله او په خلکو باندې يې وشيندله. هغه وفرمايل: ”دا د هغه لوظ وينه ده چې څښتن د دغو ټولو حکمونو په مطابق له تاسو سره کړی دی.“

⁹حضرت موسیٰ د حضرت هارون، ناداب، ابيهو او د اسرائيلو د اويا مشرانو سره غره ته وخوت

¹⁰او د اسرائيلو خدای يې وليد. د هغه د پښو لاندې د شين ياقوت د فرش په شان يو څه ښکاره کېدل چې د آسمان په شان شنه ؤو.

¹¹که څه هم د اسرائيلو دغو مشرانو خدای پاک وليد، خو هغه ورته زيان ونه رساوه. بيا هغوی وخوړل او ويې څښل.

¹²څښتن حضرت موسیٰ ته وفرمايل: ”ماته د غره سرته راوخېژه او دلته پاتې شه. زه به تاته د تيږو لوحې چې په هغو باندې مې د خلکو د لارښودنې دپاره حکمونه ليکلي دي درکړم.“

¹³حضرت موسیٰ او د هغه مرستيال يعنې يوشع تيار شول او حضرت موسیٰ مقدس غره ته ورپورته شو.

¹⁴حضرت موسیٰ مشرانو ته وفرمايل: ”تاسو دلته انتظار وباسئ، ترڅو مونږ بېرته راشو. حضرت هارون او حور ستاسو سره دي او هرڅوک چې کومه مسئله لري هغوی ته دې ورشي.“

¹⁵کله چې حضرت موسیٰ غره ته پورته شو، ورېځو غر پټ کړ

¹⁶او د څښتن جلال د سينا په غره باندې خپور شو. غر شپږ ورځې په ورېځو کې پټ ؤ او په اوومه ورځ څښتن له ورېځو څخه حضرت موسیٰ ته غږ وکړ.

¹⁷د څښتن جلال اسرائيليانو ته داسې ښکارېده لکه د غره په سر باندې چې اور بل وي.

¹⁸کله چې حضرت موسیٰ غره ته ورپورته شو، هغه په ورېځو کې ورننوت او څلوېښت ورځې او څلوېښت شپې په غره کې پاتې شو.