Read Pashto (Nangahari) — د پښتو مقدس کتاب هجرت 25 Bible Online

هجرت 25 - Pashto (Nangahari) — د پښتو مقدس کتاب bible

هجرت 25

¹څښتن حضرت موسیٰ ته وفرمايل:

²”اسرائيليانو ته ووايه چې ماته يوه نذرانه راوړي. ته بايد زما دپاره د هغه چا څخه نذرانه واخلې چې زړه يې غواړي وريې کړي.

³دا هغه نذرانې دي چې ته يې بايد د هغوی څخه واخلې: سره زر، سپين زر او برنج،

⁴ښه کتان، آبي، بانجاني او سرې وړۍ، هغه ټوکر چې د وزو د وړيو څخه جوړ شوی وي،

⁵سره رنګ شوي د پسه پوستکي، ښه څرمن، د غز لرګی،

⁶د څراغونو دپاره د زيتون تېل، د مسح کولو د تېلو او د خوشبويۍ دپاره مسالې،

⁷سليماني تيږې او نورې قيمتي تيږې چې د مشر کاهن په مقدس پېشبند او د هغه په سينه پوښ باندې ولګول شي.

⁸بيا په خلکو باندې زما دپاره يوه مقدسه خېمه جوړه کړه ترڅو وکولی شم د هغوی په منځ کې واوسېږم.

⁹دا خېمه او د هغې ټول سامان کټ مټ د هغې نقشې په مطابق جوړ کړه چې زه يې درته ښايم.

¹⁰په هغوی باندې د غز د لرګي څخه يو صندوق جوړ کړه چې يو متر او لس سانتي اوږد وي، پنځه شپېته سانتي پلن وي او پنځه شپېته سانتي لوړ وي.

¹¹د هغه منځنۍ او بيرونۍ برخې ته د سوچه سرو زرو پوښ ورکړه او ګردچاپېره څنډې يې د سرو زرو څخه جوړې کړه.

¹²د هغه دپاره څلور د سرو زرو کړۍ ګانې جوړې کړه او هغه په څلورو پايو باندې وتړه، يعنې دوه کړۍ ګانې په يو خوا او دوه په بلې خوا.

¹³د صندوق د وړلو دپاره د غز د لرګي څخه دوه ميلې جوړې کړه او د سرو زرو پوښ ورته ورکړه.

¹⁴هغه ميلې هغو کړيو ته چې د صندوق په څنګونو کې دي ورننباسه ترڅو صندوق ورباندې يوړل شي.

¹⁵ميلې دې په کړيو کې پاتې شي او هغه بايد راونه ايستل شي.

¹⁶بيا به د تيږو هغه دوه لوحې چې حکمونه ورباندې ليکل شوي دي درکړم چې هغه په صندوق کې کېږدې.

¹⁷د صندوق سرپوښ چې کفاره ورباندې ادا کيږي د سوچه سرو زرو څخه جوړ کړه چې يو متر او لس سانتي اوږد وي او پنځه شپېته سانتي پلن وي.

¹⁸د سرپوښ په سرونو کې د ټکول شويو سرو زرو څخه دوه کروبيان جوړ کړه.

¹⁹يو کروب په يو سر او دوهم کروب په بل سر کې جوړ کړه. په دوو سرونو کې د سرپوښ سره کروبيان د سرو زرو د يوې ټوټې څخه جوړ کړه.

²⁰د کروبيانو وزرونه دې پورته خپاره شوي وي چې په سرپوښ باندې سيوری وکړي. کروبيان دې يو بل ته مخامخ وي او د سرپوښ خواته دې ګوري.

²¹په صندوق کې د تيږو دوه لوحې کېږده او هغه سرپوښ د صندوق دپاسه کېږده.

²²زه به د سرپوښ دپاسه د دوو کربيانو ترمنځ چې د لوظ په صندوق باندې دي ستا سره ليدنه کتنه وکړم او د اسرائيلو د قوم دپاره به خپل ټول حکمونه درکړم.

²³د غز د لرګي څخه يو داسې مېز جوړ کړه چې نوي سانتي اوږد وي، پنځه څلوېښت سانتي پلن وي او پنځه شپېته سانتي لوړ وي.

²⁴هغه ته د سوچه سرو زرو پوښ ورکړه او د هغه ګردچاپېره څنډې د سرو زرو څخه جوړې کړه.

²⁵همدارنګه د هغه ګردچاپېره يو چوکاټ جوړ کړه چې پراخوالی يې پنځه اويا ملي متره وي او په چوکاټ باندې د سرو زرو څنډې جوړې کړه.

²⁶د مېز دپاره څلور د سرو زرو کړۍ ګانې جوړې کړه او په هغو څلورو کنجونو کې چېرته چې څلور پايې دي وتړه.

²⁷کړۍ ګانې دې چوکاټ ته نژدې وي، د دې دپاره چې هغه ميلې ونيسي چې د مېز په وړلو کې ورڅخه کار اخيستل کيږي.

²⁸د غز د لرګي څخه ميلې جوړې کړه، د سرو زرو پوښ ورته ورکړه او مېز ورباندې وړئ.

²⁹ټولې کاسې، قابونه او د څښلو د نذرانو دپاره منګي او جامونه دې د سوچه سرو زرو څخه جوړ شي.

³⁰مېز بايد د لوظ د صندوق مخې ته کېښودل شي او په هغه باندې دې همېشه هغه مقدسه ډوډۍ چې ماته نذرانه کيږي پرته وي.

³¹د سوچه سرو زرو څخه يو څراغدان جوړ کړه او د هغه پايه او ميله، د هغه د پيالو په شان ګلان، غوټۍ ګانې او ګلپاڼې د ټکول شويو سرو زرو څخه جوړ کړه چې ټول د يوې ټوټې سرو زرو څخه جوړ شوي وي.

³²شپږ څانګې دې د څراغدان د څنګونو څخه غزېدلې وي يعنې درې د يو څنګ څخه او درې د بل څخه.

³³درې پيالې چې شکل يې د بادام د ګل په شان دى، د غوټيو او ګلپاڼو سره بايد په يوې څانګې باندې وي، درې په بلې څانګې باندې او همدا ډول د شپږو واړو څانګو دپاره چې د څراغدان څخه غزيږي.

³⁴په خپله په څراغدان باندې دې څلور د بادام د ګل په شان پيالې وي، د غوټۍ ګانو او ګلپاڼو سره.

³⁵يوه غوټۍ به د څانګو د اولې جوړې لاندې وي چې د څراغدان څخه غزيږي، دوهمه غوټۍ د دوهمې جوړې لاندې او دريمه غوټۍ د دريمې جوړې لاندې يعنې ټولې شپږ څانګې.

³⁶غوټۍ ګانې، څانګې او څراغدان دې د ټکول شويو سوچه سرو زرو د يوې ټوټې څخه وي.

³⁷د څراغدان دپاره اوه څراغونه جوړ کړه او ويې دروه ترڅو مخې ته رڼا ورکړي.

³⁸د هغه پلته پاکوونکي او پتنوسونه دې د سوچه سرو زرو وي.

³⁹د څراغدان او د هغه د ټول سامان په جوړولو کې د څلوردېرشو کيلوګرامه سوچه سرو زرو څخه کار واخله.

⁴⁰دې خبرې ته پام وکړه چې دا د هغې نقشې په مطابق جوړ کړې چې ما درته په غره باندې دروښودله.