Read Pashto (Nangahari) — د پښتو مقدس کتاب هجرت 27 Bible Online

هجرت 27 - Pashto (Nangahari) — د پښتو مقدس کتاب bible

هجرت 27

¹د غز د لرګي څخه د قربانۍ يو ځای جوړ کړه چې يو متر او دېرش سانتي لوړ وي. هغه دې څلور کنجه وي، دوه متره او شل سانتي دې اوږد وي او دوه متره او شل سانتي دې پلن وي.

²د څلورو کنجونو دپاسه برجونه جوړ کړه ترڅو برجونه او قربانګاه ټول د يوې ټوټې لرګي څخه جوړ شي او ټولو ته دې د برنجو پوښ ورکړل شي.

³د هغه ټول سامان د برنجو څخه جوړ کړه يعنې د ايرو د لېرې کولو لوښي او د هغه بېلچې، د وينې د شيندلو کاسې، د غوښې قاشق پنجې او د اور لوښي.

⁴يوه د برنجو جالۍ جوړه کړه او د هغې په څلورو کنجونو باندې څلور د برنجو کړۍ ګانې ولګوه.

⁵دا جالۍ د قربانۍ د ځای د څنډې لاندې کېږده ترڅو د قربانګاه تر نيمايي پورې ورسيږي.

⁶د غز د لرګي څخه د وړلو ميلې جوړې کړه او د برنجو پوښ ورته ورکړه

⁷او د وړلو په وخت کې يې د قربانۍ د ځای د دواړو اړخونو په کړيو کې ولګوه.

⁸د هغې نقشې په مطابق چې ما درته په غره باندې دروښودله، د قربانۍ ځای د تختو څخه جوړ کړه او تش يې پرېږده.

⁹د ښه کتان د پردو څخه د مقدسې خېمې دپاره يوه حويلۍ جوړه کړه چې جنوب خوا يې پنځه څلوېښت متره اوږده وي.

¹⁰هغه دې د برنجو په شلو پايو کې د شلو برنجي ستنو په وسيله د چنګکونو او سيخونو سره چې د سپينو زرو څخه جوړ شوي دي ټينګه شي.

¹¹د حويلۍ شمال خوا دې هم همداسې جوړه شي.

¹²د حويلۍ لويديځې خواته به دوه ويشت متره اوږدې پردې وي د لسو ستنو او پايو سره.

¹³ختيځې خواته يعنې په هغه ځای کې چې د ننوتلو دروازه ده، هم بايد حويلۍ دوه ويشت متره پلنه وي.

¹⁴۱۴‏-۱۵ د دروازې دواړو خواو ته دې د درې ستنو او پايو سره اوه متره پردې وي.

¹⁶د حويلۍ د دروازې دپاره دې يوه داسې پرده وي چې نهه متره اوږده وي. هغه دې د آبي، بانجاني او سرو وړيو او د ښه کتان څخه جوړه وي او د ګلدوزۍ کار دې په کې وشي. هغه دې د څلورو ستنو او څلورو پايو په وسيله ټينګه کړای شي.

¹⁷ټولې ستنې چې د حويلۍ ګردچاپېره دي، د سپينو زرو د سيخونو سره دې ونښلول شي او چنګکونه يې بايد د سپينو زرو څخه جوړ شي او پايې يې د برنجو څخه.

¹⁸حويلۍ دې پنځه څلوېښت متره اوږده او دوه ويشت متره پلنه وي. پردې دې د ښه کتان څخه جوړې شي چې دوه متره او شل سانتي لوړې وي او د برنجو پايې به هم ورسره وي.

¹⁹نور ټول سامان چې په خېمې کې ورڅخه کار اخيستل کيږي او هغه ټول مېخونه چې د خېمې او حويلۍ دپاره دي، هغه دې د برنجو څخه جوړ شوي وي.

²⁰په اسرائيليانو باندې امر وکړه چې د رڼا دپاره د زيتونو سوچه تېل راوړي ترڅو څراغونه بل وساتل شي.

²¹په مقدسه خېمه کې د هغې پردې څخه دباندې چې د لوظ د صندوق په مخ کې ده، هارون او د هغه زامن دې دا څراغونه د ماښام څخه نيولې تر سهاره پورې د څښتن په حضور کې بل وساتي. اسرائيليان او د هغو اولاده دې د تل دپاره په دې حکم باندې عمل کوي.