Read Pashto (Nangahari) — د پښتو مقدس کتاب هجرت 28 Bible Online

هجرت 28 - Pashto (Nangahari) — د پښتو مقدس کتاب bible

هجرت 28

¹خپل ورور هارون او د هغه زامن ناداب، ابيهو، العازار او ايتامار راوغواړه. هغوی د اسرائيلو د خلکو څخه جلا کړه ترڅو د کاهنانو په توګه زما خدمت وکړي.

²خپل ورور هارون دپاره خاص لباس جوړ کړه، ترڅو هغه ته عزت او ښکلا وروبخښي.

³ټولو هغو ماهرو خلکو ته چې ما ورته په داسې کارونو کې توان ورکړی دی ووايه چې د هارون دپاره لباس جوړ کړي، ترڅو هغه د کاهن په توګه زما خدمت ته وقف شي.

⁴هغه لباس چې هغوی يې بايد جوړ کړي: سينه پوښ، مقدس پېشبند، چپنه، اوبدل شوی کميس، لونګۍ او يوه پټۍ. هغوی دې دا خاص لباس ستا ورور هارون او د هغه د زامنو دپاره جوړ کړي، ترڅو هغوی وکولی شي چې د کاهنانو په توګه زما خدمت وکړي.

⁵هغه ماهر نفر دې د آبي، بانجاني او سرو وړيو، د سرو زرو د تار او د ښه کتان څخه کار واخلي.

⁶د سرو زرو تار او د آبي، بانجاني او سرو وړيو او د ښه کتان څخه مقدس پېشبند جوړ کړه، په دې کې دې ګلدوزي وشي.

⁷مقدس پېشبند دې د اوږې دوه تسمې ولري چې د هغه په دواړو خواو باندې ونښلول شي چې پېشبند ورسره وتړل شي.

⁸ښه اوبدل شوی کمربند چې د همدغه شان موادو څخه جوړ شي، هغه دې د مقدس پېشبند سره ونښلول شي چې د يوې ټوټې په شان ښکاره شي.

⁹دوه سليماني تيږې واخله او د يعقوب د زامنو د نومونو نقش ورباندې وباسه،

¹⁰يعنې د هغوی د عمر په ترتيب، شپږ نومونه په يوه تيږه باندې او پاتې شپږ په بله تيږه باندې.

¹¹د يعقوب د زامنو د نومونو نقش په دوو تيږو باندې داسې وباسه لکه څنګه چې د غمي جوړوونکی د يو مهر نقش وباسي. بيا تيږې په هغو ځايونو کې ولګوه چې د سرو زرو د قابونو په شان جوړ شوي دي.

¹²هغه تيږې د مقدس پېشبند د اوږې په تسمو باندې ولګوه چې د اسرائيلو د دولسو قبيلو استازيتوب وکړي. په دې ډول به هارون د هغوی نومونه په خپلو اوږو باندې انتقالوي، ترڅو زه څښتن تل خپل قوم په ياد وساتم.

¹³د سرو زرو د قابونو په شان دوه ځايونه جوړ کړه

¹⁴او دوه د سوچه سرو زرو تاو شوي ځنځيرونه د يوې رسۍ په شان جوړ کړه او په هغو ځايونو کې يې ولګوه.

¹⁵د مشر کاهن دپاره سينه پوښ جوړ کړه چې د خدای پاک د رضا د معلومولو دپاره ورڅخه کار واخلي. هغه دې د هماغو موادو څخه جوړ شي چې مقدس پېشبند ورڅخه جوړ شوی دی او هماغسې ګلدوزي دې په کې وشي.

¹⁶هغه دې څلور کنجه وي، دوه ويشت سانتي دې اوږد وي او دوه ويشت سانتي دې پلن وي او دوه قاته دې وي.

¹⁷بيا په هغه باندې څلور قطاره قيمتي تيږې ولګوه. په اول قطار کې يو ياقوت، يو ژيړ ياقوت او يو لعل ولګوه.

¹⁸په دوهم قطار کې يو زمروت، يو شين ياقوت او يو الماس ولګوه.

¹⁹په دريم قطار کې يوه فيروزه، يو عقيق او يو ارغواني ياقوت ولګوه

²⁰او په څلورم قطار کې يو شينکی ياقوت، يوه سليماني تيږه او يو يشم ولګوه. هغه دې په داسې ځايونو کې ولګول شي چې د سرو زرو د قابونو په شان جوړ شوي دي.

²¹دولس تيږې دې وي، د يعقوب د زامنو د هر نوم دپاره يوه يوه تيږه. په هرې يوې کې دې د يو مهر په شان نقش وايستل شي او د دولسو قبيلو څخه دې د يوې قبيلې نوم په کې وي.

²²د سينه پوښ دپاره د سوچه سرو زرو څخه داسې ځنځيرونه جوړ کړه چې د يوې رسۍ په شان تاو شوي وي.

²³دوه د سرو زرو کړۍ ګانې جوړې کړه او د سينه پوښ په پورتنيو کنجونو يې ونښلوه

²⁴او په دغو دوو کړيو باندې دوه د سرو زرو ځنځيرونه وتړه.

²⁵د ځنځيرونو دوه نور سرونه د هغو ځايونو پورې وتړه چې د سرو زرو څخه جوړ شويو قابونو په شان دي او په دې ډول يې د مقدس پېشبند د اوږې د تسمو په مخکينۍ برخې باندې ونښلوه.

²⁶بيا د سرو زرو دوه کړۍ ګانې جوړې کړه او د سينه پوښ په لاندينيو کنجونو پورې يې ونښلوه. هغه دې په دننۍ څنډې باندې د مقدس پېشبند په څنګ کې وي.

²⁷دوه نورې کړۍ ګانې جوړې کړه او د اوږې د تسمو په لاندينۍ برخه کې يې ونښلوه چې د مقدس پېشبند په مخکينۍ برخې باندې بخۍ ته نژدې او د مقدس پېشبند د کمربند دپاسه دي.

²⁸د سينه پوښ کړۍ ګانې دې د مقدس پېشبند د کړۍ ګانو سره چې کمربند سره وصل دي په آبي مزي باندې وتړل شي، ترڅو سينه پوښ د مقدس پېشبند څخه لېرې نشي.

²⁹هرکله چې هارون مقدس ځای ته ورننوزي، هغه به هغه سينه پوښ اغوندي چې د اسرائيلو د قبيلو نومونه ورباندې ليکل شوي دي. هغه به دا نومونه د خپل زړه دپاسه وړي، ترڅو زه څښتن تل خپل قوم رايادوم.

³⁰اوريم او تميم * په سينه پوښ کې د هغه د زړه دپاسه کېږده. نو کله چې هارون زما پاک حضور ته راځي، هغه به يې وړي. په داسې وختونو کې بايد هغه همېشه دا سينه پوښ واغوندي، ترڅو د اسرائيلو د قوم دپاره زما رضا معلومه کړي.

³¹هغه چپنه چې د مقدس پېشبند لاندې اغوستل کيږي هغه ټوله دې د آبي ټوکر څخه جوړه شي.

³²د هغې په منځ کې دې د سر دپاره يو سوری پرېښودل شي او د سوري ګردچاپېره دې يوه غاړه وګنډل شي ترڅو چپنه ونه شليږي.

³³د چپنې د لمنې په څنډه باندې د آبي، بانجاني او سرو وړيو څخه داسې انار جوړ کړه چې په منځ کې يې د سرو زرو زنګونه وي.

³⁴د سرو زرو زنګونه او انار دې د چپنې د لمنې ګردچاپېره د يو بل ترمنځ راشي.

³⁵هارون دې د کاهن په توګه د خدمت کولو په وخت کې دغه چپنه واغوندي. کله چې هغه زما حضور ته په مقدس ځای کې راننوزي يا کله چې هغه ځي، د زنګونو آواز به اورېدل کيږي او هغه به نه وژل کيږي.

³⁶د سوچه سرو زرو څخه يو ګل جوړ کړه او په هغه باندې د دې لغتونو يعنې څښتن ته وقف شوی يو نقش وباسه لکه څنګه چې په يو مهر باندې ايستل کيږي.

³⁷هغه ګل په يو آبي مزي باندې د لونګۍ په مخکينۍ برخې پورې وتړه.

³⁸هارون دې هغه په خپل تندي باندې وتړي ترڅو زه څښتن هغه ټولې مقدسې نذرانې چې اسرائيليان يې ماته وقف کوي قبولې کړم، حتیٰ که چېرې خلک د هغو په وړاندې کولو کې کومه سهوه هم وکړي.

³⁹د هارون دپاره د ښه کتان څخه کميس او يوه لونګۍ جوړ کړه. پټۍ هم جوړه کړه او هغه دې ګلدوزي شي.

⁴⁰د هارون د زامنو دپاره کميسونه، پټۍ ګانې او خولۍ ګانې جوړې کړه چې هغوی ته عزت او ښکلا ورکړي.

⁴¹خپل ورور هارون او د هغه زامنو ته دغه لباس ورواغونده. هغوی د زيتون په تېلو باندې مسح کړه او مقرر يې کړه. هغوی وقف کړه ترڅو د کاهنانو په توګه زما خدمت وکړي.

⁴²د هغوی دپاره د کتان داسې نيکرونه جوړ کړه چې د ملا څخه نيولې تر ورنونو پورې ورسيږي چې بدنونه يې ښکاره نشي.

⁴³کله چې هارون او د هغه زامن مقدسې خېمې ته ورننوزي يا د قربانۍ ځای ته ورنژدې کيږي چې په مقدس ځای کې د کاهنانو په توګه خدمت وکړي، بايد هغه تل واغوندي ترڅو هغوی خپل ځانونه ګنهکار نه کړي او مړه نشي. دا دې د هارون او د هغه د اولادې دپاره يو دايمي حکم وي.