Read Pashto (Nangahari) — د پښتو مقدس کتاب هجرت 29 Bible Online

هجرت 29 - Pashto (Nangahari) — د پښتو مقدس کتاب bible

هجرت 29

¹دا هغه مراسم دي چې د کاهنانو په توګه د هارون او د هغه د زامنو د ټاکنې دپاره دې سرته ورسيږي: يو داسې ځوان غويی او دوه پسونه واخله چې کوم عيب په کې نه وي.

²د غنمو د ډېرو ښو اوړو څخه فطيرې ډوډۍ پخې کړه. ځينې د زيتونو په تېلو کې پخې کړه، ځينې بې له تېلو او ځينې يې د کلچو په شکل چې تېل ورباندې موښل شوي وي پخې کړه.

³دا ټولې ډوډۍ په يوې ټوکرۍ کې واچوه او کله چې ته راځې او هغه غويی او دوه پسونه ماته قرباني کوې نو هغه درسره راوړه.

⁴بيا هارون او د هغه زامن د مقدسې خېمې د دروازې خولې ته راوله او غسل ورته ورکړه.

⁵دا کالي واخله او هارون ته يې ورواغونده: کميس، هغه چپنه چې د مقدس پېشبند لاندې اغوستل کيږي، مقدس پېشبند او سينه پوښ. مقدس پېشبند په کمربند باندې وتړه.

⁶هغه ته لونګۍ په سر کړه او په هغې باندې د وقف کولو پاک نښان وتړه په کوم باندې چې نقش ايستل شوی دی.

⁷بيا د مسح کولو تېل واخله او د هغه په سر باندې يې توی کړه او مسح يې کړه.

⁸د هغه زامن راوله او کميسونه ورته واغونده

⁹او خولۍ ګانې ورته په سر کړه. بيا د هارون او د هغه د زامنو په ملاګانو باندې پټۍ ګانې وتړه. په دې ډول به هارون او د هغه زامن وټاکې. هغوی او د هغوی اولاده به د تل دپاره د کاهنانو په توګه زما خدمت کوي.

¹⁰غويی د مقدسې خېمې مخې ته راوله او هارون او د هغه زامن به د هغه په سر باندې خپل لاسونه کېږدي.

¹¹هغه د خېمې د دروازې په خوله کې زما په حضور کې حلال کړه.

¹²د غويي لږه وينه واخله او په خپله ګوته يې په هغو برجونو باندې چې د قربانۍ د ځای په کنجونو کې دي وسولوه. بيا پاتې وينه د قربانۍ د ځای په بېخ کې توی کړه.

¹³بيا ټوله هغه وازګه چې په کولمو باندې پرته وي، د اينې ډېره ښه برخه او د هغه دوه پښتورګي چې وازګه ورباندې پرته وي واخله او هغه ماته د يوې نذرانې په توګه په قربانګاه باندې وسوزوه.

¹⁴مګر د غويي غوښه، پوستکی او خوشايي د کمپ څخه دباندې وسوزوه. دا د ګناه يوه نذرانه ده چې د کاهنانو د ګناهونو د پاکولو دپاره ده.

¹⁵د هغو پسونو څخه يو پسه واخله او هارون او د هغه زامن به خپل لاسونه د هغه په سر باندې کېږدي.

¹⁶هغه حلال کړه او وينه يې واخله او د قربانۍ د ځای په څلورو خواو باندې يې وشينده.

¹⁷پسه ټوټې ټوټې کړه او د نس دننۍ برخې او پښې يې ومينځه او د سر او د نورو ټوټو سره يې کېږده.

¹⁸بيا ټول پسه په قربانګاه باندې وسوزوه. دا زما يعنې څښتن دپاره يوه سوزېدونکې نذرانه ده چې بوی يې په ما باندې ښه لګيږي.

¹⁹هغه بل پسه واخله او هارون او د هغه زامن به خپل لاسونه د هغه په سر باندې کېږدي.

²⁰هغه حلال کړه. لږه وينه يې واخله او د هارون او د هغه د زامنو د ښي غوږونو په نرميو، د ښي لاسونو په غټو ګوتو او د ښي پښو په غټو ګوتو باندې يې وسولوه. بيا پاتې وينه د قربانۍ د ځای په څلورو خواو باندې وشينده.

²¹د هغې وينې څخه لږه وينه چې د قربانۍ په ځای باندې پرته ده واخله او لږ د مسح کولو تېل واخله او په هارون او د هغه په زامنو او د هغوی په کاليو باندې يې وشينده. بيا به هغه، د هغه زامن او د هغوی لباس ماته وقف شي.

²²د پسه وازګه، لم، هغه وازګه چې په کولمو باندې پرته وي، د اينې ډېره ښه برخه، دوه پښتورګي د وازګې سره چې ورباندې پرته وي او ښي ورون، دا ټول ورڅخه پرې کړه. (دا پسه د ټاکنې د مراسمو دپاره دی.)

²³د هغې ټوکرۍ څخه د هر قسم ډوډۍ نه يوه يوه ډوډۍ راواخله

²⁴او دا ټول د هارون او د هغه د زامنو په لاسونو کې کېږده. بيا هغوی دې هغه پورته ونيسي ترڅو دا وښايي چې هغه ماته وقف شوي دي.

²⁵بيا يې د هغوی د لاسونو څخه راواخله او په قربانګاه باندې يې د سوزېدونکې نذرانې سره وسوزوه چې بوی يې په ما څښتن باندې ښه لګيږي.

²⁶کله چې ته د هارون د ټاکلو دپاره د پسه سينه واخلې، نو اول بايد هغه پورته ونيسې ترڅو دا وښايي چې دا غوښه ماته وقف شوې ده. دا به ستا برخه وي.

²⁷۲۷‏-۲۸ په راتلونکي کې کله چې د اسرائيليانو څخه څوک د کاهن د ټاکنې په مراسمو کې او يا د سلامتۍ د نذرانې د وړاندې کولو په وخت کې د پسه سينه او ورون وړاندې کوي، نو غوښه به يې زما وي، خو کاهنان کولی شي هغه وخوري. دا قانون به هيڅکله نه بدليږي.

²⁸

²⁹د هارون مقدس لباس به د هغه له مرګ څخه وروسته د هغه اولادې ته پاتې شي، ترڅو هغوی په کې مسح شي او وټاکل شي.

³⁰د هارون زوی چې د هغه څخه وروسته کاهن کيږي او مقدسې خېمې ته ورننوزي چې په مقدس ځای کې خدمت وکړي، نو هغه دې اوه ورځې دا لباس واغوندي.

³¹هغه پسه چې د ټاکنې د مراسمو دپاره دی واخله او غوښه يې په يو پاک ځای کې پخه کړه.

³²د مقدسې خېمې د دروازې په خولې کې دې هارون او د هغه زامن د پسه غوښه او هغه ډوډۍ چې په ټوکرۍ کې پاتې ده وخوري.

³³يوازې هغوی کولی شي چې د ټاکنې په مراسمو کې هغه غوښه او ډوډۍ چې د هغوی د کفارې د ادا کولو دپاره ورڅخه کار اخيستل کيږي وخوري. عادي خلک نشي کولی هغه وخوري ځکه چې دا شيان مقدس دي.

³⁴که چېرې څه غوښه يا ډوډۍ ونه خوړل شي او تر سهاره پورې پاتې شي، هغه وسوزوه. هغه بايد ونه خوړل شي ځکه چې هغه مقدس دي.

³⁵لکه څنګه چې ما درته حکم کړی دی د هارون او د هغه د زامنو د ټاکنې مراسم دې په اوو ورځو کې سرته ورسيږي.

³⁶ته بايد هره ورځ يو غويی حلال کړې او ماته يې وړاندې کړې ترڅو د هغوی يعنې د هارون او د هغه د زامنو ګناه وبخښم او د قربانۍ ځای پاک شي. برسېره پردې بايد د زيتون تېل واخلې او د قربانۍ ځای ورباندې مسح کړې چې مقدس شي.

³⁷اوه ورځې دا کار وکړه. بيا به د قربانۍ ځای دومره مقدس شي چې هرڅوک يا هر شی چې د هغه سره ولګيږي، هغه به هم مقدس شي.

³⁸ته بايد هره ورځ په قربانګاه باندې دوه يو کلن وري قرباني کړې.

³⁹يو په سهار کې قرباني کړه او بل په ماښام کې.

⁴⁰د اولني وري سره يو کيلوګرام ښه اوړه وړاندې کړه چې يو ليتر سوچه د زيتونو تېل ورسره ګډ وي او د څښلو د نذرانې په توګه يو ليتر د انګورو شربت وړاندې کړه.

⁴¹دوهم وری په ماښام کې قرباني کړه او د هغه سره هماغه اندازه اوړه، د زيتون تېل او د انګورو شربت وړاندې کړه لکه څنګه چې په سهار کې دې وکړل. دا زما دپاره يوه سوزېدونکې نذرانه ده او د هغې بوی په ما باندې ښه لګيږي.

⁴²دا سوزېدونکې نذرانه دې د تل دپاره هره ورځ د مقدسې خېمې د دروازې په خولې کې زما حضور ته وړاندې شي. زه به هلته د اسرائيلو د خلکو سره ليدنه او کتنه وکړم او تا سره به خبرې وکړم.

⁴³د اسرائيليانو سره به هم هلته ليدنه او کتنه وکړم او هغه ځای به زما د جلال په وسيله پاک شي.

⁴⁴نو زه به خېمه او د قربانۍ ځای پاک کړم او هارون او د هغه زامن به د دې دپاره پاک کړم چې د کاهنانو په توګه زما خدمت وکړي.

⁴⁵بيا به زه د اسرائيلو د خلکو په منځ کې اوسېږم او د هغوی خدای به يم.

⁴⁶هغوی به په دې پوه شي چې زه د هغوی څښتن خدای يم چا چې هغوی له مصر څخه راوويستل ترڅو د هغوی په منځ کې واوسېږم. زه د هغوی څښتن خدای يم.