Read Pashto (Nangahari) — د پښتو مقدس کتاب هجرت 30 Bible Online

هجرت 30 - Pashto (Nangahari) — د پښتو مقدس کتاب bible

هجرت 30

¹د خوشبويۍ د سوزولو دپاره د غز د لرګي څخه يوه قربانګاه جوړه کړه.

²هغه بايد څلور کنجه وي. پنځه څلوېښت سانتي بايد اوږده وي او پنځه څلوېښت سانتي پلنه او نوي سانتي بايد لوړه وي. د هغې برجونه چې په څلورو کنجونو کې دي، هغه دې د قربانګاه سره د يوې ټوټې لرګي څخه جوړ شي.

³د هغې پاسنۍ برخې، څلور واړه خواو او برجونو ته د سرو زرو پوښ ورکړه او ګردچاپېره څنډې يې د سرو زرو څخه جوړې کړه.

⁴د څنډو لاندې د قربانګاه دپاره دوه د سرو زرو کړۍ ګانې جوړې کړه، يعنې په دواړو خواو باندې يې يوه يوه جوړه کړه چې هغه ميلې ونيسي چې د هغې په وړلو کې ورڅخه کار اخيستل کيږي.

⁵ميلې د غز د لرګي څخه جوړې کړه او د سرو زرو پوښ ورته ورکړه.

⁶قربانګاه د هغې پردې مخې ته کېږده چې د لوظ د صندوق په مخ کې ده يعنې د هغه سرپوښ مخې ته چې د لوظ په صندوق باندې پروت دی. په هغه ځاى کې به زه ستا سره ليدنه کتنه کوم.

⁷هر سهار کله چې هارون د څراغونو د تيارولو دپاره راځي، په هغې باندې دې خوشبويي وسوزوي.

⁸کله چې هغه په ماښام کې څراغونه لګوي، بايد همداسې وکړي. دغه د خوشبويۍ نذرانه دې پرته له کوم ځنډه تل ترتله جاري وي.

⁹په دې قربانګاه باندې هيڅ حرامه خوشبويي يا کومه سوزېدونکې نذرانه يا د غلې دانې نذرانه مه وړاندې کوئ او په هغې باندې د څښلو نذرانه مه تويوئ.

¹⁰په کال کې دې يو ځل هارون د قربانګاه د پاکولو دپاره په څلورو برجونو باندې د هغه حيوان د وينې د سولولو مراسم سرته ورسوي کوم چې د ګناه دپاره قرباني کيږي. دا کار دې تل ترتله هر کال ترسره شي. دغه قربانګاه دې په بشپړه توګه مقدسه شي او ما يعنې څښتن ته دې وقف شي.“

¹¹بيا څښتن حضرت موسیٰ ته وفرمايل:

¹²”کله چې ته د اسرائيليانو سرشمېرنه کوې، هر يو بايد څښتن ته د شمېرل کېدو په وخت کې د خپل ژوند په خاطر بيه ادا کړي. بيا چې کله هغوی شمېرې، هيڅ بلا به په هغوی باندې نازله نشي.

¹³هر يو تن چې په سرشمېرنه کې شامليږي، هغه دې د هغه مثقال په مطابق چې په مقدس ځای کې استعماليږي او شپږ ګرامه وزن ولري يو مثقال ورکړي. دغه يو مثقال ماته يوه نذرانه ده.

¹⁴هر يو تن چې په سرشمېرنه کې شمېرل کيږي، يعنې هر يو سړی چې عمر يې شل کاله يا د شلو کالو څخه زيات وي، هغه دې دا نذرانه څښتن ته ورکړي.

¹⁵کله چې تاسو څښتن ته نذرانه وړاندې کوئ چې د خپل ژوند دپاره کفاره ادا کړئ، نو څوک چې شتمن وي هغه دې د يو مثقال څخه زيات نه ورکوي او څوک چې غريب وي هغه دې د يو مثقال څخه کم نه ورکوي.

¹⁶د اسرائيلو د خلکو څخه د دغې کفارې پيسې راټولې کړه او د مقدسې خېمې په ساتنه او څارنه کې يې مصرف کړه. دا پيسې به د هغوی د ژوند په خاطر کفاره وي او زه به هغوی رايادوم چې ويې ساتم.“

¹⁷بيا څښتن حضرت موسیٰ ته وفرمايل:

¹⁸”د مينځلو دپاره د برنجو يو تشت جوړ کړه چې د برنجو پايه ولري. د مقدسې خېمې او د قربانۍ د ځای ترمنځ يې کېږده او اوبه په کې واچوه.

¹⁹هارون او د هغه زامن دې د هغه څخه اوبه واخلي او خپل لاسونه او پښې دې ومينځي.

²⁰هرکله چې هغوی مقدسې خېمې ته ورننوزي، هغوی به خپل لاسونه او پښې مينځي ترڅو مړه نشي. همدارنګه کله چې هغوی د قربانۍ ځای ته ورنژدې کيږي چې ماته په اور باندې يوه نذرانه وړاندې کړي

²¹نو هغوی بايد خپل لاسونه او پښې ومينځي ترڅو مړه نشي. دا يو امر دی چې هارون او د هغه اولاده بايد د تل دپاره د هغه څخه پيروي وکړي.“

²²بيا څښتن حضرت موسیٰ ته وفرمايل:

²³”دا لاندينۍ ښې مسالې واخله: شپږ کيلوګرامه کنډ چې د مايع په شکل وي، درې کيلوګرامه خوشبويه دال چيني، درې کيلوګرامه خوشبويه باڼس،

²⁴شپږ کيلوګرامه د سناد د پاڼو شيره، (ټول دې د هغه وزن په مطابق وي چې په مقدس ځای کې ورڅخه کار اخيستل کيږي) او څلور ليتره د زيتونو تېل.

²⁵له هغو څخه د مسح کولو مقدس تېل جوړ کړه. دا دې د عطرو په شان ګډوله وي.

²⁶بيا د دغو شيانو په مسح کولو کې ورڅخه کار واخله: مقدسه خېمه او د لوظ صندوق،

²⁷مېز او د هغه ټول سامان، څراغدان او د هغه سامان، د خوشبويۍ د سوزولو قربانګاه،

²⁸د سوزېدونکې نذرانې د قربانۍ ځای او د هغه ټول لوښي او تشت سره د پايې.

²⁹په دې ډول دغه شيان وقف کړه او هغه به دومره مقدس شي چې هرڅوک يا هر شی د هغو سره ولګيږي، نو هغه به هم مقدس شي.

³⁰هارون او د هغه زامن مسح کړه او وټاکه، ترڅو هغوی د کاهنانو په توګه زما خدمت وکړي.

³¹اسرائيليانو ته داسې ووايه: دا د مسح کولو مقدس تېل به تل ترتله زما د خدمت دپاره استعماليږي.

³²هغه د عادي خلکو په بدنونو باندې مه تويوئ او د دې ډول ترکيب څخه هيڅ تېل مه جوړوئ. هغه پاک دي او تاسو يې بايد پاک وګڼئ.

³³هرڅوک چې دا ډول عطر جوړ کړي او هرڅوک چې هغه پرته له کاهنه په بل چا باندې وسولوي بايد زما د قوم څخه وشړل شي.“

³⁴بيا څښتن حضرت موسیٰ ته وفرمايل: ”دغه خوشبويه مسالې واخله لکه کنډ، خوشبويه صدف او سوچه کندر. دا ټول دې په يوه اندازه وي.

³⁵د خوشبويۍ د جوړولو دپاره د هغو څخه کار واخله او د عطرو په شان يوه ګډوله جوړه کړه. په هغو کې مالګه ورزياته کړه چې هغه سوچه او پاکه وساتي.

³⁶له هغې څخه لږ ميده ميده کړه او په مقدسه خېمه کې يې د لوظ د صندوق مخې ته په هغه ځاى کې کېږده چې زه درسره ليدنه او کتنه کوم. هغه به تاسو ته ډېره مقدسه وي.

³⁷د خپلو ځانونو دپاره له دې ترکيب څخه هيڅ خوشبويي مه جوړوئ. هغه زما څښتن په خاطر مقدسه وګڼئ.

³⁸هرڅوک چې داسې يو شی جوړ کړي چې د خوشبويۍ څخه يې خوند واخلي بايد زما له قوم څخه وشړل شي.“