Read Pashto (Nangahari) — د پښتو مقدس کتاب هجرت 31 Bible Online

هجرت 31 - Pashto (Nangahari) — د پښتو مقدس کتاب bible

هجرت 31

¹بيا څښتن حضرت موسیٰ ته وفرمايل:

²”ګوره، ما بصلئيل د اوري زوی او د حور لمسی د يهودا له قبيلې څخه انتخاب کړی دی

³او هغه مې د خپل روح څخه ډک کړی دی او په هر ډول هنري کار کې مې ورته مهارت، توان او پوهه ورکړې ده.

⁴هغه کولی شي چې د سرو زرو، سپينو زرو او برنجو څخه ښکلي شيان جوړ کړي،

⁵قيمتي تيږې پرې کړي او تيارې يې کړي، د لرګيو کار او هر ډول هنري کار وکړي.

⁶ما اهولياب د اخيسامک زوی چې د دان له قبيلې څخه دی، د دې دپاره ټاکلی دی چې د هغه مرستيال وي. برسېره پردې ما ټولو کسبګرو ته چې د هغوی سره کار کوي خاص مهارت ورکړی دی ترڅو وکولی شي هغه ټول شيان جوړ کړي چې په تا باندې مې امر کړی دی:

⁷لکه مقدسه خېمه، د لوظ صندوق د سرپوښ سره چې ورباندې پروت وي او د خېمې نور ټول سامان،

⁸مېز او د هغه سامان، د سوچه سرو زرو څراغدان او د هغه ټول سامان، د خوشبويۍ د سوزولو دپاره قربانګاه،

⁹د سوزېدونکې نذرانې د قربانۍ ځای او د هغه ټول لوښي، تشت او د هغه پايه،

¹⁰د هارون کاهن او د هغه د زامنو دپاره ښکلی لباس چې کله هغوی د کاهنانو په توګه خدمت کوي

¹¹او د مسح کولو تېل او د مقدس ځای دپاره خوشبويي. هغوی دې دا شيان هماغسې جوړ کړي لکه څنګه چې ما درته امر کړی دى.“

¹²بيا څښتن حضرت موسیٰ ته وفرمايل:

¹³”د اسرائيلو خلکو ته داسې ووايه: تاسو بايد سبت يعنې د آرام کولو ورځ ولمانځئ. دا به تل ترتله زما او ستاسو ترمنځ يوه نښه وي ترڅو تاسو پوه شئ چې زه څښتن يم او تاسو مې د خپل قوم په توګه انتخاب کړي يئ.

¹⁴د سبت ورځ ولمانځئ ځکه چې دا ستاسو دپاره مقدسه ده. هرڅوک چې د هغې بې حرمتي کوي بايد ووژل شي او هرڅوک چې په دې ورځ کار وکړي بايد زما له قوم څخه وشړل شي.

¹⁵تاسو د کار کولو دپاره شپږ ورځې لرئ، مګر اوومه ورځ سبت يعنې د آرام کولو ورځ ده چې ما څښتن ته وقف کړای شوې ده. هرڅوک چې په دې ورځ کار وکړي هغه دې ووژل شي.

¹⁶اسرائيليان دې د سبت د ورځې څخه پيروي وکړي. هغه دې د يو لوظ په توګه د تل دپاره ولمانځي.

¹⁷دا به همېشه زما او د اسرائيليانو ترمنځ يوه نښه وي، ځکه چې ما څښتن آسمان او ځمکه په شپږو ورځو کې جوړ کړل او په اوومه ورځ مې کار بس کړ او آرام مې وکړ.“

¹⁸کله چې د سينا په غره باندې څښتن د حضرت موسیٰ سره خبرې خلاصې کړې، نو د تيږو هغه دوه لوحې چې په خپله يې ورباندې حکمونه ليکلي ؤو حضرت موسیٰ ته ورکړې.