Read Pashto (Nangahari) — د پښتو مقدس کتاب هجرت 33 Bible Online

هجرت 33 - Pashto (Nangahari) — د پښتو مقدس کتاب bible

هجرت 33

¹بيا څښتن حضرت موسیٰ ته وفرمايل: ”ته او دا قوم چې د مصر څخه دې راوويست له دې ځای څخه لاړ شئ او هغې ځمکې ته ورشئ چې ما وعده کړې وه چې هغه به ابراهيم، اسحاق، يعقوب او د هغوی اولادې ته ورکړم.

²زه به ستاسو څخه مخکې يوه فرښته ولېږم او کنعانيان، اموريان، حيتيان، فرزيان، حويان او يبوسيان به له هغه ځای څخه راوباسم.

³تاسو ډېرې ښې او حاصلخېزې ځمکې ته ځئ! مګر زه به ستاسو سره لاړ نشم، ځکه چې تاسو سرزوری قوم يئ او کېدای شي چې په لار کې مو له منځه يوسم.“

⁴۴‏-۵ مخکې هم څښتن داسې سختې خبرې کړې وې او حضرت موسیٰ ته يې داسې فرمايلي ؤو: په رښتيا سره دا قوم سرزوری دی. که زه د هغوی سره لاړ شم نو هغوی به سمدستي ووژنم. خو هغوی ته ووايه چې خپلې ګاڼې وباسي، بيا به زه پرېکړه وکړم چې د هغوی سره څه وکړم. نو خلکو په ژړا شروع وکړه.

⁶کله چې هغوی د سينا د غره څخه لاړل، نور يې د ګاڼو اچول بس کړل.

⁷حضرت موسیٰ به د کمپ څخه دباندې په يوې لېرې فاصله کې يوه خېمه ودروله او هغه به يې د څښتن د حضورۍ د خېمې په نوم يادوله. هرچا چې به غوښتل د کوم شي په باره کې د څښتن رضا معلومه کړي، نو هغې خېمې ته به ورتلل.

⁸کله به چې حضرت موسیٰ هغې خېمې ته ورتله، ټول قوم به د خپلو خېمو په دروازو کې ودرېده او حضرت موسیٰ ته به يې تر هغه وخته پورې کتل ترڅو به هغه خېمې ته ورننوت.

⁹د حضرت موسیٰ د ننوتلو څخه وروسته به ورېځ راښکته کېدله او د خېمې د دروازې په خولې کې به ودرېدله او څښتن به د حضرت موسیٰ سره د هغې ورېځې له منځ څخه خبرې کولې.

¹⁰څنګه به چې قوم د خېمې په دروازه کې ورېځ ليدله چې ولاړه به وه، نو ټول به په سجده پرېوتل.

¹¹څښتن به حضرت موسیٰ سره مخامخ خبرې کولې لکه څنګه چې يو سړی د خپل ملګري سره خبرې کوي. بيا به حضرت موسیٰ کمپ ته راستنېده، مګر د هغه ځوان مرستيال د نون زوی يوشع به په خېمه کې پاتې کېده.

¹²حضرت موسیٰ څښتن ته وفرمايل: ”ته ماته وايې چې دغه قوم بوزه، خو دا دې راته ونه ويل چې څوک راسره لېږې. تا ماته ويلي دي چې زه تا ښه پېژنم او ستا څخه خوشحاله يم.

¹³که چېرې ته زما څخه خوشحاله يې، نو ماته دې خپل پلانونه ووايه، ترڅو تا وپېژنم او همېشه دې خوشحاله کړم. دا مه هېروه چې دا قوم ستا خپل قوم دی.“

¹⁴څښتن په ځواب کې وفرمايل: ”زه به په خپله ستا سره لاړ شم او بری به درکړم.“

¹⁵حضرت موسیٰ هغه ته وفرمايل: ”که چېرې ته زمونږ سره نه ځې، نو مونږ مه مجبوروه چې له دې ځای څخه لاړ شو.

¹⁶خو که چېرې ته زمونږ سره لاړ شې، نو هرڅوک به په دې پوه شي چې ته د خپل قوم او زما څخه خوشحاله يې. په دې ډول به د دنيا د نورو ټولو قومونو څخه زمونږ فرق وشي.“

¹⁷څښتن حضرت موسیٰ ته وفرمايل: ”کومه غوښتنه چې تا کړې ده زه به هماغسې وکړم، ځکه چې زه تا ډېر ښه پېژنم او ستا څخه خوشحاله يم.“

¹⁸بيا حضرت موسیٰ وفرمايل: ”اوس دې خپل جلال ماته وښايه.“

¹⁹څښتن په ځواب کې وفرمايل: ”زه به ستا په مخکې تېر شم او ته به زما شان او شوکت وګورې او خپل پاک نوم به درته ووايم. زه څښتن يم او په چا باندې چې وغواړم رحم وکړم نو په هغوی باندې رحم کوم او په چا باندې چې وغواړم مهربانه شم نو په هغوی باندې مهرباني کوم.“

²⁰هغه زياته کړه: ” خو تا نه پرېږدم چې زما مخ ووينې، ځکه هيڅوک نشي کولی چې زما مخ وويني او ژوندی پاتې شي.“

²¹بيا څښتن وفرمايل: ”دلته زما په خوا کې يو ځای شته، ته کولی شې چې په يو ګټ باندې ودرېږې.

²²کله چې زما جلال تېريږي، زه به تا د ګټ په يو چاود کې واچوم او په خپل لاس به دې پټ کړم ترڅو زه تېر شم.

²³بيا به زه خپل لاس لېرې کړم او ته به زما شا ووينې، مګر مخ به مې ونه وينې.“