Read Pashto (Nangahari) — د پښتو مقدس کتاب هجرت 34 Bible Online

هجرت 34 - Pashto (Nangahari) — د پښتو مقدس کتاب bible

هجرت 34

¹څښتن حضرت موسیٰ ته وفرمايل: ”د اولنيو لوحو په شان د تيږو دوه لوحې تيارې کړه، زه به په هغو باندې هغه خبرې وليکم چې په اولنيو لوحو باندې ليکل شوې وې او تا ماتې کړې.

²سبا سهار تيار اوسه او د سينا غره ته راوخېژه او د غره په سر باندې ماته ځان حاضر کړه.

³ستا سره دې هيڅوک نه راځي او په غره باندې دې په هيڅ ځای کې څوک ونه ليدل شي، حتیٰ رمې او پادې دې هم د غره په لمنه کې نه څري.“

⁴نو حضرت موسیٰ د څښتن د امر سره سم د اولنيو لوحو په شان دوه د تيږو لوحې تيارې کړې. هغه سهار وختي پاڅېده او لوحې يې د ځان سره واخيستلې او د سينا غره ته پورته شو.

⁵بيا څښتن په ورېځ کې راښکته شو او د هغه سره هلته ودرېد او خپل مقدس نوم يې څښتن اعلان کړ.

⁶بيا څښتن د حضرت موسیٰ په مخ کې تېر شو او دا غږ يې وکړ: ”زه څښتن يعنې څښتن خدای يم، زه خواخوږی او مهربانه خدای يم. په آسانۍ سره نه په قهرېږم او ډېره مينه او وفاداري کوم.

⁷د زرګونو خلکو سره دوامداره مينه کوم او زه بدي، سرغړونه او ګناه بخښم. خو ګناهکاران هيڅکله بې سزا نه پرېږدم او د پلرونو د ګناه سزا به د هغوی اولادونو او لمسيو ته تر دريم او څلورم نسله پورې ورکړم.“

⁸حضرت موسیٰ سمدستي په ځمکه پرېوت او په سجده شو.

⁹هغه وفرمايل: ”ای څښتنه، که چېرې ته په رښتيا سره زما څخه خوشحاله يې، نو ستا څخه غوښتنه کوم چې زمونږ سره لاړ شه. که څه هم دا قوم سرزوری دی، خو ته زمونږ بدي او ګناه وبخښه او مونږ د خپل قوم په توګه قبول کړه.“

¹⁰بيا څښتن حضرت موسیٰ ته وفرمايل: ”زه اوس د اسرائيلو د خلکو سره يو لوظ کوم. زه به د هغوی په مخ کې داسې عجيبه کارونه وکړم چې د دې ټولې دنيا په هيڅ يو قوم کې شوي نه وي. کوم خلک چې تاسو يې په منځ کې اوسېږئ، هغوی به وويني چې زه څښتن ستاسو دپاره څومره هيبتناکه کارونه کوم.

¹¹نن چې زه تاسو ته کوم حکمونه درکوم هغو ته غاړه کېږدئ. نو بيا به زه اموريان، کنعانيان، حيتيان، فرزيان، حويان او يبوسيان ستاسو له مخې څخه لېرې کړم.

¹²کوم وطن ته چې تاسو روان يئ، پام کوئ چې د هغه وطن له اوسېدونکو سره کوم تړون ونه کړئ. که نه، نو د هغوی په دام کې به راګېر شئ.

¹³د هغوی د قربانۍ ځايونه وران کړئ، هغه لويې تيږې چې د عبادت دپاره استعماليږي ماتې کړئ او د اشيره بتان يې راوغورزوئ.

¹⁴د بل خدای عبادت مه کوئ، ځکه څښتن چې نوم يې غيرتي دی، هغه غيرتي خدای دی.

¹⁵پام کوئ چې د هغه وطن د اوسېدونکو سره کوم تړون ونه کړئ، ځکه کله چې هغوی د خپلو خدايانو عبادت کوي او قرباني ورته وړاندې کوي، نو تاسو ته به هم بلنه درکړي او تاسو به بې لارې کړي ترڅو د هغوی قربانۍ وخورئ.

¹⁶که چېرې تاسو د هغوی لورګانې خپلو زامنو ته په نکاح کړئ نو څرنګه چې هغوی د خپلو خدايانو عبادت کوي، نو ستاسو زامن به هم خپلې لارې ته راواړوي.

¹⁷خپلو ځانونو ته د فلز څخه بتان مه جوړوئ.

¹⁸د فطيرې ډوډۍ اختر ولمانځئ. لکه څنګه چې ما په تاسو باندې امر کړی دی، اوه ورځې فطيره ډوډۍ وخورئ. دا کار د ابيب په مياشت کې په ټاکل شوي وخت وکړئ، ځکه چې په دې مياشت کې تاسو له مصر څخه راووتلئ.

¹⁹ستاسو په کورنيو کې هر اولني پيدا شوي نران او ستاسو د رمو او پادو اولني زېږېدل شوي نران بچي زما دي.

²⁰اولنی زېږېدل شوی خر د يو وري سره بدل کړئ، مګر که چېرې تاسو هغه بدل نه کړ، نو د هغه خر اورمېږ مات کړئ. خپل ټول اولني زامن بېرته په بيه واخلئ. هيڅوک دې ماته تش لاس رانشي.

²¹شپږ ورځې کار وکړئ. مګر په اوومه ورځ آرام وکړئ، حتیٰ د قلبې او لو په وخت کې هم بايد کار ونه کړئ.

²²کله چې تاسو د غنمو د اولني حاصل لو کول شروع کوئ نو د لو کولو اختر ولمانځئ او د حاصل د راټولولو اختر په مني کې ولمانځئ.

²³ستاسو ټول نارينه بايد په کال کې درې ځلې د اسرائيلو څښتن خدای ته د عبادت دپاره راشي.

²⁴کله چې تاسو په هر کال کې درې ځلې د خپل څښتن خدای حضور ته د عبادت دپاره راځئ نو هيڅوک به په تاسو باندې حمله نه کوي او ستاسو جايداد به نه نيسي. زه به هغه قومونه چې ستاسو په مقابل کې ودريږي لېرې کړم او ستاسو سيمه به پراخه کړم.

²⁵کله چې تاسو ماته يو حيوان قرباني کوئ نو هغه د خميرې ډوډۍ سره مه وړاندې کوئ. کوم حيوان چې د فسحې په اختر کې حلاليږي، د هغه د غوښې څخه تر سهاره پورې هيڅ شی مه ساتئ.

²⁶هر کال د خپل څښتن خدای کور ته د خپل اولني حاصل ډېرې ښې غلې دانې راوړئ. يو سېرلی د خپلې مور په شيدو کې مه پخوئ.“

²⁷څښتن حضرت موسیٰ ته وفرمايل: ”دا خبرې وليکه، ځکه چې دا د هغه لوظ شرطونه دي چې ستا سره او د اسرائيلو د قوم سره مې کړی دى.“

²⁸حضرت موسیٰ څلوېښت شپې او څلوېښت ورځې د څښتن سره په غره کې پاتې شو، په دې ټوله موده کې هغه نه څه وڅښل او نه يې څه وخوړل. هغه د لوظ خبرې يعنې لس حکمونه په لوحو باندې وليکل.

²⁹کله چې حضرت موسیٰ د تيږو د دوو لوحو سره چې حکمونه ورباندې ليکل شوي ؤو د سينا له غره څخه راښکته شو، نو د هغه مخ ځلېده، ځکه چې هغه د څښتن سره خبرې کړې وې خو هغه ورڅخه خبر نه ؤ.

³⁰کله چې حضرت هارون او د اسرائيلو خلکو د حضرت موسیٰ مخ وليد چې ځليږي نو هغوی له وېرې حضرت موسیٰ ته ورنژدې نشول.

³¹مګر حضرت موسیٰ هغوی راوغوښتل. نو حضرت هارون او د قوم ټول مشران حضرت موسیٰ ته ورغلل او حضرت موسیٰ د هغوی سره خبرې وکړې.

³²وروسته ټول اسرائيليان حضرت موسیٰ ته نژدې ورغلل او حضرت موسیٰ هغوی ته هغه ټول حکمونه ورکړل کوم چې څښتن هغه ته د سينا په غره باندې ورکړي ؤو.

³³کله چې حضرت موسیٰ د هغوی سره خپلې خبرې خلاصې کړې، هغه خپل مخ په پردې باندې پټ کړ.

³⁴مګر کله به چې حضرت موسیٰ مقدسې خېمې ته ورننواته چې د څښتن سره خبرې وکړي، نو خپله پرده به يې لېرې کوله. چې کله به هغه راووت، نو خلکو ته به يې د څښتن حکمونه بيانول

³⁵او هغوی به ليدل چې د حضرت موسیٰ مخ ځليږي. تر هغه وخته پورې چې هغه به بيا څښتن ته د خبرو کولو دپاره تله، نو په خپل مخ باندې به يې پرده اچوله.