Read Pashto (Nangahari) — د پښتو مقدس کتاب هجرت 35 Bible Online

هجرت 35 - Pashto (Nangahari) — د پښتو مقدس کتاب bible

هجرت 35

¹حضرت موسیٰ د اسرائيلو ټول قوم سره راغونډ کړ او ورته ويې فرمايل: ”دا د څښتن حکمونه دي چې تاسو به ورباندې عمل کوئ:

²تاسو بايد په هفته کې شپږ ورځې کار وکړئ، مګر په اوومه ورځ چې د څښتن مقدسه ورځ ده آرام وکړئ. هرڅوک چې په هغې ورځ کار وکړي، هغه دې ووژل شي.

³حتیٰ د سبت په ورځ په خپلو کورونو کې اور هم مه بلوئ.“

⁴حضرت موسیٰ د اسرائيلو ټول قوم ته وفرمايل: ”څښتن داسې امر کړی دی:

⁵څه چې تاسو لرئ د هغو څخه د څښتن دپاره يوه نذرانه يوسئ. هرڅوک چې په خپله خوښه څښتن ته نذرانې راوړي نو دا نذرانې دې راوړي: سره زر، سپين زر او برنج،

⁶ښه کتان او آبي، بانجاني او سرې وړۍ، هغه ټوکر چې د وزو د وړيو څخه جوړ شوی وي،

⁷سره رنګ شوي د پسه پوستکي، ښه څرمن، د غز لرګی،

⁸د څراغونو دپاره تېل، د مسح کولو د تېلو او د خوشبويۍ دپاره مسالې،

⁹سليماني تيږې او نورې قيمتي تيږې چې د مشر کاهن په مقدس پېشبند او د هغه په سينه پوښ باندې ولګول شي.

¹⁰په تاسو کې چې څومره ماهر خلک دي هغوی دې راشي او هغه ټول شيان دې جوړ کړي چې څښتن يې امر کړی دی:

¹¹لکه مقدسه خېمه او د هغې پوښونه، چنګکونه، چوکاټونه، اړمونه، ستنې او پايې،

¹²د لوظ صندوق او د هغه ميلې او د هغه سرپوښ چې کفاره ورباندې ادا کيږي او پرده چې هغه ورباندې پټيږي،

¹³مېز د پايو او ټول سامان سره او مقدسه ډوډۍ،

¹⁴د رڼا دپاره څراغدان د هغه د سامان سره، د رڼا دپاره څراغونه او تېل،

¹⁵د خوشبويۍ قربانګاه د هغې د ميلو سره، د مسح کولو تېل او خوشبويي، د مقدسې خېمې د دروازې دپاره پرده،

¹⁶د سوزېدونکې نذرانې د قربانۍ ځای او د هغه برنجي جالۍ، ميلې او ټول لوښي، برنجي تشت د پايې سره،

¹⁷د حويلۍ پردې د هغو د ستنو او پايو سره او د حويلۍ د دروازې دپاره پرده،

¹⁸د خېمې او حويلۍ دپاره مېخونه او رسۍ،

¹⁹ښکلي کالي چې په مقدس ځای کې د خدمت دپاره اغوستل کيږي، د هارون کاهن دپاره خاص لباس او د هغه د زامنو دپاره لباس چې د کاهنۍ د خدمت په وخت کې يې اغوندي.“

²⁰وروسته بيا د اسرائيلو ټول خلک د حضرت موسیٰ د حضور څخه لاړل.

²¹بيا هغو خلکو چې زړونو يې غوښتل چې څښتن ته نذرانې راوړي، نو هغه يې راوړلې چې په مقدسه خېمه، د عبادت په خدمتونو او د کاهنانو د کاليو په جوړولو کې ورڅخه کار واخيستل شي.

²²نو ټول خلک يعنې نارينه او ښځې په خپله خوښه راغلل او هغوی د سينې ګلان، غوږوالۍ، ګوتې او غاړه کۍ او هر ډول د سرو زرو ګاڼې راوړلې او څښتن ته يې وقف کړل.

²³د هرچا سره چې آبي، بانجاني يا سرې وړۍ، ښه کتان، د وزو د وړيو څخه جوړ شوی ټوکر، سره رنګ شوي د پسه پوستکي يا ښې څرمنې وې هغه يې راوړلې.

²⁴د چا سره چې سپين زر يا برنج او يا د غز لرګي ؤو هغه يې راوړل او څښتن ته يې د سوغات په توګه وړاندې کړل.

²⁵هغو ټولو ښځو چې د ګنډلو او اوبدلو په کار کې يې مهارت درلود آبي، بانجاني يا سرې وړۍ يا ښه کتان چې هغوی په خپله جوړ کړي ؤو راوړل.

²⁶ټولو ښځو چې زړونو يې غوښتل او مهارت يې درلود، هغوی به د وزو د وړيو څخه تارونه جوړول او اوبدل به يې.

²⁷مشرانو سليماني تيږې او نور غمي راوړل چې په مقدس پېشبند او سينه پوښ باندې ولګول شي.

²⁸همدارنګه هغوی د څراغونو دپاره تېل راوړل او خوشبويه مسالې يې راوړلې چې د خوشبويۍ او مسح کولو د تېلو سره ګډ شي.

²⁹د اسرائيلو ټولو نارينه او ښځو چې غوښتل يې د هغه کار دپاره خپلې نذرانې راوړلې چې څښتن د حضرت موسیٰ په وسيله هغوی ته حکم کړی ؤ چې هغه وکړي.

³⁰بيا حضرت موسیٰ اسرائيليانو ته وفرمايل: ”ګورئ، څښتن بصلئيل د اوري زوی او د حور لمسی د يهودا له قبيلې څخه انتخاب کړی دی.

³¹څښتن هغه د خپل روح څخه ډک کړی دی او په هر ډول هنري کار کې يې ورته مهارت، توان او پوهه ورکړې ده.

³²هغه کولی شي چې د سرو زرو، سپينو زرو او برنجو څخه ښکلي شيان جوړ کړي،

³³تيږې پرې کړي او تيارې يې کړي، د لرګيو کار او هر ډول هنري کار وکړي.

³⁴څښتن هغه او د دان د قبيلې د اخيسامک زوی اهولياب دواړو ته دا توان ورکړی دی چې نورو ته خپل هنر ورزده کړي.

³⁵هغه ورته په هر قسم کار کې مهارت ورکړی دی چې د زرګرانو، نقشه جوړوونکو، د آبي، بانجاني او سرو وړيو او د ښه کتان د ګلدوزانو او اوبدونکو په توګه کار وکړي. هغوی کولی شي چې هر قسم کارونه وکړي او هغوی تکړه نقشه جوړوونکي دي.