Read Pashto (Nangahari) — د پښتو مقدس کتاب هجرت 36 Bible Online

هجرت 36 - Pashto (Nangahari) — د پښتو مقدس کتاب bible

هجرت 36

¹بصلئيل، اهولياب او نور کارګران چې څښتن ورته مهارت او پوهه ورکړې ده د څښتن د حکم سره سم به مقدسه خېمه جوړه او تياره کړي.“

²بيا حضرت موسیٰ بصلئيل او اهولياب او ټول ماهر خلک چې څښتن ورته توان ورکړی ؤ او غوښتل يې چې کار وکړي، راوغوښتل چې راشي او کار شروع کړي.

³هغوی د حضرت موسیٰ څخه هغه ټولې نذرانې چې د اسرائيلو خلکو د مقدسې خېمې د جوړولو د کار دپاره راوړې وې واخيستلې. خو خلکو به حضرت موسیٰ ته هر سهار د رضاکارۍ نذرانې راوړلې.

⁴نو هغو ټولو ماهرو کسبګرو چې په مقدسې خېمې باندې يې کار کاوه، خپل کار پرېښود

⁵او حضرت موسیٰ ته يې وويل: ”د هغه کار دپاره چې څښتن يې امر کړی دی، خلک له ضرورت څخه زياتې نذرانې راوړي.“

⁶بيا حضرت موسیٰ حکم وکړ او هغوی دا خبره ټول کمپ ته ورسوله: ”هيڅ سړی يا ښځه دې د مقدسې خېمې دپاره نور هيڅ شی د نذرانې په توګه نه راوړي.“ نو خلک نور د نذرانو د راوړلو څخه منع کړای شول،

⁷ځکه څه چې مخکې راوړل شوي ؤو، هغه د ټول کار د بشپړولو دپاره ډېر ؤو.

⁸د کارګرانو څخه ټولو ماهرو نفرو د ښه کتان او د آبي، بانجاني او سرو وړيو د لسو پردو څخه مقدسه خېمه جوړه کړه او په هغو کې يې د کروبيانو نقش ګلدوزي کړی ؤ.

⁹د ټولو پردو اندازه يوشان وه، دولس متره اوږدې او دوه متره پلنې وې.

¹⁰د دې پردو څخه پنځه پردې سره يوځای شوې او يوه جوړه ورڅخه جوړه شوه او دوهمه جوړه د نورو پنځو څخه جوړه شوه.

¹¹هغوی په هره جوړه کې د بيرونۍ پردې په څنډه باندې د آبي رنګه ټوټې کړۍ ګانې جوړې کړې.

¹²همدارنګه هغوی پنځوس کړۍ ګانې په يوې پردې باندې او پنځوس د بلې جوړې په آخرنۍ پردې باندې په داسې ډول جوړې کړلې چې هغه کړۍ ګانې يو بل ته مخامخ وي.

¹³بيا هغوی پنځوس د سرو زرو چنګکونه جوړ کړل او د پردو د دوه جوړو په يوځای تړلو کې يې ورڅخه کار واخيست، ترڅو ټوله يوه خېمه ورڅخه جوړه شي.

¹⁴هغوی د مقدسې خېمې د پوښ دپاره د وزو د وړيو څخه پردې جوړې کړې چې ټولې يوولس دانې وې.

¹⁵يوولس واړه پردې په يوه اندازه وې، يعنې ديارلس متره اوږدې او دوه متره پلنې وې.

¹⁶هغوی پنځه پردې په يوه جوړه کې سره يوځای کړې او نورې شپږ يې په بله جوړه کې.

¹⁷بيا يې پنځوس کړۍ ګانې د يوې جوړې د اخرنۍ پردې په څنډه کې جوړې کړلې او د بلې جوړې د اخرنۍ پردې په څنډه کې يې همداسې جوړې کړلې.

¹⁸د برنجو پنځوس چنګکونه يې جوړ کړل او په کړۍ ګانو کې يې واچول چې خېمه يوځای سره وتړي.

¹⁹بيا يې د خېمې دپاره د پسه د داسې پوستکي څخه پوښ جوړ کړ چې سور رنګ ورکړل شوی ؤ او په هغه باندې يې د ښې څرمنې څخه يو پوښ جوړ کړ.

²⁰هغوی د خېمې دپاره د غز د لرګي څخه ولاړ چوکاټونه جوړ کړل.

²¹هر چوکاټ څلورنيم متره اوږد او پنځه شپېته سانتي پلن ؤ،

²²دوه يوشان نښلوونکې تختې يې درلودلې، ترڅو چوکاټونه سره يوځای شي. ټولو چوکاټونو دا تختې درلودلې.

²³هغوی د خېمې د جنوب خوا دپاره شل چوکاټونه جوړ کړل،

²⁴او څلوېښت د سپينو زرو پايې يې جوړې کړې چې ورلاندې شي، د هر چوکاټ لاندې دوه دوه پايې وې، د دې دپاره چې دوه تختې يې ونيسي.

²⁵هغوی د بلې خوا يعنې د خېمې د شمال خوا دپاره شل چوکاټونه جوړ کړل،

²⁶او څلوېښت د سپينو زرو پايې يې جوړې کړلې چې د هر چوکاټ لاندې دوه دوه وي.

²⁷د خېمې د شا دپاره يې چې د لويديځ خواته وه، شپږ چوکاټونه جوړ کړل،

²⁸او دوه چوکاټونه يې د خېمې د کنجونو دپاره جوړ کړل کوم چې شاته ؤو.

²⁹په دغو دوو کنجونو کې هغه چوکاټونه د بېخ څخه نيولې تر سره پورې سره يوځای ؤو او په يوې کړۍ کې لګول شوي ؤو، دا دواړه يوشان ؤو.

³⁰نو اته چوکاټونه او شپاړلس د سپينو زرو پايې وې، د هر چوکاټ لاندې دوه دوه پايې وې.

³¹هغوی د غز د لرګي څخه پنځلس اړمونه جوړ کړل، پنځه يې د هغو چوکاټونو دپاره جوړ کړل چې د خېمې په يوې خوا باندې ؤو،

³²پنځه د هغو چوکاټونو دپاره چې په بلې خوا باندې ؤو او پنځه د هغو چوکاټونو دپاره چې شاته د لويديځ خواته په آخر سر کې ؤو.

³³منځنی اړم چې د چوکاټونو تر نيمايي پورې ايښودل شوی ؤ، هغه د خېمې د يو سر څخه تر بل سره پورې غزېدلی ؤ.

³⁴چوکاټونو ته يې د سرو زرو پوښ ورکړ او د سرو زرو کړيو سره يې ولګول چې اړمونه ونيسي. همدارنګه هغوی اړمونو ته هم د سرو زرو پوښ ورکړ.

³⁵هغوی د ښه کتان او آبي، بانجاني او سرو وړيو څخه يوه پرده جوړه کړه او په هغې کې يې د کروبيانو نقش ګلدوزي کړی ؤ.

³⁶د هغې دپاره يې د غز د لرګي څخه څلور ستنې جوړې کړې او د سرو زرو پوښ يې ورته ورکړ او د هغو دپاره يې د سرو زرو چنګکونه جوړ کړل او څلور پايې يې ورته جوړې کړې.

³⁷هغوی د خېمې د دروازې دپاره د آبي، بانجاني او سرو وړيو او د ښه کتان څخه يوه پرده جوړه کړه چې ګلدوزي په کې شوې وه.

³⁸د دې پردې دپاره هغوی پنځه ستنې جوړې کړې چې د چنګکونو سره لګېدلې وې، د هغو سرونو او سيخونو ته يې د سرو زرو پوښ ورکړ او د ستنو دپاره يې پنځه برنجي پايې جوړې کړلې.