Read Pashto (Nangahari) — د پښتو مقدس کتاب هجرت 37 Bible Online

هجرت 37 - Pashto (Nangahari) — د پښتو مقدس کتاب bible

هجرت 37

¹بصلئيل د غز د لرګي څخه د لوظ صندوق جوړ کړ چې يو متر او لس سانتي اوږد ؤ، پنځه شپېته سانتي پلن ؤ او پنځه شپېته سانتي لوړ ؤ.

²د هغه منځنۍ او بيرونۍ برخې ته يې د سوچه سرو زرو پوښ ورکړ او د هغه ګردچاپېره څنډه يې د سرو زرو څخه جوړه کړه.

³د هغه دپاره يې څلور د سرو زرو کړۍ ګانې جوړې کړې او د هغه په څلورو پايو باندې يې وتړلې، چې دوه کړۍ ګانې يې په يو خوا او دوه په بلې خوا وې.

⁴بيا هغه د غز د لرګي څخه ميلې جوړې کړې او د سرو زرو پوښ يې ورته ورکړ.

⁵ميلې يې هغو کړيو ته د وړلو دپاره ورننويستلې چې د صندوق په څنګونو کې وې.

⁶د سوچه سرو زرو څخه يې د صندوق سرپوښ چې کفاره ورباندې ادا کيږي جوړ کړ چې يو متر او لس سانتي اوږد ؤ او پنځه شپېته سانتي پلن ؤ.

⁷بيا هغه د سرپوښ په سرونو کې د ټکول شويو سرو زرو څخه دوه کروبيان جوړ کړل.

⁸يو کروب يې په يو سر او دوهم کروب يې په بل سر کې جوړ کړ، په دوو سرونو کې يې د سرپوښ سره کروبيان د سرو زرو د يوې ټوټې څخه جوړ کړل.

⁹د کروبيانو وزرونه د دې دپاره پورته خپاره ؤو چې په سرپوښ باندې سيوری وکړي. کروبيان يو بل ته مخامخ ؤو او د سرپوښ خواته يې کتل.

¹⁰بصلئيل د غز د لرګي څخه يو داسې مېز جوړ کړ چې نوي سانتي اوږد ؤ، پنځه څلوېښت سانتي پلن ؤ او پنځه شپېته سانتي لوړ ؤ.

¹¹بيا يې هغه ته د سوچه سرو زرو پوښ ورکړ او د هغه ګردچاپېره څنډه يې د سرو زرو څخه جوړه کړه.

¹²همدارنګه د هغه ګردچاپېره يې يو چوکاټ جوړ کړ چې پراخوالی يې پنځه اويا ملي متره ؤ او په چوکاټ باندې يې د سرو زرو څنډه جوړه کړه.

¹³هغه د مېز دپاره څلور د سرو زرو کړۍ ګانې جوړې کړې او په هغو څلورو کنجونو کې يې وتړلې چېرته چې څلور پايې وې.

¹⁴کړۍ ګانې چوکاټ ته نژدې وې، د دې دپاره چې هغه ميلې ونيسي چې د مېز په وړلو کې ورڅخه کار اخيستل کېده.

¹⁵د مېز د وړلو ميلې د غز د لرګي څخه جوړې شوې وې او د سرو زرو پوښ ورته ورکړل شوی ؤ.

¹⁶هغه ټول شيان چې په مېز باندې ايښودل کېدل يعنې کاسې، قابونه او د څښلو د نذرانو دپاره منګي او جامونه د سوچه سرو زرو څخه جوړ شول.

¹⁷بصلئيل د سوچه سرو زرو څخه يو څراغدان جوړ کړ او د هغه پايه او ميله، د هغه د پيالو په شان ګلان، غوټۍ ګانې او ګلپاڼې يې د ټکول شويو سرو زرو څخه جوړ کړل. هغه ټول شيان د يوې ټوټې سرو زرو څخه جوړ شوي ؤو.

¹⁸شپږ څانګې د څراغدان د څنګونو څخه غزېدلې وې، يعنې درې د يو څنګ څخه او درې د بل څخه.

¹⁹درې پيالې چې شکل يې د بادام د ګل په شان ؤ، د غوټيو او ګلپاڼو سره په يوې څانګې باندې وې، درې په بلې څانګې باندې او په همدې ډول د شپږو واړو څانګو دپاره وې چې د څراغدان څخه غزېدلې وې.

²⁰په خپله په څراغدان باندې څلور د بادام د ګل په شان پيالې وې، د غوټۍ ګانو او ګلپاڼو سره.

²¹يوه غوټۍ د څانګو د اولې جوړې لاندې وه چې د څراغدان څخه غزېدلې وه، دوهمه غوټۍ د دوهمې جوړې لاندې وه او دريمه غوټۍ د دريمې جوړې لاندې وه يعنې ټولې شپږ څانګې وې.

²²غوټۍ ګانې، څانګې او څراغدان د ټکول شويو سوچه سرو زرو د يوې ټوټې څخه ؤو.

²³د څراغدان دپاره يې اوه څراغونه جوړ کړل او پلته پاکوونکي او پتنوسونه يې د سوچه سرو زرو څخه جوړ کړل.

²⁴هغه د څراغدان او د هغه د ټول سامان په جوړولو کې د څلوردېرشو کيلوګرامه سوچه سرو زرو څخه کار واخيست.

²⁵بصلئيل د غز د لرګي څخه د خوشبويۍ د سوزولو دپاره يوه قربانګاه جوړه کړه. هغه څلور کنجه وه، پنځه څلوېښت سانتي اوږده وه او پنځه څلوېښت سانتي پلنه وه او نوي سانتي لوړه وه. د هغې برجونه چې په څلورو کنجونو کې ؤو، هغه د قربانګاه سره د يوې ټوټې لرګي څخه جوړ شول.

²⁶د هغې پاسنۍ برخې، څلور واړو خواو او برجونو ته يې د سرو زرو پوښ ورکړ او د هغه ګردچاپېره څنډه يې د سرو زرو څخه جوړه کړه.

²⁷د څنډې لاندې د قربانګاه دپاره يې دوه د سرو زرو کړۍ ګانې جوړې کړې، يعنې په دواړو خواو باندې يې يوه يوه جوړه کړه چې هغه ميلې ونيسي چې د هغې په وړلو کې ورڅخه کار اخيستل کيږي.

²⁸هغه ميلې د غز د لرګي څخه جوړې کړې او د سرو زرو پوښ يې ورته ورکړ.

²⁹همدارنګه بصلئيل د مسح کولو دپاره مقدس تېل او د خوشبويۍ دپاره سوچه مسالې جوړې کړې لکه څنګه چې يو عطر جوړوونکی يې جوړوي.