Read Pashto (Nangahari) — د پښتو مقدس کتاب هجرت 38 Bible Online

هجرت 38 - Pashto (Nangahari) — د پښتو مقدس کتاب bible

هجرت 38

¹بصلئيل د غز د لرګي څخه يو د قربانۍ ځای جوړ کړ چې يو متر او دېرش سانتي لوړ ؤ. هغه څلور کنجه ؤ، دوه متره او شل سانتي اوږد ؤ او دوه متره او شل سانتي پلن ؤ.

²هغه د څلورو کنجونو دپاسه برجونه جوړ کړل چې هغه د قربانګاه سره ټول د يوې ټوټې لرګي څخه جوړ شول او ټولو ته يې د برنجو پوښ ورکړ.

³د هغه ټول سامان يې د برنجو څخه جوړ کړ، يعنې د ايرو د لېرې کولو لوښي او د هغه بېلچې، د وينې د شيندلو کاسې، د غوښې قاشق پنجې او د اور لوښي.

⁴هغه يوه د برنجو جالۍ جوړه کړه او د قربانۍ د ځای د څنډې لاندې يې کېښودله، ترڅو د قربانګاه تر نيمايي پورې ورسيږي.

⁵د دې دپاره يې د برنجو کړۍ ګانې جوړې کړې چې د جالۍ د څلورو کنجونو ميلې ونيسي.

⁶د غز د لرګي څخه يې د وړلو ميلې جوړې کړې او د برنجو پوښ يې ورته ورکړ

⁷او د قربانۍ د ځای د دواړو اړخونو په کړيو کې يې ولګولې. د قربانۍ ځای د تختو څخه جوړ شوی ؤ او تش ؤ.

⁸بصلئيل برنجي تشت او د هغه برنجي پايه د هغو ښځو د برنجي آيئنو * څخه جوړ کړل چې د مقدسې خېمې په دروازه کې يې خدمت کاوه.

⁹بصلئيل د مقدسې خېمې دپاره يوه حويلۍ جوړه کړه. جنوب خوا يې پنځه څلوېښت متره اوږده وه او د ښه کتان پردې يې درلودلې،

¹⁰چې د برنجو په شلو پايو کې د شلو برنجي ستنو په وسيله ټينګې شوې وې، چې د سپينو زرو څخه جوړ شوي چنګکونه او سيخونه په کې ؤو.

¹¹حويلۍ د شمال خواته هم همداسې وه.

¹²د حويلۍ په لويديځه خوا کې پردې وې چې دوه ويشت متره اوږدې وې او لس ستنې او پايې يې درلودلې چې د سپينو زرو څخه جوړ شوي چنګکونه او سيخونه ورسره ؤو.

¹³ختيځې خواته يعنې هغه ځای کې چې د ننوتلو دروازه وه، هم حويلۍ دوه ويشت متره پلنه وه.

¹⁴۱۴‏-۱۵ د دروازې دواړو خواو ته د درې ستنو او پايو سره اوه متره پردې وې.

¹⁶د حويلۍ ګردچاپېره ټولې پردې د ښه کتان څخه جوړې شوې وې.

¹⁷د ستنو دپاره چې کومې پايې وې، هغه د برنجو څخه جوړې شوې وې او چنګکونه، سيخونه او د ستنو د سرونو پوښونه د سپينو زرو څخه جوړ شوي ؤو. د حويلۍ ګردچاپېره ټولې ستنې د سپينو زرو د سيخونو سره نښلول شوې وې.

¹⁸د حويلۍ د دروازې پرده د آبي، بانجاني او سرو وړيو او د ښه کتان څخه جوړه شوې وه او ګلدوزي په کې شوې وه. هغه نهه متره اوږده او د حويلۍ د پردو په شان دوه متره او شل سانتي لوړه وه.

¹⁹هغه په څلورو داسې ستنو باندې ټينګه شوې وه چې په څلورو برنجي پايو کې وې. چنګکونه، د سرونو پوښونه او سيخونه يې د سپينو زرو څخه جوړ شوي ؤو.

²⁰د خېمې او د هغې د ګردچاپېره حويلۍ ټول مېخونه برنجي ؤو.

²¹دا هغه لست دی چې د فلزاتو هغه اندازه په کې ده چې په مقدسه خېمه کې په هغه ځای کې ورڅخه کار واخيستل شو چې د تيږو دوه لوحې چې لس حکمونه ورباندې ليکل شوي ؤو ساتل شوې وې. د لست فرمايش حضرت موسیٰ ورکړی ؤ او هغو لاويانو جوړ کړ چې د حضرت هارون کاهن د زوی يتامار تر لارښودنې لاندې يې کار کاوه.

²²د يهودا د قبيلې بصلئيل د اوري زوی او د حور لمسي هغه ټول شيان جوړ کړل چې د هغو د جوړولو امر څښتن په حضرت موسیٰ باندې کړی ؤ.

²³د هغه سره د دان د قبيلې د اخيسامک زوی اهولياب ؤ، هغه يو کسبګر او طرح کوونکی ؤ او د آبي، بانجاني او سرو وړيو او د ښه کتان ګلدوز ؤ.

²⁴د هغو ټولو سرو زرو وزن چې خلکو څښتن ته وقف کړي ؤو او د مقدس ځای په کار کې ورڅخه کار واخيستل شو زر کيلوګرامه ؤ. دا د هغه وزن په مطابق ؤو چې په مقدس ځای کې ورڅخه کار اخيستل کېده.

²⁵د هغو سپينو زرو اندازه چې د اسرائيلو د قوم د هغو خلکو څخه ترلاسه شول چې په سرشمېرنه کې شمېرل شوي ؤو، ۳۴۲۵ کيلوګرامه وه، د هغه وزن په مطابق چې په مقدس ځای کې ورڅخه کار اخيستل کېده.

²⁶د نفر په سر يو مثقال راتله، (دا مثقال د مقدس ځای د مثقال په مطابق ؤ)، ټول خلک چې شمېرل شوي ؤو او عمر يې د شلو کالو څخه زيات ؤ، ټول ۶۰۳۵۵۰ نفره ؤو.

²⁷د سپينو زرو څخه ۳۴۰۰ کيلوګرامه د دې دپاره استعمال شول چې د مقدس ځای او پردې دپاره سل پايې جوړې شي او د هرې پايې دپاره څلوردېرش کيلوګرامه ؤو.

²⁸د پاتې پنځه ويشتو کيلوګرامو سپينو زرو څخه بصلئيل سيخونه، د ستنو دپاره چنګکونه او د هغو د سرونو دپاره پوښونه جوړ کړل.

²⁹د هغو برنجو اندازه چې خلکو څښتن ته وقف کړي ؤو، ۲۴۰۰ کيلوګرامه وه.

³⁰هغه له دې برنجو څخه د لاندينيو شيانو په جوړولو کې کار واخيست: د مقدسې خېمې د دروازې دپاره پايې، برنجي قربانګاه او د هغې جالۍ او ټول لوښي،

³¹د ګردچاپېره حويلۍ او د هغې د دروازې دپاره پايې او د خېمې او ګردچاپېره حويلۍ دپاره ټول مېخونه.