Read Pashto (Nangahari) — د پښتو مقدس کتاب هجرت 39 Bible Online

هجرت 39 - Pashto (Nangahari) — د پښتو مقدس کتاب bible

هجرت 39

¹د آبي، بانجاني او سرو وړيو څخه هغوی په مقدس ځای کې د خدمت کولو دپاره ښکلي کالي جوړ کړل. هغوی د حضرت هارون دپاره هم د څښتن د حکم په مطابق چې حضرت موسیٰ ته يې کړی ؤ، خاص لباس جوړ کړ.

²هغوی د سرو زرو او د آبي، بانجاني او سرو وړيو او د ښه کتان څخه مقدس پېشبند جوړ کړ.

³هغوی سره زر وټکول او نرۍ پاڼې يې ورڅخه جوړې کړې او تارونه يې ورڅخه پرې کړل چې په آبي، بانجاني او سرو وړيو او ښه کتان کې ورڅخه کار واخيستل شي، دا د يو ماهر کسبګر کار ؤ.

⁴هغوی د مقدس پېشبند دپاره د اوږې دوه تسمې جوړې کړې او د هغه په دواړو خواو باندې يې ونښلولې چې پېشبند ورسره وتړل شي.

⁵ښه اوبدل شوی کمربند چې د همدغه شان موادو څخه جوړ شوی ؤ، هغه د مقدس پېشبند سره ونښلول شو چې د يوې ټوټې په شان ښکاره شي. هغوی دا کار د څښتن د امر سره سم چې حضرت موسیٰ ته يې کړی ؤ وکړ.

⁶هغوی سليماني تيږې په هغو ځايونو کې ولګولې چې د سرو زرو د قابونو په شان جوړ شوي دي او په هغو باندې يې د مهر په شان د حضرت يعقوب د زامنو د نومونو نقش وويست.

⁷لکه څنګه چې څښتن په حضرت موسیٰ باندې امر کړی ؤ هغوی هغه تيږې د مقدس پېشبند د اوږې په تسمو باندې ولګولې چې د اسرائيلو د دولسو قبيلو استازيتوب وکړي.

⁸هغوی سينه پوښ د هماغو موادو څخه جوړ کړ چې مقدس پېشبند ورڅخه جوړ شوی ؤ او هماغسې ګلدوزي په کې وشوه.

⁹هغه څلور کنجه ؤ، دوه ويشت سانتي اوږد ؤ او دوه ويشت سانتي پلن ؤ او دوه قاته ؤ.

¹⁰بيا هغوی په هغه باندې څلور قطاره قيمتي تيږې ولګولې. په اول قطار کې يې يو ياقوت، يو ژيړ ياقوت او يو لعل ولګاوه،

¹¹په دوهم قطار کې يې يو زمروت، يو شين ياقوت او يو الماس ولګاوه،

¹²په دريم قطار کې يې يوه فيروزه، يو عقيق او يو ارغواني ياقوت ولګاوه،

¹³په څلورم قطار کې يې يو شينکی ياقوت، يوه سليماني تيږه او يو يشم ولګاوه. هغه په داسې ځايونو کې ولګول شول چې د سرو زرو د قابونو په شان جوړ شوي دي.

¹⁴دولس تيږې وې، د حضرت يعقوب د زامنو د هر نوم دپاره يوه يوه تيږه، په هرې يوې کې د يو مهر په شان نقش ايستل شوی ؤ او د دولسو قبيلو څخه د يوې قبيلې نوم په کې ؤ.

¹⁵هغوی د سينه پوښ دپاره د سوچه سرو زرو څخه داسې ځنځيرونه جوړ کړل چې د يوې رسۍ په شان تاو شوي ؤو.

¹⁶دوه د سرو زرو د قابونو په شان ځايونه او دوه د سرو زرو کړۍ ګانې يې جوړې کړې او د سينه پوښ په پورتنيو کنجونو پورې يې ونښلولې.

¹⁷په دغو دوو کړيو باندې يې دوه د سرو زرو ځنځيرونه وتړل،

¹⁸او د ځنځيرونو دوه نور سرونه يې په هغو ځايونو باندې چې د سرو زرو د قابونو په شان ؤو وتړل او په دې ډول يې د مقدس پېشبند د اوږې د تسمو په مخکينۍ برخې باندې ونښلول.

¹⁹هغوی د سرو زرو دوه کړۍ ګانې جوړې کړې او د سينه پوښ په لاندينيو کنجونو پورې يې په دننۍ څنډې باندې د مقدس پېشبند په څنګ کې ونښلولې.

²⁰دوه نورې کړۍ ګانې يې جوړې کړې او د اوږې د تسمو په لاندينۍ برخه کې يې ونښلولې چې د مقدس پېشبند په مخکينۍ برخې باندې بخۍ ته نژدې او د مقدس پېشبند د کمربند دپاسه وې.

²¹لکه څنګه چې څښتن حضرت موسیٰ ته امر کړی ؤ، هغوی د سينه پوښ کړۍ ګانې د مقدس پېشبند د کړۍ ګانو سره په آبي مزي باندې وتړلې چې د کمربند سره وصل شي، ترڅو سينه پوښ د مقدس پېشبند څخه لېرې نشي.

²²هغه چپنه چې د مقدس پېشبند لاندې اغوستل کېدله ټوله د آبي ټوکر څخه جوړه شوه.

²³د هغې په منځ کې يې د سر دپاره يو سوری پرېښود او د سوري ګردچاپېره يې يوه غاړه وګنډله ترڅو چپنه ونه شليږي.

²⁴هغوی د چپنې د لمنې په څنډه باندې د آبي، بانجاني او سرو وړيو او ښه کتان څخه انار جوړ کړل.

²⁵د سوچه سرو زرو څخه يې زنګونه جوړ کړل او هغه يې د لمنې په څنډه باندې د انارو ترمنځ ونښلول.

²⁶لکه څنګه چې څښتن په حضرت موسیٰ باندې امر کړی ؤ زنګونه او انار د هغې چپنې د لمنې په څنډه باندې چې د خدمت کولو دپاره به اغوستل کېدله، د يو او بل ترمنځ راغلل.

²⁷هغوی د حضرت هارون او د هغه د زامنو دپاره د ښه کتان څخه کميسونه جوړ کړل

²⁸او لونګۍ، خولۍ ګانې او نيکرونه يې ورته د ښه کتان څخه جوړ کړل.

²⁹پټۍ د ښه کتان او د آبي، بانجاني او سرو وړيو څخه جوړه شوې وه او هغه ګلدوزي شوې وه، لکه څنګه چې څښتن په حضرت موسیٰ باندې امر کړی ؤ

³⁰هغوی د سوچه سرو زرو څخه يو ګل جوړ کړ او په هغه باندې يې د دې لغتونو يعنې څښتن ته وقف شوی يو نقش وويست لکه څنګه چې په يو مهر باندې ايستل کيږي.

³¹لکه څنګه چې څښتن په حضرت موسیٰ باندې امر کړی ؤ هغوی هغه ګل په يو آبي مزي باندې د لونګۍ په مخکينۍ برخې پورې وتاړه.

³²په دې ډول هغه ټول کار چې په مقدسې خېمې باندې روان ؤ هغه ختم شو. اسرائيليانو ټول شيان د څښتن د امر سره سم چې حضرت موسیٰ ته يې کړی ؤ جوړ کړل.

³³بيا هغوی دا شيان حضرت موسیٰ ته راوړل: خېمه او د هغې ټول سامان، د هغې چنګکونه، چوکاټونه، اړمونه، ستنې او پايې،

³⁴د پسه د داسې پوستکي څخه پوښ چې سور رنګ ورکړل شوی ؤ، د ښې څرمنې پوښ او دننۍ پرده،

³⁵د لوظ صندوق چې د تيږو لوحې په کې دي، د هغه د ميلو سره او د هغه سرپوښ چې کفاره ورباندې ادا کيږي،

³⁶مېز د هغه د ټول سامان سره او مقدسه ډوډۍ،

³⁷د سوچه سرو زرو څراغدان، د هغه څراغونه، د هغه ټول سامان او د څراغونو دپاره تېل،

³⁸د سرو زرو قربانګاه، د مسح کولو تېل او خوشبويي، د مقدسې خېمې د دروازې دپاره پرده،

³⁹برنجي قربانګاه د هغې د برنجي جالۍ سره، د هغې ستنې او ټول لوښي، تشت د پايې سره،

⁴⁰د حويلۍ پردې د هغو د ستنو او پايو سره او د حويلۍ د دروازې دپاره پرده، د حويلۍ دپاره رسۍ ګانې او مېخونه، د مقدسې خېمې دپاره ټول سامان

⁴¹او ښکلي کالي چې په مقدس ځای کې د خدمت دپاره اغوستل کيږي، د حضرت هارون کاهن دپاره خاص لباس او د هغه د زامنو دپاره لباس کله چې هغوی د کاهنانو په توګه خدمت کوي.

⁴²لکه څنګه چې څښتن په حضرت موسیٰ باندې امر کړی ؤ، اسرائيليانو ټول کارونه سرته رسولي ؤو.

⁴³حضرت موسیٰ ټول کار وکاته او ويې ليدل چې هغوی د څښتن د امر سره سم کار کړی ؤ. نو هغوی ته يې برکت ورکړ.