Read Pashto (Nangahari) — د پښتو مقدس کتاب هجرت 4 Bible Online

هجرت 4 - Pashto (Nangahari) — د پښتو مقدس کتاب bible

هجرت 4

¹حضرت موسیٰ په ځواب کې وفرمايل: ”فرض کړه که چېرې اسرائيليان زما په خبرو باندې باور ونه کړي او ماته غوږ ونه نيسي او ووايي چې څښتن تاته نه دی ښکاره شوی، نو بيا څه وکړم؟“

²څښتن له حضرت موسیٰ څخه پوښتنه وکړه: ”ستا په لاس کې څه دي؟“ حضرت موسیٰ په ځواب کې وفرمايل: ”امسا.“

³خدای پاک وفرمايل: ”هغه په ځمکه باندې وغورزوه.“ کله چې هغه دا امسا په ځمکه وغورزوله، نو امسا په مار بدله شوه او هغه ورڅخه منډه کړه.

⁴بيا څښتن ورته وفرمايل: ”هغه د لکۍ څخه ونيسه.“ نو حضرت موسیٰ هغه راونيوه او مار بېرته په امسا بدل شو.

⁵څښتن حضرت موسیٰ ته وفرمايل: ”داسې کار وکړه. بيا به اسرائيليان باور وکړي چې زه تا ليدلی يم چې ستاسو د نيکونو ابراهيم، اسحاق او يعقوب خدای يم.“

⁶خدای پاک حضرت موسیٰ ته بيا وفرمايل: ”خپل لاس دې په ګرېوان کې ننباسه.“ هغه همداسې وکړل او کله چې هغه خپل لاس له ګرېوان څخه راوويسته هغه وليدل چې لاس يې د پوستکي په ناروغۍ باندې اخته شوی ؤ او لکه د واورې په شان سپين شوی ؤ.

⁷خدای پاک بيا ورته وفرمايل: ”لاس دې بېرته په ګرېوان کې ننباسه.“ حضرت موسیٰ هماغه شان وکړل. کله چې هغه خپل لاس بېرته راوويسته، د هغه لاس د هغه د نور بدن په شان روغ ؤ.

⁸څښتن وفرمايل: ”که چېرې هغوی ستا په خبره باور ونه کړي يا په اولنۍ معجزې باندې قانع نشي، نو بيا به په دې معجزې باندې قانع شي.

⁹که چېرې د دغو دوو معجزو سره سره بياهم هغوی ستا په خبره باور ونه کړي او ستا خبرو ته غوږ ونه نيسي، نو د نيل د سيند څخه لږې اوبه راواخله او په ځمکه باندې يې توی کړه. هغه اوبه به په وينه بدلې شي.“

¹⁰مګر حضرت موسیٰ وفرمايل: ”څښتنه، ما مه لېږه. زه هيڅکله هم ښه وياند نه وم. د اول نه هم نه وم او نه له هغه وخت څخه چې تا زما سره خبرې وکړې. زه په خبرو کولو کې کمزوری يم او ژبه مې نښلي.“

¹¹څښتن هغه ته وفرمايل: ”هغه څوک دی چې انسان ته يې ژبه ورکړې ده؟ چا چې کاڼه، ګنګيان، بينا او ړانده پيدا کړل؟ زه څښتن يم او دا هرڅه کوم.

¹²اوس لاړ شه! زه به ستا سره په خبرو کولو کې مرسته وکړم او درته وبه وايم چې څه ووايې.“

¹³مګر حضرت موسیٰ وفرمايل: ”څښتنه، ته بل څوک ولېږه چې دا کار وکړي.“

¹⁴څښتن په حضرت موسیٰ باندې په قهر شو او ويې فرمايل: ”آيا ستا ورور لاوي هارون نشته؟ هغه ښې خبرې کولی شي. هغه ستا د ليدنې کتنې دپاره راځي او ستا په ليدلو به خوشحاله شي.

¹⁵۱۵‏-۱۶ زه به د خبرو کولو په وخت کې ستاسو دواړو سره يم او تاسو دواړو ته به ووايم چې څه وکړئ. هغه به ستا وياند وي او ستا په ځای به خلکو ته خبرې کوي او ته به د هغه دپاره د خدای په شان يې او هغه ته به وايې چې داسې وايه.

¹⁷اوس دا امسا واخله او په هغې باندې معجزې ښکاره کوه.“

¹⁸حضرت موسیٰ خپل خسر يعنې يترون ته ورغی او هغه ته يې وفرمايل: ”ما پرېږده چې مصر ته لاړ شم چې وګورم زما خپلوان لا ژوندي دي او که نه.“ يترون هغه ته وويل: ”ځه په خير لاړ شې.“

¹⁹حضرت موسیٰ لا د مديان په خاوره کې ؤ چې څښتن هغه ته وفرمايل: ”مصر ته ستون شه. چا چې غوښتل تا ووژني هغوی اوس مړه دي.“

²⁰نو حضرت موسیٰ خپله ښځه او زامن په خره باندې سپاره کړل او د مصر په لور روان شو. حضرت موسیٰ هغه امسا هم له ځان سره يوړه د کومې په هکله چې خدای پاک ورته فرمايلي ؤو.

²¹څښتن بيا حضرت موسیٰ ته وفرمايل: ”اوس چې ته بېرته مصر ته روان يې، فرعون ته هغه معجزې وښايه چې تاته مې د هغو د ښودلو قدرت درکړی دی. مګر زه به د فرعون زړه سخت کړم او هغه به قوم پرېنږدي چې لاړ شي.

²²بيا فرعون ته ووايه چې څښتن فرمايي: اسرائيل زما دپاره لکه د مشر زوی په شان دي.

²³ما تاته امر وکړ چې هغوی پرېږده چې د مصر څخه ووزي او زما عبادت وکړي، مګر تا انکار وکړ. نو اوس به زه ستا مشر زوی ووژنم.“

²⁴د مصر په لاره کې چېرته چې هغوی شپه تېروله، څښتن د حضرت موسیٰ سره مخامخ شو او نژدې ؤ چې هغه ووژني.

²⁵۲۵‏-۲۶ خو صفورې خپل زوی په تېره تيږه باندې سنت کړ او د سنتېدو پوستکی يې د هغه په پښو باندې وواهه او د سنت ګيرۍ د رواج له مخې يې وويل: ” زما ګرانه زويه، دا وينه به ستا ساتنه وکړي.“ نو څښتن حضرت موسیٰ ته زيان ونه رساوه.

²⁷څښتن حضرت هارون ته وفرمايل: ”د موسیٰ د ليدلو دپاره دښتې ته لاړ شه.“ نو حضرت هارون د حضرت موسیٰ د ليدلو دپاره مقدس غره ته لاړ او کله چې ورسره مخامخ شو هغه يې ښکل کړ.

²⁸بيا حضرت موسیٰ هغه ټول شيان چې څښتن ورته فرمايلي ؤو او همدارنګه د هغو معجزو په هکله چې هغه ته يې د هغو د ښودلو حکم ورکړی ؤ حضرت هارون ته وفرمايل.

²⁹نو حضرت موسیٰ او حضرت هارون مصر ته لاړل او د اسرائيلو ټول مشران يې راغونډ کړل.

³⁰هغه ټول شيان چې څښتن حضرت موسیٰ ته فرمايلي ؤو حضرت هارون هغوی ته بيان کړل او بيا حضرت موسیٰ خلکو ته هغه معجزې وروښودلې.

³¹مشران ژر په دې باندې قانع شول چې حضرت موسیٰ او حضرت هارون د څښتن له خوا رالېږل شوي دي. کله چې هغوی پوه شول چې څښتن د هغوی بدبختي ليدلې ده او د هغوی دپاره زيات اندېښمن دی، نو ټول په سجده پرېوتل او عبادت يې وکړ.