Read Pashto (Nangahari) — د پښتو مقدس کتاب هجرت 40 Bible Online

هجرت 40 - Pashto (Nangahari) — د پښتو مقدس کتاب bible

هجرت 40

¹بيا څښتن حضرت موسیٰ ته وفرمايل:

²”د اولې مياشتې په اوله ورځ مقدسه خېمه ودروه.

³په هغې کې د لوظ صندوق چې لس حکمونه په کې دي کېږده او هغه په پردې باندې پټ کړه.

⁴مېز دننه راوړه او سامان ورباندې کېږده. همدارنګه څراغدان هم دننه راوړه او څراغونه ورباندې کېږده.

⁵د سرو زرو د خوشبويۍ قربانګاه د لوظ د صندوق په مخ کې کېږده او د خېمې په دروازه باندې پرده ځوړنده کړه.

⁶د سوزېدونکې نذرانې قربانګاه د مقدسې خېمې د دروازې په مخ کې کېږده.

⁷د خېمې او قربانګاه ترمنځ تشت کېږده او اوبه په کې واچوه.

⁸د هغې ګردچاپېره يوه حويلۍ جوړه کړه او د حويلۍ په دروازه باندې پرده ځوړنده کړه.

⁹د مسح کولو تېل واخله او خېمه او هرڅه چې په کې دي هغه ورباندې مسح کړه. خېمه او د هغې ټول سامان وقف کړه او هغه به مقدس شي.

¹⁰بيا د سوزېدونکې نذرانې د قربانۍ ځای او د هغه ټول لوښي مسح کړه. د قربانۍ ځای وقف کړه او هغه به په بشپړه توګه مقدس شي.

¹¹تشت او د هغه پايه مسح کړه او وقف يې کړه.

¹²هارون او د هغه زامن د مقدسې خېمې د دروازې خولې ته راوله او غسل ورته ورکړه.

¹³بيا هارون ته خاص لباس ورواغونده او مسح او وقف يې کړه ترڅو هغه د کاهن په توګه زما خدمت وکړي.

¹⁴د هغه زامن راوله او کميسونه ورته ورواغونده.

¹⁵هغوی کټ مټ داسې مسح کړه لکه څنګه چې تا د هغوی پلار مسح کړ، ترڅو هغوی د کاهنانو په توګه زما خدمت وکړي. د هغوی مسح کېدل به د يو داسې کاهنتوب دپاره وي چې تل ترتله به دوام ومومي.“

¹⁶حضرت موسیٰ هرڅه کټ مټ د څښتن د امر په مطابق وکړل.

¹⁷نو په دوهم کال وروسته له دې چې هغوی له مصر څخه لاړل، د اولې مياشتې په اوله ورځ خېمه ودروله شوه.

¹⁸کله چې حضرت موسیٰ خېمه ودروله نو د هغې پايې يې په خپل ځای کې کېښودلې. چوکاټونه يې ودرول، اړمونه يې ورننه ايستل او ستنې يې ودرولې.

¹⁹لکه څنګه چې څښتن امر کړی ؤ، هغه په خېمه باندې پوښ وغوړاوه او په هغه باندې يې بيرونی پوښ واچاوه.

²⁰هغه د تيږو دوه لوحې واخيستلې او د لوظ په صندوق کې يې کېښودلې. ميلې يې د صندوق په کړۍ ګانو کې واچولې او هغه سرپوښ يې ورباندې واچاوه چې کفاره ورباندې ادا کيږي.

²¹لکه څنګه چې څښتن امر کړی ؤ، حضرت موسیٰ د لوظ صندوق خېمې ته دننه راوړ او پرده يې ځوړنده کړه. په دې ډول يې صندوق پټ کړ.

²²حضرت موسیٰ مېز په خېمه کې شمال خواته د پردې څخه بيرون کېښود

²³او لکه څنګه چې څښتن امر کړی ؤ، په هغه باندې يې هغه مقدسه ډوډۍ کېښودله چې څښتن ته وړاندې کيږي.

²⁴څراغدان يې په خېمه کې مېز ته مخامخ جنوب خواته کېښود

²⁵او لکه څنګه چې څښتن امر کړی ؤ، د څښتن په حضور کې يې څراغونه کېښودل.

²⁶حضرت موسیٰ د سرو زرو قربانګاه په خېمه کې د پردې په مخ کې کېښودله

²⁷او لکه څنګه چې څښتن امر کړی ؤ، په هغې باندې يې خوشبويي وسوزوله.

²⁸بيا يې پرده د خېمې په دروازه کې ځوړنده کړه.

²⁹لکه څنګه چې څښتن امر کړی ؤ، هغه د سوزېدونکې نذرانې قربانګاه د خېمې دروازې ته نژدې ودروله او په هغې باندې يې سوزېدونکې او د غلې دانې نذرانې وړاندې کړې.

³⁰تشت يې د خېمې او د قربانۍ د ځای ترمنځ کېښود او د مينځلو دپاره يې اوبه په کې واچولې

³¹او حضرت موسیٰ، حضرت هارون او د هغه زامنو به د هغه څخه د خپلو لاسونو او پښو د مينځلو دپاره کار اخيست.

³²هرکله به چې هغوی خېمې ته ورننوتل يا به د قربانۍ ځای ته ورتلل، نو خپل لاسونه او پښې به يې مينځلې، لکه څنګه چې څښتن په حضرت موسیٰ باندې امر کړی ؤ.

³³بيا حضرت موسیٰ د خېمې او د قربانۍ د ځای ګردچاپېره حويلۍ جوړه کړه او د حويلۍ په دروازې باندې يې پرده ځوړنده کړه. نو حضرت موسیٰ کار پای ته ورساوه.

³⁴بيا ورېځ خېمه پټه کړه او د څښتن د جلال څخه ډکه شوه.

³⁵نو له دې کبله حضرت موسیٰ نشو کولی چې خېمې ته ورننوزي.

³⁶اسرائيليانو به يوازې هغه وخت خپل کمپ بل ځای ته انتقالاوه چې کله به ورېځ د خېمې څخه پورته کېدله.

³⁷ترڅو پورې چې ورېځ به هلته ولاړه وه نو هغوی به خپل کمپ نه انتقالاوه.

³⁸د ټولو سفرونو په دوران کې ټولو اسرائيليانو د ورځې له خوا د څښتن د حضور ورېځ د خېمې دپاسه ليدلی شوه او د شپې له خوا به يې ليدل چې په ورېځ کې اور بليږي.