Read Pashto (Nangahari) — د پښتو مقدس کتاب هجرت 5 Bible Online

هجرت 5 - Pashto (Nangahari) — د پښتو مقدس کتاب bible

هجرت 5

¹بيا حضرت موسیٰ او حضرت هارون فرعون ته ورغلل او ورته ويې فرمايل: ”د اسرائيلو څښتن خدای فرمايي: زما قوم پرېږده چې دښتې ته لاړ شي او هلته زما د احترام په خاطر اختر ولمانځي.“

²فرعون وويل: ”څښتن څوک دی؟ زه ولې د هغه خبرو ته غوږ ونيسم او اسرائيليان پرېږدم چې لاړ شي؟ زه څښتن نه پېژنم او نه به اسرائيلو ته د تګ اجازه ورکړم.“

³هغوی په ځواب کې وفرمايل: ”د عبرانيانو خدای مونږ ته راښکاره شوی دی. مونږ پرېږده چې د دريو ورځو دپاره په دښتې کې سفر وکړو ترڅو خپل څښتن خدای ته قرباني وړاندې کړو. که نه، نو هغه به مونږ د ناروغيو او جګړې په وسيله ووژني.“

⁴فرعون حضرت موسیٰ او حضرت هارون ته وويل: ”تاسو ولې خلک له کاره وباسئ؟ هر يو بېرته په خپل کار پسې لاړ شئ!

⁵ستاسو شمېر له مصريانو څخه زيات شوی دی. او اوس غواړئ چې کار بس کړئ!“

⁶په هماغه ورځ فرعون د غلامانو په مصري مسئولانو او د کارګرانو په اسرائيلي مشرانو امر وکړ:

⁷”نور خلکو ته د خښتو جوړولو دپاره بوس مه ورکوئ. هغوی ته ووايئ چې لاړ شي او په خپله يې د ځانونو دپاره پيدا کړي.

⁸مګر هغوی بايد دومره خښتې جوړې کړي څومره يې چې پخوا جوړولې. هغوی تنبلان دي، ځکه ماته زارۍ کوي چې هغوی پرېږدم چې لاړ شي او خپل خدای ته قرباني وړاندې کړي!

⁹په هغوی باندې سخت کار وکړئ او مصروف يې وساتئ چې داسې درواغو ته بيا غوږ ونه نيسي.“

¹⁰نو د غلامانو مسئولان او د کارګرانو مشران راغلل او ويې ويل: ”فرعون وايي: زه به نور تاسو ته بوس درنکړم.

¹¹لاړ شئ او هرچېرته چې کولی شئ د ځانونو دپاره بوس پيدا کړئ، خو بيا به هم دومره خښتې جوړوئ څومره چې مو مخکې جوړولې.“

¹²نو خلک په ټول مصر کې وګرځېدل ترڅو د ځانونو دپاره بوس پيدا کړي.

¹³د غلامانو مسئولانو به په هغوی فشار اچاوه او هغوی ته به يې ويل: ”تاسو بايد هره ورځ دومره خښتې جوړې کړئ څومره چې تاسو هغه وخت جوړولې چې بوس درته درکول کېدل.“

¹⁴د غلامانو مصري مسئولانو به هغه اسرائيلي مشران وهل چې په دوی باندې يې مقرر کړي ؤو او ورته ويل به يې: ”تاسو نن سبا دا غلامان ولې نه مجبوروئ چې دومره خښتې جوړې کړي څومره چې هغوی مخکې جوړولې؟“

¹⁵په آخر کې د کارګرانو مشران فرعون ته ورغلل او ورته ويې ويل: ”تاسو ولې زمونږ سره داسې چلند کوئ؟

¹⁶مونږ ته هيڅوک بوس نه راوړي، مګر بياهم امر راته کيږي چې هماغومره خښتې جوړې کړو. هغوی مونږ وهي، حال دا چې ستاسو خپل خلک ملامت دي.“

¹⁷فرعون په ځواب کې وويل: ”تاسو تنبلان يئ او نه غواړئ چې کار وکړئ. په دې خاطر ماته وايئ چې تاسو پرېږدم چې لاړ شئ او څښتن ته قرباني وړاندې کړئ.

¹⁸اوس خپل کار پسې لاړ شئ! تاسو ته به بوس نه درکول کيږي، مګر بياهم په هماغه اندازه خښتې جوړې کړئ.“

¹⁹د کارګرانو مشران پوه شول چې د هغوی حال نور هم خراب شو کله چې فرعون په هغوی امر وکړ چې تاسو به هغومره خښتې جوړوئ لکه مخکې به چې تاسو جوړولې.

²⁰څنګه چې هغوی د فرعون له دربار څخه ووتل، د حضرت موسیٰ او حضرت هارون ليدلو ته چې ورته په انتظار ؤو لاړل.

²¹هغوی حضرت موسیٰ او حضرت هارون ته وويل: ”تاسو چې څه کړي دي هغه څښتن ليدلي دي او تاسو دواړو ته به سزا درکړي ځکه چې ستاسو د لاسه فرعون او د هغه درباريان زمونږ څخه کرکه کوي. تاسو هغوی ته بهانه په لاس ورکړه چې مونږ ووژني.“

²²حضرت موسیٰ بېرته څښتن ته ورغی او ويې فرمايل: ”ای څښتنه، ولې دې خپل قوم د بدبختيو سره مخامخ کړی دی؟ آيا زه دې د همدې دپاره رالېږلی يم؟

²³له هغه وخت څخه چې تا ماته وويل چې د فرعون سره خبرې وکړه، هغه ورباندې ظلم کوي او تا د هغوی سره هيڅ مرسته ونه کړه.“