Read Pashto (Nangahari) — د پښتو مقدس کتاب هجرت 6 Bible Online

هجرت 6 - Pashto (Nangahari) — د پښتو مقدس کتاب bible

هجرت 6

¹څښتن حضرت موسیٰ ته وفرمايل: ”اوس به ته وګورې چې زه د فرعون سره څه کوم. زه به هغه دومره مجبور کړم چې زما قوم پرېږدي چې لاړ شي او هغوی به په زوره د خپلې خاورې څخه وباسي.“

²خدای پاک د حضرت موسیٰ سره خبرې وکړې او ويې فرمايل: ”زه څښتن يم.

³مګر کله چې زه ابراهيم، اسحاق او يعقوب ته ورښکاره شوم، زه د مطلق قادر خدای په توګه راغلم او ما هغوی ته داسې ځان ور ونه پېژانده چې زما نوم څښتن دی.

⁴ما د هغوی سره دا لوظ هم وکړ چې زه به د کنعان ځمکه چې هغوی په کې د بېګانه خلکو په توګه اوسېدل دوی ته ورکوم.

⁵اوس ما د اسرائيليانو فرياد چې د مصريانو غلامان دي اورېدلی دی او ماته خپل لوظ په ياد دی.

⁶اسرائيليانو ته ووايه چې زه هغوی ته وايم: زه څښتن يم! زه به تاسو وژغورم او په خپل لوی قدرت سره به مصريانو ته سزا ورکړم او د غلامۍ څخه به مو آزاد کړم.

⁷زه به ستاسو څخه خپل قوم جوړ کړم او ستاسو خدای به يم. کله چې زه تاسو د مصريانو د غلامۍ څخه آزاد کړم، بيا به پوه شئ چې زه ستاسو څښتن خدای يم.

⁸زه به تاسو هغه وطن ته راولم چې د هغه د ورکولو ټينګه وعده مې د ابراهيم، اسحاق او يعقوب سره کړې وه. زه به دا وطن تاسو ته درکړم چې ستاسو شي. زه څښتن يم!“

⁹حضرت موسیٰ اسرائيليانو ته دا خبرې وکړې، خو هغوی د هغه خبرو ته غوږ ونه نيوه ځکه چې د هغوی زړونه د بې رحمانه غلامۍ په سبب مات شوي ؤو.

¹⁰بيا څښتن حضرت موسیٰ ته وفرمايل:

¹¹”لاړ شه او د مصر پادشاه فرعون ته ووايه چې اسرائيليان پرېږدي چې د مصر څخه ووزي.“

¹²حضرت موسیٰ په ځواب کې وفرمايل: ”اسرائيليان چې زما خبره نه اوري نو فرعون به يې څنګه واوري، ځکه چې زه ښې خبرې نشم کولی.“

¹³څښتن په حضرت موسیٰ او حضرت هارون باندې امر وکړ چې اسرائيليانو او د مصر پادشاه ته ووايي: ”څښتن مونږ ته حکم کړی دی چې اسرائيليان د مصر څخه راوباسئ.“

¹⁴روبين د حضرت يعقوب مشر زوی څلور زامن درلودل چې حنوک، فلو، حصرون او کرمي نومېدل. هغوی د هغو طايفو نيکونه ؤو چې د هغوی په نوم ياديږي.

¹⁵شمعون شپږ زامن درلودل: يموئيل، يامين، اوهد، ياکين، صوحر او شائول چې د يوې کنعانۍ ښځې زوی ؤ. هغوی د هغو طايفو نيکونه ؤو چې د هغوی په نوم ياديږي.

¹⁶لاوي درې زامن درلودل چې جرشون، قهات او مراري نومېدل. هغوی د هغو طايفو نيکونه ؤو چې د هغوی په نوم ياديږي. لاوي يوسلو اوه دېرش کاله ژوند وکړ.

¹⁷جرشون دوه زامن درلودل چې لبني او شمعي نومېدل چې هغوی د خپلو طايفو نيکونه شول.

¹⁸قهات څلور زامن درلودل چې عمرام، يصهار، حبرون او عزيئيل نومېدل. قهات يوسلو دري دېرش کاله ژوند وکړ.

¹⁹مراري دوه زامن درلودل چې محلي او موشي نومېدل. دا د لاوي طايفې وې د هغوی د اولادې په مطابق.

²⁰عمرام د خپل پلار د خور يوکابد سره واده وکړ چې د هغې نه حضرت موسیٰ او حضرت هارون پيدا شول. عمرام يوسلو اوه دېرش کاله ژوند وکړ.

²¹يصهار درې زامن درلودل چې قورح، نافج او زکري نومېدل.

²²عزيئيل هم درې زامن درلودل چې ميشائيل، ايلصافان او ستري نومېدل.

²³حضرت هارون د اليشابع سره چې د عميناداب لور او د نشحون خور وه واده وکړ او د هغې څخه ناداب، ابيهو، العازار او يتامار پيدا شول.

²⁴قورح درې زامن درلودل چې اسير، القانه او ابياساف نومېدل. دوى د قورح د طايفو نيکونه ؤو.

²⁵العازار د حضرت هارون زوی د فوتيئيل د يوې لور سره واده وکړ او د هغې نه فينحاس پيدا شو. دا طايفه په طايفه د لاوي د کورنيو مشران ؤو.

²⁶حضرت هارون او حضرت موسیٰ هماغه خلک ؤو چې څښتن ورته وفرمايل: ”د اسرائيلو قبيلې د مصر څخه راوباسئ.“

²⁷دا هغه خلک ؤو چې فرعون سره يې د مصر څخه د اسرائيليانو د ويستلو په هکله خبرې کړې وې.

²⁸کله چې څښتن د حضرت موسیٰ سره د مصر په خاوره کې خبرې وکړې،

²⁹هغه حضرت موسیٰ ته وفرمايل: ”زه څښتن يم. زه چې هرڅه تاته وايم هغه د مصر پادشاه ته ووايه.“

³⁰مګر حضرت موسیٰ څښتن ته وفرمايل: ”دا چې زه ښې خبرې نشم کولی نو څنګه به فرعون راته غوږ ونيسي؟“