Read Pashto (Nangahari) — د پښتو مقدس کتاب هجرت 7 Bible Online

هجرت 7 - Pashto (Nangahari) — د پښتو مقدس کتاب bible

هجرت 7

¹څښتن حضرت موسیٰ ته وفرمايل: ”زه به تا فرعون ته لکه د خدای په شان کړم او ستا ورور هارون به ستا د پيغمبر په توګه د هغه سره خبرې کوي.

²زه چې تاته د هر شي په باره کې حکم کوم، هغه هارون ته ووايه او هغه به فرعون ته ووايي چې اسرائيليان پرېږدي چې د مصر د خاورې څخه لاړ شي.

³۳‏-۴ مګر زه به د فرعون زړه سخت کړم او هغه به ستا خبرو ته غوږ نه نيسي. حتیٰ که زه ډېرې وېروونکې معجزې هم هغه او مصريانو ته وروښايم هغه به درته غوږ ونه نيسي. بيا به زه په مصر باندې سخت عذاب نازل کړم او د خپل قوم قبيلې به له هغه ځای څخه وباسم.

⁵کله چې زه مصريانو ته خپل قدرت وښايم او اسرائيليان د هغوی له وطنه وباسم، بيا به هغوی پوه شي چې زه څښتن يم.“

⁶څنګه چې څښتن په حضرت موسیٰ او حضرت هارون باندې امر کړی ؤ، هغوی هماغسې وکړل.

⁷هغه وخت چې هغوی د فرعون سره خبرې وکړې، حضرت موسیٰ د اتيا کالو او حضرت هارون د دري اتيا کالو په عمر ؤ.

⁸څښتن حضرت موسیٰ او حضرت هارون ته وفرمايل:

⁹”که چېرې فرعون تاسو ته ووايي چې ماته يوه معجزه وښايئ، بيا هارون ته ووايه چې خپله امسا راواخله او د فرعون په مخکې يې وغورزوه او هغه به په مار بدله شي.“

¹⁰نو حضرت موسیٰ او حضرت هارون فرعون ته ورغلل او هماغسې يې وکړل څنګه چې څښتن ورباندې امر کړی ؤ. حضرت هارون خپله امسا د فرعون او د هغه د درباريانو په مخکې وغورزوله او هغه په مار بدله شوه.

¹¹بيا فرعون خپل حکيمان او جادوګران راوغوښتل. هغوی هم د خپلې جادو په وسيله دا کار وکړ.

¹²هغوی هر يو خپلې امساګانې په ځمکه وغورزولې او هغه امساګانې په مارانو بدلې شوې. مګر د حضرت هارون مار هغه نور ماران روغ تېر کړل.

¹³بياهم د فرعون زړه سخت پاتې شو او څنګه چې څښتن فرمايلي ؤو، فرعون حضرت موسیٰ او حضرت هارون ته غوږ ونه نيوه.

¹⁴بيا څښتن حضرت موسیٰ ته وفرمايل: ”د فرعون زړه ډېر سخت دی او د اسرائيلو قوم نه پرېږدي چې لاړ شي.

¹⁵سهار کله چې فرعون د نيل سيند ته ځي خپله امسا چې په مار بدله شوې وه هغه هم د ځان سره يوسه او د سيند په غاړه هغه ته انتظار وکړه.

¹⁶بيا هغه ته ووايه: څښتن د عبرانيانو خدای زه رالېږلی يم چې تاته داسې ووايم: زما قوم پرېږده چې دښتې ته لاړ شي او هلته زما عبادت وکړي. مګر تر اوسه پورې دې ورته توجه نه ده کړې.

¹⁷اعليحضرته، څښتن داسې فرمايي: زه به داسې کار وکړم چې ته پوه شې چې زه څښتن يم. اوس ګوره، دا امسا چې زما په لاس کې ده، په دې به د نيل د سيند اوبه ووهم او هغه به په وينه بدلې شي.

¹⁸د سيند ماهيان به مړه شي او د نيل سيند به بد بوی کوي. مصريان به نشي کولی چې له هغه څخه اوبه وڅښي.“

¹⁹څښتن حضرت موسیٰ ته وفرمايل: ”هارون ته ووايه چې خپله امسا د ځان سره يوسي او د مصر د اوبو يعنې ويالو، نهرونو او ډنډونو خواته يې ونيسي چې هغه به په وينه بدلې شي. د مصر په هرځای کې به اوبه په وينه باندې بدلې شي، حتیٰ د خلکو په کورونو کې به هم د لرګيو په لوښو او د تيږو په منګيو کې وينه وي.“

²⁰بيا حضرت موسیٰ او حضرت هارون د څښتن په امر باندې عمل وکړ. د فرعون او د هغه د درباريانو په حضور کې حضرت هارون خپله امسا پورته کړه او د سيند اوبه يې په هغې ووهلې او ټولې اوبه چې په کې وې په وينه بدلې شوې.

²¹د سيند ماهيان مړه شول او سيند دومره ډېر بد بوی کاوه چې مصريانو نشو کولی چې له هغه څخه اوبه وڅښي. د مصر په هر ګوټ کې وينه وه.

²²بيا د فرعون جادوګرانو هم د خپلې جادو په وسيله همداسې عمل سرته ورساوه او د فرعون زړه د مخکې په شان سخت پاتې شو. لکه څنګه چې څښتن فرمايلي ؤو، فرعون د حضرت موسیٰ او حضرت هارون خبرو ته غوږ ونه نيوه.

²³د دې په ځای چې هغه دې خبرې ته پام وکړي، هغه تاو شو او بېرته خپلې ماڼۍ ته لاړ.

²⁴ټولو مصريانو د نيل د سيند غاړه وکيندله چې د څښلو اوبه راپيدا کړي، ځکه چې هغوی نشو کولی د سيند اوبه وڅښي.

²⁵د هغه وخت څخه چې څښتن د نيل د سيند اوبه په وينه باندې بدلې کړې پوره اوه ورځې تېرې شوې.