Read Pashto (Nangahari) — د پښتو مقدس کتاب هجرت 8 Bible Online

هجرت 8 - Pashto (Nangahari) — د پښتو مقدس کتاب bible

هجرت 8

¹بيا څښتن حضرت موسیٰ ته وفرمايل: ”فرعون ته ورشه او هغه ته ووايه چې څښتن فرمايي: زما قوم پرېږده چې لاړ شي او زما عبادت وکړي.

²که چېرې ته د هغوی د پرېښودلو څخه انکار وکړې، زه به ستا په ټول هېواد باندې د چونګښو بلا نازله کړم.

³د نيل سيند به د چونګښو څخه ډک شي. هغوی به ستا ماڼۍ او ستا د خوب کوټې ته درننوزي او ستا کټ ته به دروخېژي. حتیٰ ستا د قوم او د درباريانو کورونو او ستا تنورونو او د خميره کولو لګنونو ته به هم ورننوزي.

⁴چونګښې به ستا، ستا د قوم او ستا د ټولو درباريانو سرونو ته ټوپونه وهي.“

⁵څښتن حضرت موسیٰ ته وفرمايل: ”هارون ته ووايه: خپله امسا د ويالو، نهرونو او ډنډونو خواته ونيسه ترڅو چونګښې بيرون ووزي او د مصر ځمکه په هغو پټه شي.“

⁶نو حضرت هارون خپله امسا د اوبو په سر ونيوله او چونګښې راووتلې او ځمکه ورباندې پټه شوه.

⁷مګر جادوګرانو هم همداسې کار وکړ. هغوی هم د جادو په وسيله چونګښې ځمکې ته راوويستلې.

⁸فرعون حضرت موسیٰ او حضرت هارون راوغوښتل او ورته ويې ويل: ”تاسو څښتن ته دعا وکړئ چې زمونږ څخه دا چونګښې لېرې کړي نو زه به ستاسو قوم پرېږدم چې لاړ شي او څښتن ته قربانۍ وړاندې کړي.“

⁹حضرت موسیٰ په ځواب کې وفرمايل: ”زه به ستا دپاره دعا وکړم. ماته وخت وټاکه چې زه کله ستا، ستا د درباريانو او ستا د قوم دپاره دعا وکړم. بيا به تاسو او ستاسو کورونه د چونګښو څخه خلاص شي او يوازې د نيل په سيند کې به چونګښې پاتې شي.“

¹⁰فرعون په ځواب کې وويل: ”سبا زما دپاره دعا وکړه.“ حضرت موسیٰ وفرمايل: ”څنګه چې ستا خوښه وي زه به هماغسې وکړم. بيا به ته پوه شې چې زمونږ د څښتن خدای په شان بل خدای نشته.

¹¹ته، ستا درباريان او ستا خلک به له چونګښو څخه خلاص شئ او چونګښې به بغير د نيل د سيند څخه په بل ځای کې پاتې نشي.“

¹²بيا حضرت موسیٰ او حضرت هارون له فرعون څخه لاړل او حضرت موسیٰ څښتن ته سوال وکړ چې هغه چونګښې له منځه يوسي چې څښتن په فرعون باندې نازلې کړې وې.

¹³څښتن د حضرت موسیٰ سوال قبول کړ او هغه چونګښې چې په کورونو، حويليو او پټيو کې وې مړې شوې.

¹⁴مصريانو هغه ډېرۍ کړې او ټوله ځمکه خوسا بوى ونيوله.

¹⁵کله چې فرعون وليدل چې چونګښې مړې شوې، هغه بيا خپل زړه سخت کړ او لکه څنګه چې څښتن فرمايلي ؤو هغه د حضرت موسیٰ او حضرت هارون خبرو ته غوږ ونه نيوه.

¹⁶بيا څښتن حضرت موسیٰ ته وفرمايل: ”هارون ته ووايه چې په خپله امسا باندې ځمکه ووهي چې د مصر ټولې خاورې په ورږو بدلې شي.“

¹⁷نو حضرت هارون ځمکه په امسا باندې ووهله او د مصر ټولې خاورې په ورږو بدلې شوې او ټول انسانان او حيوانات په کې پټ شول.

¹⁸جادوګرانو هڅه وکړه چې د جادو په وسيله ورږې پيدا کړي، مګر هغوی ونشو کولی. په انسانانو او حيواناتو باندې ورږې وې.

¹⁹جادوګرانو فرعون ته وويل: ”دا کار خدای کړی دی!“ مګر د فرعون زړه سخت ؤ او څنګه چې څښتن فرمايلي ؤو، فرعون د حضرت موسیٰ او حضرت هارون خبرو ته غوږ ونه نيوه.

²⁰څښتن حضرت موسیٰ ته وفرمايل: ”سبا سهار وختي پاڅه او کله چې فرعون سيند ته ځي، ورشه او ورسره وګوره او هغه ته ووايه چې څښتن داسې فرمايي: زما قوم پرېږده چې لاړ شي او زما عبادت وکړي.

²¹که ته زما قوم پرېنږدې چې لاړ شي، زه به په تا، ستا په درباريانو او ستا په قوم او په کورونو باندې مچان نازل کړم. د مصريانو کورونه به د مچانو څخه ډک شي او ځمکه به ورباندې پټه شي.

²²مګر زه به د جوشن سيمه چې زما قوم په کې اوسي، بچ کړم چې هلته هيڅ مچان نه وي. دا کار د دې دپاره کوم ترڅو تاسو پوه شئ چې زه حتیٰ په دې خاوره باندې هم اختيار لرم.

²³زه به ستا او د خپل قوم ترمنځ ښکاره فرق وکړم. دا معجزه به سبا پېښيږي.“

²⁴نو څښتن د فرعون په ماڼۍ او د هغه د درباريانو په کورونو باندې ډېر زيات مچان نازل کړل. مچانو د مصر ټول هېواد وران کړ.

²⁵بيا فرعون حضرت موسیٰ او حضرت هارون راوغوښتل او هغوی ته يې وويل: ”لاړ شئ او په همدې هېواد کې خپل خدای ته قربانۍ وړاندې کړئ.“

²⁶حضرت موسیٰ په ځواب کې وفرمايل: ”دا ښه کار نه دی. ځکه مصريان به زمونږ څخه خفه شي چې مونږ خپل څښتن خدای ته حيوانات قرباني کړو. که چېرې دا حيوانات په داسې ځای کې قرباني کړو چې مصريان مو وويني، نو هغوی به مونږ سنګسار کړي.

²⁷لکه څنګه چې زمونږ څښتن خدای امر کړی دی، مونږ بايد هغه ته د قربانۍ وړاندې کولو په خاطر درې ورځې په دښته کې سفر وکړو.“

²⁸فرعون وويل: ”زه به تاسو پرېږدم چې لاړ شئ او خپل څښتن خدای ته په دښته کې قرباني وړاندې کړئ. مګر ډېر لېرې لاړ نشئ او زما دپاره دعا وکړئ.“

²⁹حضرت موسیٰ په ځواب کې وفرمايل: ”څنګه چې زه لاړ شم نو ستا دپاره به دعا وکړم چې څښتن ستا، ستا له درباريانو او ستا له قوم څخه مچان لېرې کړي. مګر ته به بيا مونږ نه غولوې او د قوم مخنيوی به نه کوې چې هغوی څښتن ته قرباني وړاندې کړي.“

³⁰حضرت موسیٰ د فرعون څخه لاړ او څښتن ته يې دعا وکړه.

³¹څښتن د حضرت موسیٰ دعا قبوله کړه. مچانو فرعون، د هغه درباريان او د هغه قوم پرېښودل. يو مچ هم پاتې نشو.

³²مګر دا ځل هم فرعون خپل زړه سخت کړ او د اسرائيلو قوم يې پرېنښود چې لاړ شي.