Read Pashto (Nangahari) — د پښتو مقدس کتاب هجرت 9 Bible Online

هجرت 9 - Pashto (Nangahari) — د پښتو مقدس کتاب bible

هجرت 9

¹بيا څښتن حضرت موسیٰ ته وفرمايل: ”فرعون ته ورشه او ورته ووايه چې د عبرانيانو څښتن خدای داسې فرمايي: زما قوم پرېږده چې لاړ شي او زما عبادت وکړي.

²که چېرې ته بيا د هغوی د پرېښودلو څخه انکار وکړې،

³زه به تاته سزا درکړم او ستا حيوانات يعنې آسونه، خره، اوښان، رمې او پادې به په خطرناکه ناروغۍ باندې اخته کړم.

⁴زه به د اسرائيليانو او مصريانو د حيواناتو ترمنځ فرق وکړم او د اسرائيليانو يو حيوان به هم مړ نشي.

⁵ما څښتن سبا ورځ د دې کار دپاره ټاکلې ده.“

⁶په راتلونکې ورځ څښتن په خپلې خبرې باندې عمل وکړ. د مصريانو ټول حيوانات مړه شول، مګر د اسرائيليانو يو حيوان هم مړ نشو.

⁷فرعون د دې خبرې د څېړنې دپاره نفر ولېږل او معلومه شوه چې د اسرائيليانو يو حيوان هم مړ شوی نه ؤ. بياهم د هغه زړه سخت ؤ او د اسرائيلو قوم يې تګ ته نه پرېښوده.

⁸بيا څښتن حضرت موسیٰ او حضرت هارون ته وفرمايل: ”له تنور څخه يو څو لپې ايرې راواخلئ چې موسیٰ يې د فرعون په مخکې په هوا کې وشيندي.

⁹هغه به د مصر په ټول هېواد کې لکه د دوړې په شان خپره شي او په هرځای کې به په خلکو او حيواناتو باندې دانې وخېژي چې زخمونه به ورڅخه پيدا شي.“

¹⁰نو هغوی لږه ايره د ځانه سره واخيستله او د فرعون په مخکې ودرېدل. حضرت موسیٰ هغه په هوا کې وشيندله او له هغې څخه دانې پيدا شوې او په خلکو او حيواناتو باندې يې زخمونه جوړ کړل.

¹¹جادوګران د حضرت موسیٰ په مقابل کې نشول درېدلی ځکه چې د هغوی بدنونه هم لکه د نورو مصريانو په شان د دانو څخه ډک ؤو.

¹²مګر څښتن د فرعون زړه سخت کړ او لکه څنګه چې هغه حضرت موسیٰ ته فرمايلي ؤو، فرعون د حضرت موسیٰ او حضرت هارون خبرو ته غوږ ونه نيوه.

¹³څښتن حضرت موسیٰ ته وفرمايل: ”سبا سهار وختي پاڅه او د فرعون سره ووينه او هغه ته ووايه چې د عبرانيانو څښتن خدای داسې فرمايي: زما قوم پرېږده چې لاړ شي او زما عبادت وکړي.

¹⁴زه به دا ځل يوازې ستا درباريانو او ستا خلکو ته سزا نه ورکوم بلکه تاته به هم سزا درکړم، ترڅو پوه شې چې په ټوله دنيا کې زما په شان بل خدای نشته.

¹⁵که چېرې ما ته او ستا قوم په ناروغۍ باندې اخته کړي وای، اوس به تاسو د ځمکې له مخ څخه ورک شوي وای.

¹⁶مګر د دې دپاره مې ژوندی ساتلی يې چې تاته خپل قدرت وښايم او زما نوم په ټوله دنيا کې مشهور شي.

¹⁷بياهم په خپل ځان باندې غره يې او زما قوم ته د تګ اجازه نه ورکوې.

¹⁸سبا دا وخت به زه داسې سخته ږلۍ واوروم چې هيڅکله د مصر په تاريخ کې نه وي شوې.

¹⁹اوس حکم ورکړه چې ستا ټول حيوانات او هرڅه چې په پټيو کې دي يو پناه ځای ته راوړي. ځکه هغه خلک او حيوانات چې په پټيو کې دي په هغوی باندې به ږلۍ واوريږي او ټول به مړه شي.“

²⁰د فرعون ځينې درباريان د څښتن د دې خبرې څخه ووېرېدل او په چټکۍ سره يې خپل غلامان او حيوانات دننه راوستل.

²¹نورو د څښتن خبرداري ته غوږ ونه نيوه او خپل غلامان او حيوانات يې په پټيو کې پرېښودل.

²²بيا څښتن حضرت موسیٰ ته وفرمايل: ”خپل لاس د آسمان خواته اوږد کړه نو په ټول مصر، په خلکو، په حيواناتو او هرڅه چې د مصر په ځمکه کې شنه کيږي په هغوی باندې به ږلۍ واوريږي.“

²³کله چې حضرت موسیٰ خپله امسا د آسمان خواته اوږده کړه، څښتن تندر او ږلۍ نازله کړه او برېښنا په ځمکه باندې پړکېدله.

²⁴ږلۍ واورېدله او برېښنا پرله پسې پړکېدله. دا د مصر په تاريخ کې ترټولو بد طوفان ؤ.

²⁵په ټول مصر کې هرڅه چې په پټيو کې ؤو، د ټولو خلکو او حيواناتو سره ږلۍ له منځه يوړل. ږلۍ د پټيو بوټي هم له منځه يوړل او ټولې ونې يې ماتې کړې.

²⁶يوازې په جوشن کې چې اسرائيليان په کې اوسېدل ږلۍ ونه اورېدله.

²⁷فرعون حضرت موسیٰ او حضرت هارون راوغوښتل او ورته ويې ويل: ”دا ځل ګناه زما ده. څښتن په حقه دی او زه او زما قوم ملامت يو.

²⁸څښتن ته دعا وکړه چې مونږ د دې تندر او ږلۍ څخه تنګ شوي يو. زه به تاسو پرېږدم چې لاړ شئ. تاسو نور مجبور نه يئ چې دلته پاتې شئ.“

²⁹حضرت موسیٰ هغه ته په ځواب کې وفرمايل: ”کله چې زه د ښار څخه ووزم، زه به څښتن ته په دعا کې لاسونه پورته کړم. تندر به ودريږي او ږلۍ به نوره ونه اوريږي، نو ته به پوه شې چې څښتن د ټولې دنيا خاوند دی.

³⁰مګر زه پوهېږم چې ته او ستا درباريان لا تر اوسه پورې د څښتن خدای څخه نه وېرېږئ.“

³¹د کتان بوټي او اوربشې له منځه لاړل، ځکه چې اوربشې پخې وې او د کتان بوټو غوټۍ کړې وې.

³²مګر د غنمو فصلونه له منځه نه ؤو تللي ځکه چې هغه وروسته پخيږي.

³³بيا حضرت موسیٰ د فرعون څخه لاړ او له ښار څخه ووت. هغه څښتن ته خپل لاسونه پورته کړل او تندر او ږلۍ ودرېدل او په ځمکه باندې نور باران ونه اورېده.

³⁴کله چې فرعون وليدل چې باران، ږلۍ او تندر ودرېدل هغه بيا ګناه وکړه. هغه او درباريانو يې خپل زړونه سخت کړل.

³⁵نو لکه څنګه چې څښتن د حضرت موسیٰ په وسيله فرمايلي ؤو، فرعون اسرائيليان پرېنښودل چې لاړ شي.