Read Pashto (Nangahari) — د پښتو مقدس کتاب ايُوب 11 Bible Online

ايُوب 11 - Pashto (Nangahari) — د پښتو مقدس کتاب bible

ايُوب 11

¹بيا ضوفر نعماتى جواب ورکړو:

²”د ډېرو خبرو جواب په کار نۀ دے څۀ؟ ولې يو سړے په ډيرو خبرو باندې ځان بې ګناه ثابتولے شى څۀ؟

³ستا فالتُو خبرې دې نور خلق غلى کړى څۀ؟ کله چې تۀ د چا سپکاوے کوې، نو څوک به تا ته ګوته نۀ نيسى څۀ؟

⁴ځکه چې تۀ وايې چې زما عقيده ټيک ده، او زۀ د خُدائ پاک په نظر کښې صفا يم،

⁵کاش چې خُدائ پاک کلام کړے وے، او هغۀ تا ته صفا وېنا کړے وے،

⁶او هغه به تا ته د حِکمت رازُونه وښائى! ځکه چې ريښتينے حِکمت په ډېرو طريتو سره حاصليږى. نو بيا پوهه شه چې خُدائ پاک تا له د هغې نه کمه سزا درکوى چې څومره تۀ د ګناه په وجه حقدار يې.

⁷ولې تۀ د خُدائ پاک هغه پټې خبرې معلومولے شې؟ او يا تۀ د خُدائ تعالىٰ حد معلومولے شې څۀ؟

⁸دا حد د آسمان نه اُوچت دے، تۀ څۀ کولے شې؟ او د مرګ د کندې نه ډُوب دے، تا ته څۀ پته ده؟

⁹د دې پېمانه د زمکې نه اُوږده ده، او د سمندر نه پلنه ده.

¹⁰که خُدائ پاک راشى او تا په قېدخانه کښې واچوى، او هغه د اِنصاف دپاره عدالت جوړ کړى، نو هغه څوک ايسارولے شى؟

¹¹ځکه چې هغۀ ته پته ده چې څوک دوکه باز دے، او هغه يې د هرې ګناه نه خبر وى.

¹²خو يو کم عقل کس به په هغه وخت هوښيار شى، چې کله د يوې ځنګلى خرې نه يو انسان پېدا شى.

¹³کله چې ستا خپل زړۀ تيار شې، او لاسونه هغۀ ته اُوچت کړې

¹⁴د ګناهونو نه ځان خلاص کړې، او بدعملى د خپل کور نه ختمه کړى،

¹⁵نو په حقيقت کښې به بيا تۀ خپل سر بغېر د څۀ شرم نه اُوچت کړې، تۀ به په آمن کښې يې او نور به نۀ يرېږې.

¹⁶تۀ به خپل غم هېر کړې، او داسې به دې هېر شى لکه چې بيا به دې هيڅ خيال نۀ ورځى.

¹⁷او ستا ژوند به د غرمې د نمر نه زيات روښانه وى، او تيارۀ به دې هم د سحر د رڼا په شان وى.

¹⁸او ستا به اعتماد پېدا شى، ځکه چې اُميد شته، او تۀ به بچ شې او په حِفاظت کښې به آرام کوې.

¹⁹تۀ به څملې او هيڅ څوک به تا نۀ يروى، ډېر خلق به ستا نه د مدد اُميد ساتى.

²⁰خو د بد کاره خلقو سترګې به ړندې شى، او هغوئ به د تښتې ټولې لارې خطا کړى، او هغوئ به صرف د مرګ په انتظار وى.“